އެއާ އެމްބިއުލާންސްގެ ހިދުމަތް ދޭން ފެށިފަހުން 75 ދަތުރު ކޮށްފައިވާކަމަށް އެއާ އެމްބިއުލާންސްގެ ހިދުމަތް ދެމުން އަންނަ އައިލެންޑް އޭވިއޭޝަނުން ބުނެފިއެވެ.
ސަރުކާރުން އެއާ އެމްބިއުލާންސްގެ ހިދުމަތް ރަސްމީކޮށް ފަށާފައިވަނީ މިދިޔަ މާޗްމަހުގެ އެއްވަނަ ދުވަހުން ފެށިގެންނެވެ. މި ހިދުމަތް ދެމުން އަންނަނީ އައިލެންޑް އޭވިއޭޝަނާ ގުޅިގެންނެވެ.
އައިލެންޑް އޭވިއޭޝަނުން އެކްސްގައި ކުރި ޕޯސްޓެއްގައި ބުނެފައިވަނީ އެއާ އެމްބިއުލާންސްގެ ހިދުމަތް ދޭން ފެށިފަހުން އެމަޖެންސީގައި ބަލިމީހުން އުފުލުމަށް މިހާތަނަށް 75 ދަތުރު ކާމިޔާބުކަމާއެކު ފުރިހަމަ ކުރެވިފައިވާކަމަށެވެ.
We have completed 75 flights after launching dedicated air ambulance service on our domestic and seaplane routes. Our air ambulance service continues to make a difference in the Maldives. ✈️ #Maldivian #AirAmbulance #SavingLives pic.twitter.com/BdumRtDYIL
— MaldivianAero (@MaldivianAero) April 8, 2024
އައިލެންޑް އޭވިއޭޝަނުން އެއާ އެމްބިއުލާންސްގެ ހިދުމަތް ދިނުމަށް މިހާރު ދެ އުޅަނދެއް ބޭނުން ކުރެއެވެ. އެއީ ޑޭޝް-8 މަރުކާގެ މަތިންދާބޯޓަކާއި، މޫދައްޖައްސާ ބޯޓެކެވެ.
ސަރުކާރުން ދަނީ އެއާ އެމްބިއުލާންސްގެ ހިދުމަތް ރާއްޖޭގެ އިތުރުން ބޭރު ގައުމުތަކަށްވެސް ފެށުމަށް މަސައްކަތް ކުރަމުންނެވެ. މިގޮތުން ކައިރު މުސްތަގުބަލެއްގައި ސްރީލަންކާއަށް ބަލިމީހުން އުފުލަން ފަށާނޭކަމަށް ސަރުކާރުން ވަނީ ބުނެފައެވެ. މިހިދުމަތް ލަންކާއަށް ފެށުމަށްޓަކައި އެގައުމުން ހުއްދަ ލިބިފައިވާކަމަށްވެސް ސަރުކާރުގެ ކަމާބެހޭ އިދާރާތަކުން ބުނެއެވެ.
