މިއަދަކީ އަބްދުއްރަހީމް އަބްދުﷲ (އަދުރޭ) އަށާއި މުޅި ލ. އަތޮޅަށް ވެސް ތާރީޚީ ދުވަހެކެވެ. އެމަނިކުފާނުގެ ޕާޓީ، ޕީއެންސީއަށް ވެސް މިއަދުގެ އުފާވެރިކަން އޭގެ އިންތިހާ ބޮޑެވެ. އެއީ ރާއްޖޭގެ ތާރީޚުގައި މިހާތަނަށް ލިބުނު އެންމެ ބޮޑު އަޣުލަބިއްޔަތާއެކު ވިހި ވަނަ ރައްޔިތުންގެ މަޖިލީސް މިއަދު ހުވާކުރުމުންނެވެ. އަބްދުއްރަހީމް ތާރީޚުގެ ތެރެއަށް ވަދެގެންދާ އަނެއް ސަބަބަކީ ރާއްޖޭގެ ސިޔާސީ ދާއިރާގެ އެންމެ ދަށުން ފެށިގެން ކުރިއަރުން އައިސް، މިއަދު ދައުލަތުގެ ގާނޫނު ހަދާ ބާރުގެ ވެރިއަކަށް އެމަނިކުފާނު ވެގެން ދިއުމުންނެވެ. މިއަދު ވިހި ވަނަ ރައްޔިތުންގެ މަޖިލީހުގެ ރައީސް ކަމަށް އަދުރޭ ހޮވުނީ 71 މެންބަރުންގެ ފުރިހަމަ ތާޢީދާއެކީގައެވެ.
އެމަނިކުފާނު ރައްޔިތުންގެ މަޖިލީހުގެ ރައީސްގެ ހައިސިއްޔަތުން، ދައުލަތުގެ އެންމެ ބާރުގަދަ އެއް ގޮނޑީގައި އިށީނދެވަޑައިގެން ދެއްވީ ކުރު އެހެންނަމަވެސް ވަރުގަދަ މުހިއްމު ތަގުރީރެކެވެ. ވިދާޅުވިއެވެ؛ "މި ވިހި ވަނަ ރައްޔިތުންގެ މަޖިލިސް އެކުލަވާލެވިގެން މިދަނީ ގައުމަށް މުހިއްމު ދަނޑިވަޅެއްގައި. މުހިއްމު އާ ސިޔާސީތަކާ އެކީގައި އިންގިލާގީ ހެޔޮ ބަދަލެއް ރާއްޖެއަށް ގެނެސްދެއްވުމުގެ އިހްލާސްތެރި ވިސްނުންފުޅުގަ، ދިވެހިރައްޔިތުންނަށް އުފާވެރި ދުވަސްތަކެއް ހޯއްދަވައިދެއްވުމުގެ ވަރުގަދަ އަޒުމުގައި މުޅިން އާ ބޭފުޅަކު އާދެ، ރާއީސް ޑރ. މުހައްމަދު މުޢިއްޒު ދިވެހިރާއްޖޭގެ ރައީސުލްޖުމްހޫރިއްޔާކަމާ ހަވާލުވެޑައިގެންނެވިތާ މަދު މަސްތަކެއްގެ ތެރޭގަ."
ދެން އަބްދުއްރަހީމް ފާހަގަކުރެއްވީ ވިހި ވަނަ ރައްޔިތުންގެ މަޖިލީހުން ކުރަން ހުރި މުހިއްމު އަދި އެހާމެ ބޭނުންތެރި ގިނަ މަސައްކަތްތަކުގެ ވާހަކައެވެ.
