ދިވެހި ޖުމްހޫރިއްޔާގެ ގާނޫނު އަސާސީ މަގު ދައްކާފައި އޮތީ ތިން ބާރު ވަކިވެފައި އޮންނަ އެއްބާރުން އަނެއްބާރުގެ މައްޗަށް ފާރަވެރިވެ، ޒިންމާކުރުވުމުގެ ނިޒާމެކެވެ. އެހެންނަމަވެސް 20 ވަނަ ރައްޔިތުންގެ މަޖިލިސް ހުވާކުރަން 5 ދުވަހަށް ވެފައި ވަނިކޮށް، ޖުމްލަ 74 މެންބަރުންނާއެކު މަޖިލީހުގެ "ސުޕަ މެޖޯރިޓީ" ލިބިފައިވާ ޕީއެންސީން އިއްޔެ ވަނީ މުހިއްމު، އެހެނަސް ކަންބޮޑުވާ ނިންމުންތަކެއް ނިންމާފައެވެ. މި ނިންމުންތަކަކީ ގާނޫނު އަސާސީގައި އެކަށައަޅައ،ި އިން ވަކިކޮށްފައިވާ ދައުލަތުގެ ބާރުތައް މަސްހުނިވެގެން ހިނގައްޖެކަން ސާފުވެގެން ދިޔަ ނިންމުން ތަކެކެވެ.
ގާނޫނު ހަދާ ބާރާއި ވެރިކަން ހިންގުމުގެ ބާރާއި އަދުލްއިންސާފުގެ ބާރުގެ ތެރެއިން ވެރިކަން ހިންގުމުގެ ބާރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްޔެ މުލިއާގޭގައި ވަނީ ގާނޫނު ހަދާ ބާރުގެ އެކި މަގާމުތަކަށް އެމަނިކުފާނުގެ ޕާޓީ، ޕީއެންސީން އައްޔަންކުރަން އެމަނިކުފާނަށް ފެނިވަޑައިގަންނަވާ ބޭފުޅުންގެ ނަންފުޅުތައް، ޕީއެންސީގެ ޕާލިއަމެންޓްރީ ގްރޫޕަށް ހުށަހަޅުއްވާފައެވެ. ވަޒީރުންގެ މަޖިލީހުގެ ބޭފުޅުންގެ ކުރިފުޅުމަތީގައެވެ.
މިބައްދަލުވުމުގައި ނިންމާފައިވަނީ؛
1. މަޖިލިހުގެ ރައީސްކަމަށް ރައީސުލްޖުމްހޫރިއްުޔާގެ އިސް މުޝީރު އަދި ލ. ފޮނަދޫ ދާއިރާގެ އިންތިހާބީ މެމްބަރު ޢަބްދުއްރަޙީމް އަބްދުﷲ
2. މަޖިލިހުގެ ނައިބު ރައީސްކަމަށް ރައީސްގެ އާއިލީ ބޭފުޅެއް ކަމަށްވާ ދިއްގަރު ދާއިރާގެ އިންތިހާބީ މެންބަރު އަހުމަދު ނާޒިމް
3. ޕާލިއަމެންޓްރީ ގްރޫޕުގެ ލީޑަރު ކަމަށް އިނގުރައިދޫ ދާއިރާގެ އިންތިހާބީ މެންބަރު އިބްރާހީމް
4. ޕީއެންސީގެ ޕާލިއަމެންޓްރީގެ ގްރޫޕުގެ ސީނިއަ ޑެޕިއުޓީ ލީޑަރު ބާރަށުގެ ދާއިރާގެ އިންތިހާބީ މެންބަރު އިބްރާހީމް ސުޖާއު
5. ޑެޕިއުޓީ ޕީޖީ ލީޑަރު ވިލިމާލޭ ދާއިރާގެ އިންތިހާބީ މެމްބަރު މުޙައްމަދު އިސްމާޢީލް.
