މިފަހަރުގެ ޔޫރޯގައި ފެނިގެންދާނެ އެންމެ މަޤްބޫލް ކުޅުންތެރިން!

1- ކީލިއަން އެމްބާޕޭ (ފްރާންސް / ރެއަލް މެޑްރިޑް)

ފްރާންސްގެ އެމްބާޕޭއަކީ މިހާރު ދުނިޔޭގެ އެންމެ މޮޅު ފުޓުބޯޅަ ކުޅުންތެރިއާއެވެ. ފްރާންސްގެ ދެވަނައެއް ނެތް ޒައިނުއްދީން ޒިދާނަށްފަހު މުޅި ފްރާންސްގެ ފުޓުބޯޅައިގެ ޖަވާހިރުގެ ގޮތުގައި ޒިދާން ސިފަކުރާ ކުޅުންތެރިއާއަކީ އެމްބާޕޭއެވެ. އެމްބާޕޭގެ އުމުރުން ހަގަކަސް ބައިނަލް އަޤްވާމީ ފުޓުބޯޅައިގާ އެމްބާޕޭއަކީ ތަޖުރިބާކާރު ކުޅުންތެރިއެކެވެ. ފްރާންސްގެ ކޯޗު ޑިޝޭމްޕްސް އެމްބާޕޭ ތަމްރީނުކުރަނީ މީގެ 10 އަހަރުފަހުން ޕެލޭ އަދި މަރަޑޯނާ ލެވެލްގައި ގުނާލެވޭ ފެންވަރުގައި ބެހެއްޓުމަށެވެ. އެމްބާޕޭވަނީ އުމުރުން އެންމެ 19 އަހަރުގައި ދުނިޔޭގެ ޗެމްޕިއަންކަން 2018 ވަނަ އަހަރު ހޯދާފައެވެ. އަދި، ޖެހިޖެހިގެން ދެފަހަރު ވޯލްޑްކަޕް ފައިނަލްގައި ގޯލްވެސް ޖަހައިދީފައެވެ. ވޯލްޑްކަޕްގައި އެންމެ ގިނަ ގޯލްޖެހި ކުޅުންތެރިއާގެ ރެކޯޑު މުގުރާލުމަށްޓަކައި، އެމްބާޕޭއަށް މިހާރު ބޭނުންވަނީ އެންމެ 4 ގޯލެވެ. ބްރެޒިލްގެ ލެޖެންޑ ރޮނާލްޑޯ އަދި ޖަރުމަނުގެ މިރޮސްލާވް ކްލޯސާ 4 ފަހަރު ވޯލްޑްކަޕް ކުޅެގެން 15 ގޯލްޖެހިއިރު، އެމްބާޕޭވަނީ 2 ވޯލްޑްކަޕު ކުޅެގެން 12 ގޯލް ޖަހައިދީފައެވެ. މިއީ، އާދައިގެ ކުޅުންތެރިއަކަށް ކުރެވޭނެ ކަމެއް ނޫނެވެ. އެމްބާޕޭ ޔޫރޯއަށް ދަނީ ދުނިޔޭގައި މިވަގުތުހުރި އެންމެ އިތުބާރު އަދި އެންމެ މޮޅު ފޯވަޑްގެ ގޮތުގައެވެ.

2- ކްރިސްޓިއާނޯ ރޮނާލްޑޯ (ޕޯޗުގަލް / އަލް ނަޞްރު)

