ރައީސުލްޖުމްހޫރިއްޔާ ޑރ. މުއިއްޒުގެ ކެބިނެޓުގައި އަހުމަދު ޝިޔާމު ހިމެނިވަޑައިގެންނެވި ފަހުން މަސްވެރިންކުރި ކޮންމެ މުޒާހަރާއަކަށް އެމަނިކުފާނު ވަނީ ވަޑައިގަންނަވާފައެވެ. މަސްވެރިންގެ ވާހަކަތަކާއި ކަންބޮޑުވުންތައް އަޑުއައްސަވައި އެވަގުތަކަށް ކޮށްދެވެން ހުރި ކަންކަން ވަނީ ކޮށްދެއްވާފައެވެ.
މަސްވެރިން ކޫއްޑޫގައި ފައިސާއަށް ޑިމާންޑްކޮށް ބޭއްވި ބޮޑު މުޒާހަރާއަށް ޝިޔާމް ވަޑައިގެންނެވީ ރަސްމީ މަސައްކަތެއްގައި އަތޮޅުތެރެއަށް ވަޑައިގެން ކުރައްވަމުން ގެންދެވި މަސައްކަތްތައް މަޑުޖައްސާލައްވާފައެވެ. އެފަހަރުވެސް މަސްވެރިން ގާތަށް ވަޑައިގެންނެވީ ފުލުހުންގެ ރަައްކާތެރިކަމާއެކުގައެެވެ. ހަމަ އެގޮތަށް އިއްޔެ މާލޭ ފަޅުތެރޭގައި މަސްވެރިން ކުރި ވަރުގަދަ މުޒާހަރާއަށް ވެސް މިނިސްޓަރު ވަޑައިގެންނެވިއެވެ. ހަމަ ފުލުހުންގެ ހިމާޔަތުގައެވެ. އިއްޔެވެސް ޝިޔާމް ވަނީ މުޒާހަރާގެ ބައިވެރިންގެ އަޑުއައްސަވައި ކަންކަން ހައްލުކޮށްދެއްވުމަށް މަސައްކަތްކުރައްވާނެ ކަމުގެ ޔަގީންކަން މަސްވެރިންނަށް ދެއްވާފައެވެ.
މަސްވެރިންނަށް ވިއްކާތެލުގެ އަގު މިއަދު ހެޔޮކޮށްފައި ވަނީ އިއްޔެ އެކަމަށް މަސައްކަތްކޮށްދެއްވާނެ ކަމަށް މިނިސްޓަރު ވިދާޅުވެފައި ވަނިކޮށެވެ. މަސްވެރިންނަށް ދޭން ޖެހޭ ފައިސާ ނުދެވިގެން އުޅެނީ މިފްކޯގެ މާލީ ހާލަތު ގޮސްކަމުން ކަމަށް ވެސް އިއްޔެ މިނިސްޓަރު ވިދާޅުވިއެވެ. އަދި މިފްކޯއަށް، ރައީސުލްޖުމްރިއްޔާގެ ވަޢުދާ އެއްގޮތަށް ކަންނެލި މިއަހަރު ގަނެގެވެން ނެތްކަންވެސް އިއްޔެ މިނިސްޓަރު ވިދާޅުވެފައިވެއެވެ.
ބޮޑުކަންނެލި މަސްވެރިންގެ ޔޫނިންއަނުންގެ އެންމެ ބޮޑު ކަންބޮޑުވުމަކީ ލޭނު މަސްވެރިކަމަށް، ކުންފުނިތަކަށް ހުއްދަދީފައިވާކަމަށް ބުނާ ވާހަކައެވެ. އެގޮތުން ދާ އަޅައިގެން ލޭނު މަސްވެރިކަން ކުރާނަމަ ބޮޑު ކަންނެލި މަސްވެރިކަން ކުރަމުންދާ ފަރާތްތަކަށް ގެއްލުންތަކެއް ވާނެ ކަމަށް އެ މަސްވެރިން ފާހަގަކުރިއެވެ. މިނިސްޓަރު އިއްޔެ ވިދާޅުވީ ބޮޑުކަންނެލީގެ މަސްވެރިންގެ މަސްލަހަތު ގެއްލޭގޮތަށް ލޭނު މަސްވެރިކަމަށް ސަރުކާރު ފުރުސަތު ނުދެއްވާނެ ކަމަށެވެ.
އެ ޔޫނިއަނުން އިޙްތިޖާޖުކުރަމުންދިޔަ ސަރަޙައްދަށް ވަޑައިގެން މަސްވެރިކަމާބެހޭ ވަޒީރު ވަނީ މަސްވެރިންގެ ހުރި ކަންބޮޑުވުންތައް އަޑުއައްސަވާފައެވެ. މަސްވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވީ، އެފަދަ އެއްވެސް ހުއްދައެއް މިހާތަނަށް ސަރުކާރުގެ އެއްވެސް އިދާރާއަކުން ދީފައި ނުވާނެ ކަމަށެވެ. ވަޒީރު ވިދާޅުވީ "ސަރުކާރުން އަބަދުވެސް އިސްކުރާނީ މަސްވެރިންގެ މަސްލަހަތު"ކަމަށެވެ.
