ހިތުގެ އުދާސް: ބޮޑު އީދުގައި ބޮޑު ނުތަނަވަސްކަމެއް

އަހަރެން ރައްޓެހިންގެ ގްރޫޕަކާއެކު އެރަށް ދިޔައީ ބޮޑު އީދުގެ ޗުއްޓީއަށެވެ. އަހަރެމެން ތިބީ ގެސްޓް ހައުސްއަކުން ކޮޓަރި ކުއްޔަށް ހިފައިގެންނެވެ.

އެރަށަށް ދެވުނީ ހައްޖު ދުވަހުގެ ރެއެވެ. ދަތުރު ވަރުބަލިކަމުގައި އެންމެންވެސް ރޭގަނޑު ކައިގެން ނިދީީއެވެ.

އީދު ނަމާދުކޮށްގެން އަހަރެމެން ދިޔައީ ރައްޔިތުންގެ ސަޔަށެވެ. އެތަނުން އަހަރެންގެ ލޮލުގައި އަޅައިގަތީ ކޮންފަދަ ރީތި އަންހެން ކުއްޖެއް ހެއްޔެވެ؟ ބޯކިބާކޮޅެއް ތައްޓަކަށްލައިގެން މަޑުމަޑުން ގޮސް އެކުއްޖާ ގާތު ހުއްޓުނީމެވެ. އަދި ތަޢާރަފުވެލީމެވެ. އެކުއްޖާ ނަން ބުނުމުގެ އިތުރުން އެއްވެސް ވާހަކައެއް ނުދެއްކިއެވެ. ރަކި ގޮތަކަށް ހިނިތުންވެފައި ހުރީއެވެ. އެކަމަކު ދުރަކަށް ނުދެއެވެ.

ހަމަ އެދުވަހުގެ މެންދުރެވެ. ރަށުގެ ކުޅިވަރުތައް ބަލާލަން ނުކުތް ވަގުތު އަނެއްކާވެސް އެއްކަހަލަ ކުއްޖާއެވެ. މިފަހަރު ހުރީ ރުކެއްގެ ހިޔަލުގައި ކުޅިވަރުބަލާށެވެ. ގިނަ އަދަދެއްގެ އަންހެނުންނާއެކީއެވެ. އަަހަރެން ގޮސް ހުއްޓުނީ އޭނާއަށް އަހަރެން ފެންނަ ހިސާބުގައެވެ. އަހަރެން އޭނާއަށް އަތުން ހަނާއަޅާލީމެވެ. ބަލާލިއެވެ. ހީލިއެވެ. އަހަރެންނަށް ހިތްހަމަ ޖެހުނެވެ.

ސ. އަހަރެން ވަގުތުގެ ބޭނުން ހިފީމެވެ. އެތަނަށް އަހަރެން ގޮސް އަންހެންވެރިންގެ ތެރޭގައި މަޑުކޮށްލީމެވެ. އެކުއްޖާއާ ވާހަކަ ދެއްކޭތޯ ވަރަށް މަސައްކަތްކުރީމެވެ. ހަތަރު ސުވާލުކުރިއިރުވެސް އެއްވެސް ސުވާލަކަށް ޖަވާބެއް ނުދިނެވެ. އެތާ ތިބި ބައެއް މީހުންނާ ވާހަކަ ދައްކާލުމުން އެނގުނީ އޭނާއަކީ މާލޭގައި ނަރުސްކަން ކިޔަވަމުން އަންނަ ކުއްޖެއް ކަމެވެ. އަދި މިހާރު ހުރީ މީހަކާ އިންނަން ތައްޔާރުވެފައި ކަމަށްވެސް ބުންޏެވެ. އަދި އެ ފިރިހެން ކުއްޖަކީ ރަށުގެ ވަރަށް ނުފޫޒު ފަދ އާއިލާގެ ކުއްޖެއްކަން ވެސް އެނގުނެވެ.

ހަވީރު އަހަރެން އެ ކުއްޖާގެ ގެ ހޯދައިގެން އެގެއަށް ދިޔައިމެވެ. ބައްދަލުވީ އެކުއްޖާގެ މައިންބަފައިންނާއެވެ. އެކުއްޖާހުރީ ފެންވަރާށެވެ. އެއީ ވަރަށް ހިތްހެޔޮ ބައެކެވެ. ދަރިފުޅު ނިކުންނަން ދެން ގޯތި ތެރޭގައި ހުރި ޖޯލިފަރީގައި މަޑުކޮށްލަން ދައުވަތުދިނެވެ. އަދި ކުރުނބާ ފަނި ތައްޓަކާ ދުރާ އެއްޗެހިވެސް ގެނެސްދިނެވެ.

