ކެންސަރު ބަލީގެ ފަރުވާގައި އުޅުއްވަނިކޮށް ބައްދަލުވި ދުވަހެއްގައި އެކުވެރި އަހުމަދު ފާއިޒް އަހަރެންނާ ސުވާލެއް ކުރިއެވެ؛ "އަހަރެން މަރުވާ ދުވަހަކުން ކަލޭމެން ނޫސްވެރިން ލިޔާނީ ކީކޭ"؟
މިއަދު މިއޮތީ ހާފިޒުގެ އެދުވަހުގެ ސުވާލަށް ޖަވާބު ދޭން ޖެހިފައެވެ. ކެންސަރު ބައްޔަށް ފަރުވާ ކުރައްވަމުން ގެންދަވަނިކޮށް އުމުރުފުޅުން 62 އަހަރުގައި އޭނާ އަވަހާރަވެއްޖެއެވެ. މިއަދު އަހަރެން ހާފިޒުއާ ބެހޭ ގޮތުން ލިޔާނެ ވަރަށް ގިނަ ވާހަކަ އެބަހުއްޓެވެ؛ އޭނާގެ ސަކަ މިޒާޖެވެ. މައުލޫމާތުގެ މުއްސަނދިކަމެވެ. ކުރައްވާ ކަމެއްގައި ސާބިތުވެ ހުންނަވާ މިންވަރެވެ. އަބަދުވެސް ރީތިކޮށް ހެދުން އަޅުއްވައި މަޑުމައިތިރި ދިރިއުޅުއްވުމަށް ބެހެއްޓެވި ސަމާލުކަމެވެ.
އަހަރެން ނޫސްވެރިކަމަށް ނުކުތްއިރު ހާފިޒަކީ ފިޝަރީޒް ނުވަތަ މަސްވެރިކަމުގެ ދާއިރާގެ މާހިރެކެވެ. ނޫސްވެރިންނާ އަބަދުވެސް ގާތް ގުޅުމެއް ބާއްވަވައި، މަސްވެރިކަމާއި ކަނޑުފަޅާ ބެހޭ އެކި ދާއިރާތަކުން އާންމުން ހޭލުންތެރި ކުރުވުމަށް ޚާއްސަ ޝައުގުވެރިކަމެއް ގެންގުޅުއްވިއެވެ. އަމިއްލަ ދިރާސާތައް ނޫސްވެރިންނާ ހިއްސާ ކުރައްވައި، ނޫސްވެރިންވެސް އެދާއިރާތަކަށް ހިތް ލެންބުމަށް މަސައްކަތްކުރެއްވި ޚިދުމަތްތެރިއެކެވެ.
ރާއްޖެއިން ފާނައިގެ ސްޓޮކް ހުސްވާ މައްސަލައާއި ގާހުދުވާ ބަލީގެ އިތުރުން އެންވެރިކަމަށް އަންނަމުންދިޔަ އަދި އަންނާނެ ބަދަލުތަކާއި އިންޑިޔާކަނޑުގެ ކަޅުބިލަ މަހުގެ ސްޓޮކަށް އަންނަމުންދިޔަ ބަދަލުތަކުގެ ވާހަކަ އޭރު އޭނާ ދެއްކެވިއެވެ. އެވާހަކަތަކަށް އޭރު ސަމާލުކަން ދިނީ މަދު ބަޔަކު ނަމަވެސް، މިއަދު ހާފިޒު އަވަހާރަވެގެން އެއްޗެއް ލިޔާ މީހަކު މިވާހަކަތައް ފާހަގަ ނުކޮށް ދޫކޮށްލެވޭ ވަރަށްބުރެ މިދާއިރާގައި އޭނާގެ ޚިދުމަތް މާފުޅަލެވެ.
ހާފިޒަކީ މަސްވެރިކަމުގެ ދާއިރާގައި ރާއްޖޭގައި ތިއްބެވި މަދު ތަޖުރިބާކާރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އޭނާ ވަނީ 1999 ވަނަ އަހަރުން ފެށިގެން 2004 އަކާ ހަމައަށް ރާއްޖޭގެ މެރިން ރިސާޗް ސެންޓަރުގެ ޑިރެކްޓަރުކަން ކުރައްވަވާފައެވެ.
ތައުލީމީ ދާއިރާގައި ވެސް ހާފިޒް ވަނީ ގިނަ މަސައްކަތްތަކެއް ކުރައްވާފައެވެ. އެގޮތުން އަހުމަދިއްޔާ ސްކޫލުގެ އެސިސްޓެންޓް ޕްރިންސިޕަލްގެ މަގާމުވެސް އޭނާ ވަނީ ގިނަ އަހަރުތަކެއް ވަންދެން ކުރައްވަވާފައެވެ.
ދެން އޭނާގެ ޝައުގުވެރިކަން ގުޅިފައިވަނީ ކުޅިވަރާއެވެ. އޭނާއަކީ ބާސްކެޓަށް ޚާއްސަ ޝައުގުވެރިކަމެއް ބެހެއްޓެވި ބޭފުޅެކެވެ. ބާސްކެޓްބޯޅަ އެސޯސިއޭޝަން ހިންގެވުމުގައިވެސް އޭނާ ގިނަ ދުވަސްތަކެއްގައި މަސައްކަތްކުރެއްވިއެވެ.
ހާފިޒުއާ ބައްދަލުވި ދުވަހު ދެކެވުނު ވާހަކައިން ހަނދާނަށް އަންނަ އެއް ވާހަކަ އެބައޮތެވެ؛ "އަހަރެން މަރުވާ ދުވަހަކުން ވިއަސް، އަހަރެންގެ އާއިލާ ލަދުގަންނަ ކަހަލަ ވާހަކައެއް ނުލިޔާތި. ކަލޭމެން ނޫސްވެރިންގެ ގޮތެއް ކިޔާކަށް ނޭނގޭނެ،"
އެކުވެރި ހާފިޒުއެވެ. މިއަދު ތިބޭފުޅާ އަހަރެމެންނާ ވަކިވެގެން ތިޔަ ވަޑައިގެންނެވީ އަގުބޮޑު ހަނދާންތަކެއް، ޚިދުމަތްތަކެއް ދޫކުރައްވާފައެވެ. އަހަރެންގެ މި އާޓިކަލްގައި ލިޔަން އޮތީ ހުސް ރަނގަޅު ވާހަކައެވެ. އެކަމަކު އަބަދުވެސް ތިބޭފުޅާ ދަންނަވާ ވާހަކައެއް ހަނދާނަށް އަންނާތީ ކުރުކޮށްލަމެވެ. "އެއްވެސް ކަމެއްގައި އަހަރެންނަށް މާބޮޑަށް ހުށާމަދު މުކުރާތި."
އަަހަރެން އެދެނީ ހާފިޒުގެ ފުރާނައަށް މާތް ﷲ ރަހުމަތް ލެއްވުމެވެ. އާއިލާއަށް ކެތްތެރުކަން މިންވަރު ކުރެއްވުމެވެ.