ކްރިސްޓިއާނޯ ރޮނާލްޑޯގެ އިތުރު ތަޢާރަފެއް އެއްވެސް މީހަކު ބޭނުމެއް ނުވާނެއެވެ. ފީފާ ވޯލްޑްކަޕް ފިޔަވައި، ފުޓުބޯޅައިގާ ރޮނާލްޑޯވަނީ ހުރިހާ ކާމިޔާބެއް ހޯދާފައެވެ. ބެލޮންޑޯ 5 ފަހަރު ހޯދިއެވެ. 2004 ވަނަ އަހަރުން ފެށިގެން މިއަދާއި ހަމައަށްވެސް ރޮނާލްޑޯއަކީ ޔޫރޯ ފުޓުބޯޅަ މުބާރާތުގައިވެސް އެންމެ ގިނަ ގޯލްޖެހި ކުޅުންތެރިއާއެވެ. ގޯލްޖެހުމުގައި ރޮނާލްޑޯގެ އަތުގައި ނެތް ރެކޯޑެއް ނެތެވެ. ހުރިހާ ރެކޯޑެއް ރޮނާލްޑޯވަނީ މުގުރާލާފައެވެ. ގަދަހިތްވަރާއި ހުނަރާއެކު 2004 ވަނަ އަހަރު ބައިނަލް އަޤްވާމީ ފުރަތަމަ ފެނިލުމުން ފެށިގެން މިއަދާއި ހަމައަށްވެސް ރޮނާލްޑޯއަކީ ޕޯޗުގަލްގެ އެންމެ މުހިންމު ކުޅުންތެރިއާއެވެ. ރޮނާލްޑޯ ޕޯޗުގަލްގައި 200 މެޗު ހަމަކުރިއިރު، މިއީވެސް ދުނިޔޭގެ ރެކޯޑެކެވެ. ޗެމްޕިއަންސް ލީގުގެ ތާރީޚުގައިވެސް އެންމެ ގިނަ ގޯލްޖެހި ރޮނާލްޑޯވަނީ ކެރިއަރުގައި 1000 ގޯލް ޖެހުމުގެ އަޒުމެއް އޮތްކަމުގައި ބުނެފައެވެ. ކޮންމެއަކަސް މިފަހަރަކީ ރޮނާލްޑޯގެ ފަހުގެ ފެނިލުންކަމުގައި ޤަބޫލުކުރެވޭއިރު، ޕޯޗުގަލްގެ ޓީމު އެކުޅުންތެރިއަކަށްޓަކައި ބިނާވެފައިވާ ހަމައެކަނި ކުޅުންތެރިއަކީވެސް ރޮނާލްޑޯއެވެ.

3- ޖޫޑް ބެލިންގހަމް (އިންގްލެންޑް / ރެއަލް މެޑްރިޑް)

ބެލިންގްހަމްއަކީ މިފަހުން އިނގިރޭސިވިލާތުގައި ނުއުފެދޭ ފެންވަރުގެ ފުޓުބޯޅަ ކުޅުންތެރިއެކެވެ. ޕައުލް ގެސްކޮއިން، ޕައުލް ސްކޯލްސް، ޑޭވިޑް ބެކަމް، ސްޓީވަން ޖެރަރޑްފަދަ ކުޅުންތެރިންނަށްފަހު، ބެލިންގހަމްއަކީ މުޅި ދުނިޔޭގެ އެންމެ މަތީ ފަންތީގައި ފުޓުބޯޅަކުޅޭ ކުޅުންތެރިއަކަށެވެ. ޚާއްޞަކޮށް، އުމުރުން އެންމެ ހަގުއިރު، ޖަރުމަނުގެ ގަދަފަދަ ބޮރޫޝިއާ ޑޯޓްމަންޑަށް ބަދަލުވެ، އެކްލަބުގައި ތަފާތު ދެއްކިއެވެ. ޖަރުމަންގެ ބުންޑެސްލީގާގެ އެންމެ މޮޅު ފުޓުބޯޅަ ކުޅުންތެރިއާގެ މަޤާމާއި، މިސީޒަނުގެ ލަލީގާގެ އެންމެ މޮޅު ފުޓުބޯޅަ ކުޅުންތެރިއާގެ މަޤާމާއި، ޗެމްޕިއަންސް ލީގުގެ އެންމެ މޮޅު ފުޓުބޯޅަ ކުޅުންތެރިއާގެ މަޤާމު ބެލިންގްހަމްވަނީ ހޯދާފައެވެ. މިއީ، މީގެ ކުރީގައި އިނގިރޭސި ފުޓުބޯޅައިގެ ކުޅުންތެރިއަކަށް ހޯދިފައިވާ ކާމިޔާބެއްނޫނެވެ.