"ކަންނެލި މަސްވެރިކަން ކުރާ ފަރާތްތަކަށް އޭގެ އެންމެ ބޮޑު އަސަރެއް ކުރާ ކަމަށްވަންޏާ ކަންނެލި މަސްވެރިންގެ މަސްލަހަތު ހިމާޔަތް ނުކުރެވޭ ގޮތަށް ނޫނީ އަޅުގަނޑުމެންގެ ސަރުކާރެއްގައި އެކަހަލަ އެއްވެސް ކަމެއް ނުހިނގާނެ " ވަޒީރު އަޙްމަދު ޝިޔާމް ވިދާޅުވިއެވެ.
ވަޒީރު ވަނީ ސަރުކާރުން ކަންނެލި މަސްވެރިންނަށް ވެފައިވާ ވަޢުދު ވެރިކަމުގެ ކުރީކޮޅުގައި ފުއްދުމަށް މަސައްކަތް ކުރަމުންދާކަމަށް ވިދާޅުވެފައެވެ. އެގޮތުން މިފްކޯއަށް މިއަހަރު ކަންނެލި މަސް ގަނެވޭ ހާލަތުގައި އެކުންފުނި ނެތްކަން ފާހަގަކުރައްވާ ވަޒީރު ވަނީ ކުންފުނިތަކުން މާލީ ހާލަތު ރަނގަޅު ކުރަން މަސައްކަތް ކުރަމުންދާކަމަށް ވިދާޅުވެފައެވެ.
"މިފްކޯއަށް ސަބްސިޑީ ނުދީ ކަޅުބިލަމަހުގެ މަސްވެރިކަން ކުރެވޭނެ ގޮތަކަށް މަސައްކަތް ކުރަމުން މިދަނީ. ސަރުކާރުގެ އަމާޒަކީ ފުރަތަމަ ތިން އަހަރުގެ ތެރޭގައި. ސަބްސިޑީ ނުދީ ވާނެ ގޮތަކަށް މިފްކޯގެ ހިނގުން ހަރުދަނާ ކުރުން." މަސްވެރިކަމާ ބެހޭ ވަޒީރު ވިދާޅުވިއެވެ.
މަސްވެރިންގެ ކަންބޮޑުވުންތަކަށް ވަޒީރު ވަނީ ވަކިވަކިން ޖަވާބު ދެއްވާފައެވެ. މިގޮތުން ހެޔޮއަގުގައި ތެޔޮ ލިބުމުގައިހުރި ދަތިތައްވެސް އެސްޓީއޯއާއި މަޝްވަރާކުރައްވައިގެން ހައްލުކޮށްދެއްވާނެކަމުގެ ޔަޤީންކަން މަސްވެރިކަމާ ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވަނީ ދެއްވާފައެވެ.
މުޒާހަރާގެ ބައެއް ބައިވެރިން ބުނިގޮތުގައި މުޒާހަރާއަކަށް ދިއުމުން ފިޝަރީޒް މިނިސްޓަރު ކޮންމެ ފަހަރު ވަޑައިގެން މަސްވެރިންގެ ކަންބޮޑުވުންތައް ބެއްލެވުމުގެ ބަދަލުގައި މުޒާހަރާއާ ހިސާބަށް ދިއުމުގެ ކުރިން ކަންކަން ހައްލުކުރައްވަން އިސްކަން ދެއްވަން ޖެހެއެވެ.
"ކޮންމެ ފަހަރަކު ކަމެއް ހައްލުކުރަން މިޖެހެނީ މުޒާހަރާ ކޮށްގެން. މިނިސްޓަރު އަހަރުމެންނާ ހަމައަށް ކޮންމެ ފަހަރަކުވެސް ވަޑައިގަންނަވާތީ އުފާކުރަން. މިކަމުން އެނގެނީ ޒިންމާއިން ރެކިވަޑައިނުގަންވާނެކަން. އެކަމަކު ވައުދުވި ގޮތަށް މަސްވެރިންގެ ކަންކަން ހަމަޖެއްސުމުގައި މުޒާހަރާއަކާ ހަމައަށް ނުދަނީސް ކަމާބެހޭ ފަރާތްތަކުން އުޅެން އެބަޖެހޭދޯ. ކޮންމެ ފަހަރު މުޒާހަރާކުރުމަކީ ހައްލެއްނޫން،" އިއްޔެގެ މުޒާހަރާގައި އިއްޔެ އިސްކޮށް ހަރަކާތްތެރިވި ކެޔޮޅަކު ބުންޏެވެ.