6. ޑެޕިއުޓީ ޕީޖީ ލީޑަރު ކަމަށް މަހިބަދޫ ދާއިރާގެ އިންތިހާބީ މެމްބަރު އަޙުމަދު ތޯރިޤް.
7. ޑެޕިއުޓީ ޕީޖީ ލީޑަރު ކަމަށް ހުޅުދޫ ދާއިރާގެ އިންތިހާބީ މެމްބަރު މުޙައްމަދު ޝާހިދު.
8. މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) ގެ މުޤައްރިރު ކަމަށް އޭދަފުށީ ދާއިރާގެ މެންބަރު އަޙްމަދު ސަލީމް (ރެޑްވޭވް ސަލީމް).
މި ހުރިހާ ނަންތަކެއް އިއްޔެ މުލިއާގޭގައި ބޭއްވި ބައްދަލުވުމަށް ހުށަހެޅެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. އަދި ރައީސް ޑރ. މުޢިއްޒު ހުށަހެޅުއްވި ގޮތަށް އެ ހުރިޔާ މަގާމުތަކަކަށް ބޭފުޅުން އިންތިހާބު ކުރުމަށް އިއްޔެ ޕީއެންސީގެ ޕީޖީ ގްރޫޕުގެ އިއްތިފާގުން ވަނީ ފާސްކޮށްދީފައެވެ.
"ދައުލަތް ހިންގުމުގެ ނިޡާމްގައި ހިމެނޭ ތިންބާރު ވަކިކޮށް، އެއްބާރުން އަނެއް ބާރަށް ނުފޫޒު ނޮފޯރުވުމަށް ޤާއިމްކޮށްފަ އޮތް "ޗެކް އެން ބެލެންސް" ނިޡާމު ހުރިހާ ރައްޔިތުންގެ ކުރިމަތީ ފުނޑާލީއެވެ. ތަންފީޒީ ބާރުގެ އިސްވެރިޔާގެ "ރަބަރ ސްޓޭމްޕް" އަކަށް މަޖިލިސް ހަދާ ނިންމާލީއެވެ. ހިތާމައިގެ ކޮޅެއްވެސް ނެތެވެ. މިއީ، މިއަށްވުރެ ތާހިރުކޮށްވެސް ކުރެވެން އޮތް ކަމެކެވެ. އެކަން އެހެން ކުރެވޭނެ ކަން، 19 ވަނަ މަޖިލީހުގެ ފުރަތަމަ ޖަލްސާގެ ތެރެއިން އެމްޑީޕީ އިން ވަނީ ދައްކުވާފައެވެ،" ސޯޝަލް މީޑިއާގައި މުހައްމަދު ފާރޫގު އޭނާގެ ފޭސް ބުކުގައި ނުރުހުންތެރިކަމާއެކު ލިއުއްވާވާފައިވެއެވެ.
މަތީގައިވާ މަގާމުތަކަށް ބޭފުޅުން އިންތިހާބުކުރަނީ ރައްޔިތުންގެ މަޖިލީހުގެ ސިއްރު ވޯޓުންނެވެ. ނުވަތަ ޕާލިއަމެންޓްރީ ގްރޫޕުގައި ނެގޭ ސިއްރު ވޯޓުންނެވެ. އެހެންނަމަވެސް އިއްޔެ، ދައުލަތުގެ އެންމެ މަތީވެރިޔާ އަދި ވެރިކަން ހިންގާ ބާރުގެ ވެރިޔާގެ ޢަމަލުޅުތަކުން ހާމަވެގެން ދިޔައީ ވިހި ވަނަ ރައްޔިތުންގެ މަޖިލިސް ވެގެންދާނީ ސަރުކާރުން ބޭނުންވާ ކޮންމެ ކަމެއްް، އެބޭނުންވާ ގޮތަކަށް ނިންމައިދޭ ތަނަކަށް ވެގެންދާނެ ކަމެވެ.