4- ޓޯނީ ކްރޫސް (ޖަރމަނީ)

ޓޯނީ ކްރޫސްއަކީ ޖަރުމަނުގެ އެންމެ މުހިންމު ކުޅުންތެރިއާއެވެ. 34 އަހަރުގެ ތަޖުރިބާކާރު މިކުޅުންތެރިއާއަކީ، މިހާރު ޖަރުމަނުގެ މެދުތެރޭގެ މައިތަނބެވެ. 2012 ވަނަ އަހަރުން ފެށިގެން ޖަރުމަނުގެ ޤައުމީ ޓީމަށް ކުޅެމުން އަންނަ ކްރޫސްއަކީ، 2014 ވަނަ އަހަރުގެ ދުނިޔޭގެ ޗެމްޕިއަންކަން ޖަރުމަނު ހޯދިއިރު، މެދުތެރޭގައި އެންމެ މުހިންމު ރޯލެއް އަދާކުރި ކުޅުންތެރިއާއެވެ. ރެއަލް މެޑްރިޑްގެ ގިނަ ކާމިޔާބުތަކެއް ހޯދުމަށްފަހު، މިފަހަރުގެ ޔޫރޯއަށްފަހު ކްރޫސް އެއްކޮށް ފުޓުބޯޅަކުޅުން ހުއްޓާލާނެކަންވަނީ އިޢުލާނުކޮށްފައެވެ. ފްރާންސްގެ ލެޖެންޑް ޒިދާނަށްފަހު ރެއަލް މެޑްރިޑުގައި ރިޓަޔަރކުރި ހަމައެކަނި ކުޅުންތެރިއަކީ ޓޯނީ ކްރޫސްއެވެ.

5- ލޫކާ މޮޑްރިޗް (ކްރޮއޭޝިއާ / ރެއަލް މެޑްރިޑް)

ކްރޮއޭޝިއާއަށް 170 އަށްވުރެ ގިނަ މެޗު ކުޅެދީފައިވާ ލޫކާ މޮޑްރިޗަކީ މިފަހަރުގެ ޔޫރޯގައި ފެނިގެންދާނެ އެންމެ ތަޖުރިބާކާރު މިޑްފިލްޑަރެވެ. މޮޑްރިޗްވަނީ 2006 ވަނަ އަހަރުގެ ޖަރުމަނުވިލާތުގައި ބޭއްވި ވޯލްޑްކަޕްގައިވެސް ކްރޮއޭޝިއާއަށް ކުޅެދީފައެވެ. މޮޑްރިޗަކީ ކްރޮއޭޝިއާގައި މިހާތަނަށް އުފެދުނު އެންމެ މޮޅު ފުޓުބޯޅަކުޅުންތެރިއާއެވެ. އެކަމާއި ދެބަސްވާނެ އެކަކުވެސް ނުހުންނާނެއެވެ. ރެއަލް މެޑްރިޑްގެ ރަންޖީލާއި ގުޅުނު ފަހުން މޮޑްރިޗްވަނީ ޗެމްޕިއަންސް ލީގުވެސް ޖެހިޖެހިގެން 3 ފަހަރު ހޯދާފައެވެ. މިޑްފީލްޑް މައެސްޓެރޯގެ ނަމުން މަޝްހޫރުވެފައިވާ މޮޑްރިޗްވަނީ 2018 ވަނަ އަހަރުގެ ވޯލްޑްކަޕްގައި ކްރޮއޭޝިއާގެ ފައިނަލަށް ގެންގޮސްފައެވެ. އަދި، ބެލޮންޑޯވެސް 2018 ވަނަ އަހަރު ހޯދާފައެވެ.

6- ކެވިން ޑިބްރައިނާ (ބެލްޖިއަމް / މެންޗެސްޓަރ ސިޓީ)