"އެހެންކަމުން މި މަޖިލިސް ވެގެންދާނީ އެމަނިކުފާނުގެ މަސައްކަތްޕުޅާ ފިޔަވަޅު ހަމަކޮށް ހިނގާނެ، ހިނގަންވާނެ މަޖިލީހަކަށް. މި ދަނޑިވަޅަކީ ގައުމެއްގެ ގޮތުގައި މުހިއްމު ނިންމުންތަކެއް ނިންމަން ޖެހިފައިވާ ދަނޑިވަޅެއް. އިގްތިސާދީ އަސާސްތައް ފުޅާކުރުން. އާ މަސައްކަތްތަކާއި ފަންނުތަކާއި ވިޔުފާރިތައް އުފަންކުރުން. ފައިސާއާއި މާލީ ފުދުންތެރިކަން އިތުރުކުރެވޭނެ ގޮތްތައް ހޯދުން. އުމުރާނީ ތަރައްގީގެ އާ ހަރުފަތްތަކެއް ރާއްޖެއަށް ތަޢާރަފުކުރަމުން ގެންދިއުން،" ރިޔާސަތުގައި އިންނަވައި ވާހަކަ ކުރިއަށް ގެންވަމުން އަދުރޭ ވިދާޅުވިއެވެ. "ވީދެމުންދާ ދިވެހިންގެ އިޖުތިމާއީ ފޭރާން، އަލުން ވިޔެ، އާކުރުން، މަސްތުވާތަކެތީގެ ވަބާއާ ވަރުގަދަ ހަނގުރާމައެއްކުރުން. ނުގަވާއިދުން ބިދޭސީން ރާއްޖެއަށް ވަންނަ ދޮރުތައް ބަންދުކުރުން. ގާނޫނުގެ ވެރިކަން ނެގެހެއްޓުން. ޝަރުއީ ދާއިރާގެ މިނިވަންކަން ކަށަވަރުކުރުން. މަޖިލީހުގެ އަބުރާއި ކަރާމާތް ހިފެހެއްޓުން. މިއީ ހައްތާވެސް މި މަޖިލިސް ތެރޭގައި ކުރިއަށް އޮތް ދުވަސްތަކުގައި މަޝްވަރާކޮށް ބަހުސްކޮށް، ސަރުކާރާއެކު މަސައްކަތްކޮށް ނިންމަން ޖެހޭނެ ކަންކަން."
ރާއްޖޭގައި އަދުރޭއާއެކު ސިޔާސީ މަސައްކަތްތައް ކުރުމުގައި އުޅުނު ބައެއް ބޭފުޅުން ވިދާޅުވި ގޮތުގައި އަދުރޭއަކީ އަބަދުވެސް އެއިރެއްގައި ހަވާލުވެވަފައިވާ ކޮންމެ ޓާސްކެއް، ފަސްޖެހުމެއް، ބިރުގަތުމެއް، ލަދުގަތުމެއް ނެތި އަދާކުރުމުގައި ފާހަގަކޮށްލެވޭ ބޭފުޅެކެވެ.
އެމަނިކުފާނުގެ ޢިލްމީ ގާބިލްކަމާމެދު ގިނަ ބަޔަކު އުފައްދާ ސުވާލުތަކާމެދު ސިޔާސީ އެކުވެރިން ދެނީ މާ ފުރިހަމަ ޖަވާބެކެވެ؛ "އަދުރޭއަށް ނުކުރެވުނު މަޖިލީހުގެ ރައީސްކަމެއް އަދާކުރެވޭނެ ވަކި އެހެން މީހަކު ނުހުންނާނެ. ސިޔާސީ ގޮތުން މިސްޓޭކެއް ނަހަދާނެ. ބައެއް ފަހަރު ބަސްމަގު ހުންނަ ގޮތުން ސުވާލު އުފެދުނު ކަމުގައިވިއަސް، މަޖިލިސް ރައީސް ކަމުގެ ގޮނޑީފައި އިށީނދެވަޑައިގަތުމަށް ފަހު އެކަން އޭނާގެ ކިބައިން ނުފެންނާނެ."