ބައިގަޑިއެއްހާއިރު ފަހުން އެކުއްޖާ އަހަރެންގެ އިން ޖޯލިފަތި ކައިރިއަށް އައިިސް ވާހަކަ ދައްކަން ފެށިއެވެ. އަހަރެން ހިތް ބާރަށް ތެޅެން ފެށިއެވެ. ކުއްޖާއާ އެއްވަރަށް އަޑުވެސް ރީއްޗެވެ. އަސަރު ގަދައެވެ. އެކުއްޖާ ބުނީ އޭނާ މީހަކާ އިންނަން މި އީދުގަައި ރަން ކިިޔާނެ ކަމަށާއި އެދެނީ އިތުރަށް އުނދަގޫ ނުކުރުމަށެވެ.

އަހަރެން ބުނީމެވެ. ރައްޓެއްސެއްގެ ގޮތުގައި ތިބެމާ ހެއްޔެވެ؟ އޭނާ އިންކާރުކުރިއެވެ. ސަބަބެއް ކަމަށް ބުނީ އޭނާގެ ވާން އުޅޭ ފިރިމީހާ ނުރުހޭނެތީއެވެ. ދެ ދުވަސް ފަހުން އޭނާ ރަށަށް އެބަ އަންނަ ކަމަށާއި އަދި އަންނަ ގޮތަށް ދެމީހުން އެންގޭޖްވާނެކަމަށް ބުނުމުން ނުތަނަސްވީ މާބޮޑަށެވެ.

އޭގެ ފަހުން އަަރެންގެ މޫޑެއް ނެތެވެ. ރައްޓެހިންނަށް މިކަން ފާހަގަވެގެން ޒާތްޒާތުގެ ސުވާލުތައް ކުރިމަތިވާން ފެށިއެވެ. އަހަރެން ހަމަ އެކައްޗެކޭވެސް ނުބުނަމެވެ. އަހަރެންގެ ސިކުނޑީގައި އެނޫން އެއްވެސް ވިސްނުމެއް މިހާރަކު ނެތެވެ. އެކުއްޖާގެ ހިނިތުންވުމެވެ. ރީތި އިސްކޮޅެވެ. ފުރިހަމަ ހަށިގަނޑެވެ. ރީތި އަޑެވެ.

އަހަރެން އޭނާ ބޭނުމެވެ. ކޮންމެ ގޮތެއް ހަދާފަވެސް އޭނަ ކާމިޔާބުކުރަން ބޭނުމެވެ. އެކަމަކު ހަދާނީ ކިހިނެއް ހެއްޔެވެ؟ އޭނާ އެހުރީ މީހަކާ އިންނަން އަދުތޯ މާދަން ވެފައެވެ.

މިކަމާ އަހަރެން ހަދާނެ ގޮތެއް ބުނެދީބަލާށެވެ. ޕްލީޒް—-ހަސަން

ޖ. ހަސަންއެެވެ. ތިހާލަތުގައި ގިނަ މީހުންނަށް ތިފަދަ އިހްސާސް ކުރެވޭނެއެވެ. އެކަމަކު ވިސްނަބަލާށެވެ. އޭނާ އެހުރީ އޭނާގެ ދިރިއުޅުމުގެ ބައިވެރިއާ ހޯދައިގެންނެވެ. އޭނާގެ އުފަލަކީއެވެ. އޭނާ ރުޅި ނައިސް ހަސަންއަށް ވިސްނައިދީފި ނޫން ހެއްޔެވެ؟ އޭނާއަށް އިހްތިރާމްކޮށް ލޯބިވުމަކީ އޭނާގެ ލޯބި އޭނާއަށް ލިބުމަށް އެދުމެވެ. ހިތް ނުރުހުނަސް އެހަގީގަތާ ކުރިމަތިލާށެވެ. މިފަހަރު މާބޮޑަށް ލަސްވެއްޖެއެވެ. އަދިވެސް ހަސަންއަށް އެފަދަ އެހެން ކުއްޖަކު ވީއެންމެ އަވަހަކަށް ލިބުމަށް އަހަރެން އެދެމެވެ. އަހަރެންގެ ނަސޭހަތަކީ އެކުއްޖާ އެކުއްޖާގެ ދިރިއުޅުމައިގެން ދޫކޮށްލާށެވެ. އާކުއްޖަކު ހޯދާށެވެ. އާ ލޯތްބެއް ހިތުގައި އާލާކުރުވާށެވެ. ދިރުން ހުރީީ އެގޮތުގައެވެ. —-ޕްރިންސް