މެންޗެސްޓަރ ސިޓީއަށް ކުޅެމުން އަންނަ ކެވިން ޑިބްރެއިނޭއަކީ މިވަގުތު ބެލްޖިއަމްގައި ހުރި އެންމެ މުހިންމު ފުޓުބޯޅަ ކުޅުންތެރިއާއެވެ. ބައިނަލް އަޤްވާމީ ފުޓުބޯޅައިގެ ތަޖުރިބާހުރި މިޑްފިލްޑަރގެ ގޮތުގައިހުރެ، މިފަހަރު ބެލްޖިއަމްގެ އެޓޭކުތަށް ބިނާވަނީ ޑިބްރައިނޭ އާއި ހަމައިންނެވެ. ކޯޗު އެންމެ އިތުބާރުކުރާ ކުޅުންތެރިއަކީވެސް ޑިބްރުއިނޭއެވެ. ޖަރުމަނުގެ ބުންޑެސްލީގާ އަދި ޕްރެމިއަރ ލީގުގެ އެންމެ މޮޅު ކުޅުންތެރިއާގެ މަޤާމު ޑިބްރައިނޭ ހޯދާފައިވާއިރު، ޗެމްޕިއަންސް ލީގުގެ އެންމެ މޮޅު މިޑްފިލްޑަރގެ މަޤާމުވެސްވަނީ ހޯދާފައެވެ. ޤައުމީ ޓީމަށް 100 މެޗު ހަމަކޮށްފައިވާ ޑިބްރުއިނާވަނީ، އެންމެ މޮޅު ފުޓުބޯޅަކުޅުންތެރިއާގެ އެވޯޑްވެސް 4 ފަހަރު ހޯދާފައެވެ.

7- ވެންޑައިކް (ނެދަރލޭންޑްސް / ލިވަޕޫލް)

ނެދަރލޭންޑްސްގެ ވެންޑައިކްއަކީ އެޤައުމުގެ ދިފާޢީ މައި ތަނބެވެ. ނެދަރލޭންޑްސް ރަންޖީލަށްފަހު، އެޤައުމުގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ ވެންޑައިކަކީ، އިސްކޮޅުންދިގު ވަރުގަދަ ކުޅުންތެރިއެކެވެ. ޓެކްލްކުރުމާއި، ފުންމައިގެން އަރައި ބޮލުންޖެހުމުގައި ވެންޑައިކްއާއި އެން ފެންވަރެއްގެ އެހެން ޑިފެންޑަރެއް މިވަގުތު ދުނިޔޭގެ ފުޓުބޯޅައިގާ ވަރަށް މަދުވާނެއެވެ. ވެންޑައިކަކީ، މިހާތަނަށް ކުޅުނު ހުރިހާ ކްލަބެއްގެ އެންމެ މޮޅު ކުޅުންތެރިއާގެ މަޤާމު ހޯދާފައިވާ ކުޅުންތެރިއެކެވެ. ކްލަބް ފެންވަރުގައި ލިވަރޕޫލަށް 150 އަށްވުރެ ގިނަ މެޗު ކުޅެދީފައިވާ ވެންޑައިކްވަނީ ބެލޮންޑޯއަށްވެސް ވާދަކޮށްފައެވެ. މިފަހަރު ޔޫރޯގައި ގްރޫޕް ސްޓޭޖުގައި ފްރާންސްގެ ނުރައްކާތެރި އެމްބާޕޭ އާއި ވެންޑައިކުގެ ކުރިމަތިލުން ފެނިގެންދާނެއެވެ.

8- ޖިއަންލުއިޖީ ޑޮންނަރުއްމާ (އިޓަލީ / ޕީއެސްޖީ)

ބުފޯންއަށްފަހު އިޓަލީގައި އުފެދުނު އެންމެ މޮޅު ގޯލްކީޕަރ ޑޮންނަރުއްމާއަކީ މިފަހަރުގެ ޔޫރޯގައި ފެންނާނެ އެންމެ މޮޅު އެއްކީޕަރެވެ. އިޓަލީއާއެކު ޑޮންނަރުއްމާ މިފަހަރު ނިކުންނަނީ ތަށި ދިފާޢުކުރުމުގެ ގޮތުންނެވެ. އެންމެ ފަހުން ބޭއްވި ޔޫރޯގައި އިނގިރޭސިން ބަލިވީ އިޓަލީއަތުން ޕެނަލްޓީ ޖަހައިގެންނެވެ. އެމެޗުގައި ޑޮންނަރުއްމާވަނީ މޮޅު ކުޅުމެއްދައްކައި، ޕެނަލްޓީ ޝޫޓްއައުޓްގައި 2 ޕެނެލްޓީ މަތަކޮށްފައެވެ. އިސްކޮޅުންދިގު މިކީޕަރަކީ، މިވަގުތު ދުނިޔޭގައިހުރި އެންމެ އަގުބޮޑު ކީޕަރެވެ. ލެވްޔެޝިންގެ އެވޯޑް ހޯދާފައިވާ ޑޮންނަރުއްމާވަނީ އިޓަލީއަށް 60 މެޗު ކުޅެދީފައެވެ. އަދި، މިވަގުތު އިޓަލީގައިހުރި އެންމެ ތަޖުރިބާކާރު ކުޅުންތެރިއާގެ ގޮތުގައިހުރީވެސް ޑޮންނަރުއްމާއެވެ.