މަޖިލީހުގެ ރައީސާއި ނާއިބް ރައީސް އަހުމަދު ނާޒިމްވެސް ވިދާޅުވަނީ ކުރިއަށް އޮތް ވިހި ވަނަ ރައްޔިތުންގެ މަޖިލީހަކީ ވިސްނުންތެރިކަމާއެކު ނަތީޖާ ނެރެދޭނެ ރައްޔިތުން ބަލައިގަންނާނެ މުހިއްމު މަޖިލީހަކަށްވާނެ ކަމަށެވެ.
އަދުރޭގެ ނަން މިއަދުން ފެށިގެން ދެން ލިޔެވިގެން ދާނީ ތިރީގައި މިވާ ބޭފުޅުންގެ ލިސްޓުގައެވެ.
ރައީސް މުޙައްމަދު ނަޝީދު
28 މޭ 2019 – 13 ނޮވެމްބަރު 2023
އަލްފާޟިލް ޤާސިމް އިބްރާހިމް
1 ނޮވެމްބަރު 2018 – 27 މޭ 2019
އަލްފާޟިލް ޢަބްދުﷲ މަސީޙު މުޙައްމަދު
27 މޭ 2014 – 1 ނޮވެމްބަރު 2018
އަލްފާޟިލް ޢަބްދުﷲ ޝާހިދު
28 މޭ 2009 – 28 މޭ 2014
އަލްފާޟިލް މުޙަންމަދު ޝިހާބު
12 އޯގަސްޓު 2008 – 28 މޭ 2009
އަލްފާޟިލް އަޙްމަދު ޒާހިރު
13 ސެޕްޓެމްބަރު 2004 – 6 އޯގަސްޓު 2008
އަލްއުސްތާޛު ޢަބްދުﷲ ޙަމީދު
11 ނޮވެމްބަރު 1993 – 13 ސެޕްޓެމްބަރު 2004
ޞާހިބުއްސަޢާދާ އަލްފާޟިލް އަޙްމަދު ޒަކީ
22 ފެބްރުއަރީ 1990 – 11 ނޮވެމްބަރު 1993
އަލްއުސްތާޛު ޢަބްދުﷲ ޙަމީދު
14 ފެބްރުއަރީ 1988 – 22 ފެބްރުއަރީ 1990
އަލްއުސްތާޛު އިބްރާހީމް ޝިހާބު
11 ނޮވެމްބަރު 1982 – 15 ޖެނުއަރީ 1988
އައްޝައިޚް އަޙްމަދު ޝާޠިރު
1 އޯގަސްޓު 1972 – 11 ނޮވެމްބަރު 1982
ޞާހިބުއްސަޢާދާ އަލްފާޟިލް އަޙްމަދު ޒަކީ
3 އޮކްޓޯބަރު 1959 – 1 އޯގަސްޓު 1972
އަންނަބީލު އިބްރާހީމް ފަރީދު ދީދީ
1 މާރިޗު 1954 – 3 އޮކްޓޯބަރު 1959
އައްޝައިޚް މަލިން މޫސާ މާފަތްކަލޭގެފާނު
13 އޭޕްރީލު 1952 – 21 އޮކްޓޯބަރު 1953
އައްޝައިހު މުޙަންމަދު ނަސީރު މަނިކު
12 އޭޕްރީލު 1948 – 12 އޭޕްރީލު 1952
އަލްއަމީރު ޢަލީ ކުޑަރަންނަބަނޑޭރި ކިލެގެފާނު
8 ނޮވެމްބަރު 1945 – 3 މާރިޗު 1948
އަލްއަމީރު އިބްރާހީމް ޢަލީ ދީދީ
30 އޮކްޓޯބަރު 1944 – 7 ނޮވެމްބަރު 1945
އަލްއުސްތާޛު އަޙްމަދު ކާމިލް ދީދީ
27 ޖޫން 1942 – 29 އޮކްޓޯބަރު 1944
އަލްއަމީރު މުޙަންމަދު ފަރީދު ދީދީ
21 އޮކްޓޯބަރު 1933 – 25 ޖޫން 1942