"މިއީ ބާރުތައް މަސްހުނި ވެގެންދާ ގޮތުގެ ސާފު މިސާލެއް. މިހާރު މަޖިލީހުގެ މެޖޯރިޓީ އޮތް ގޮތުން ޖުޑީޝަލް ސާވިސަސް ކޮމިޝަން ވެސް، މިނިވަން މުވައްސަސާތަކުގެ މެންބަރުންނަށް ވެސް އަންނާނީ ވެރިކަން ހިންގާ ބާރުގެ ވެރިޔާ، ރައީސުލްޖުމްހޫރިއްޔާ ބޭނުންވާ ގޮތަކަށް ބޭނުންވާ ބައެއް. ގައުމުގެ ހުރިހާ ބާރުތައް މަސްހުނިވެ، އެއްފަރާތަށް ބުރަވުމުގެ އިތުރުން ސަރުކާރަށް، ދައުލަތަށް ފާރަވެރިވާން ޖެހޭ މިނިވަން މުވައްސަސާތައްވެސް އޮންނާނީ ވެރިކަމުގެ ބާރުގެ މުށުތެރޭގައި. މިއީ ޔާމީންގެ ވެރިކަމުގެ ކުރީކޮޅު ކަންހިނގާދިޔަ ގޮތުގެ ނަކަލެއް. އޭރުގެ އޮޑިޓަ ޖެނެރަލް މަގާމުން ވަކިކުރެއްވީ ޔާމީން ބޭނުންފުޅު ނުވާ ގޮތަށް އޮޑިޓްގެ ކަމެއް ހިންގުމުން. އެއީ މަޝްހޫރު އެމްއެމްޕީއާރުސީގެ ބޮޑު ހިޔާނާތަަށް މަގު ހުޅުވިގެން ދިޔަ ސަބަބު،" ރާއްޖޭގެ މަޝްހޫރު ގާނޫނީ ވަކީލަކު ކިޔައިދިނެވެ. "މުއިއްޒުވެސް ބިންގާ މިއެޅުއްވީ ވަރަށް ގޯސް ސަގާފަތެއްގެ ފެށުމެއް."
ރައީސުލްޖުމްހޫރިއްޔާގެ އިއްޔެގެ އެ ނިންމެވުންތަކާ ގުޅިގެން އަބްދުއްރަހީމް ވިދާޅުވެފައި ވަނީ މަސައްކަތްކުރާ މީހުންގެ އަގު ވަޒަންކުރެއްވުމުގައި ރައީސުލްޖުމްހޫރިއްޔާ ޑރ. މުއިއްޒުއަކީ ނަމޫނާ ބޭފުޅެއް ކަމަށެވެ. ރައީސްގެ އިއްޔެގެ ނިންމެމުންތައް އެންޑޯޒް ކުރައްވަމުން ނައިބް ރައީސް ހުސައިން މުހައްމަދު ލަތީފު (ސެމްބެ) ވިދާޅުވީ އަބްދުއްރަހީމާއި ނާޒިމް މަޖިލީހުގެ ރިޔާސަތަށް ވަޑައިގަތުމުން ކާމިޔާބުތައް ލިބިގެންދާނެ ކަމަށެވެ.
ކިޔުންތެރިންގެ ޚިޔާލުތައް
19 ވަނަ މަޖިލީހުގައި ކޮމިޓީތަކުގެ މުޤައްރިރުންނަށް ކޮންމެ ޕާޓީއެއްގެ ކޮންމެ މީހަކު ހުއްޓަސް، ނިމިދިޔަ ސަރުކާރުން ކަންކަން ކުރީ ބޭނުން ކަމެއް ބޭނުން އިރަކު ބޭނުން ގޮތަކަށްކަން ނުދަންނަ މީހަކު މިފަދަ ލިޔުމެއް މިގޮތަށް ލިޔުނީމާ ކިތައި އުޅެނީ " ރުހުމުގެ ލޮލަކަށް އައިބެއް ނުފެންނާނެ" އޭ. މިއީ ޒާތީ ޙަސަދައިގެ މައްޗަށް ލިޔެފައިވާ ލިޔުމެއް.