9- މުޑްރިކް (ޔޫކްރެއިން / ޗެލްސީ)

ޗެލްސީއަށް ކުޅެމުން އަންނަ ޔުކްރެއިންގެ މުޑްރިކަކީ މިފަހަރުގެ ޔޫރޯގައި އެޓީމުގެ އެޓޭކްތަށް ބިނާވެފައިވާ ކުޅުންތެރިއާއެވެ. ޗެލްސީގައި ލިބުނު ތަޖުރިބާއާއެކު ޤައުމީ ޓީމުގައި މުޑްރިކަށް ކޯޗުދީފައިވާ ރޯލަކީ ޔަޤީނުންވެސް އިތުބާރުކޮށްފައި ދީފައިވާ މަޤާމެކެވެ. އުމުރުން، އަހަރުގައި ޔުކްރޭނުގެ ޓޮޕް ސްޓަރައިކަރުގެ ގޮތުގައި މުޑްރިކް މިފަހަރު ޤައުމީ ޓީމާއެކު ފެންނައިރު، އޭނާއަކީ ޔުކްރެއިންގެ އެންމެ މޮޅު ކުޅުންތެރިއާގެ މަޤާމު ހޯދާފައިވާ ކުޅުންތެރިއެކެވެ. އަދި، ޔުކްރެއިންގެ ޒުވާން ކުޅުންތެރިއާއަށް ދޭ ގޯލްޑަން ޓެލެންޓްގެ އެވޯޑް ޖެހިޖެހިގެން 3 ފަހަރު ހޯދާފައިވާ ކުޅުންތެރިއެކެވެ.

10- ޑޮމިނިކް ޒުބޮސްޒްލައި (ހަންގޭރީ / ލިވަޕޫލް)

އުމުރުން 23 އަހަރުގެ ޒުބޮސްޒްލައިއަކީ ހަންގޭރީގެ ޕްލޭމޭކަރ އަދި ކެޕްޓަނެވެ. އެންމެ ފަހުން ބޭއްވި ޔޫރޯ ފުޓުބޯޅަ މުބާރާތުގައި ޤައުމީ ޓީމާއެކު ވިދާލި ޒުބޮސްޒްލައިވަނީ ދުނިޔޭގެ ފުޓްބޯޅައިގެ ސްޓާރަކަށް ވެފައެވެ. ޒުބޮސްޒްލައިވަނީ، ހަންގޭރީގެ އެންމެ މޮޅު ފުޓުބޯޅަ ކުޅުންތެރިއާގެ މަޤާމު ހޯދާފައެވެ. އަދި، މިހާރު ލިވަރޕޫލްގެ މުހިންމު ކުޅުންތެރިއެއްގެ ގޮތުގައި ޒުބޮސްޒްލައިވަނީ ހިމެނިފައެވެ. މިފަހުން ބޭއްވުނު ބައިނަލް އަޤްވާމީ ހުރިހާ ފުޓުބޯޅަ މުބާރާތެއްގައި ވާދަކުރި ހަންގޭރީގެ ޓީމުގައި ޒުބޮސްޒްލައި ހިމެނި ގިނަ ތަޖުރިބާތަކެއް ހޯދާފައިވާއިރު، މިފަހަރުގެ ޔޫރޯގައި ޒުބޮސްޒްލައި ޓީމާއެކު ފެނިގެންދާނީ ޓީމުގެ މައިލީޑަރުގެ ގޮތުގައެވެ.