ހުޅުމާލެ ފޭސް ދޭއްގެ އުތުރުގައި ތަރައްޤީކުރުމަށް ނިންމި އަސޭރިއާ ހޯމްސް އެންޑް ޓައުން ހައުސް މަޝްރޫޢުގެ ބިންގާ މިއަދު ހަވީރު އަޅައިފިއެވެ.
މިކަމަށްޓަކައި ބޭއްވި ރަސްމިއްޔާތުގައި އަސޭރިއާ މަޝްރޫޢުގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާގެ ނައިބު ހުސައިން މުޙައްމަދު ލަތީފެވެ. އަސޭރިއާ ހޯމްސް އެންޑް ޓައުން ހައުސް މަޝްރޫޢު އަކީ ބެޗް ކޮންސްޓްރަކްޝަނާއި އެޗްޑީސީ ގުޅިގެން ކުރިއަށްގެންދާ މަޝްރޫޢުއެކެވެ.
މި މަޝްރޫޢުއަކީ 2022 ވަނަ އަހަރު ކުރިއަށްގެންދިއުމަށް ނިންމި މަޝްރޫޢުއެއް ނަމަވެސް އެކިއެކި ސަބަބުތަކާހެދި މަޝްރޫޢުގެ މަސައްކަތް ވަނީ މަޑުޖެހިފައެވެ. އަސޭރިއާ މަޝްރޫޢުގެ ދަށުން ތިން ބާވަތެއްގެ ހައުސިން ޔުނިޓްތައް އެޅުމަށް ވަނީ ހަމަޖެހިފައެވެ.
އޭގެ ތެރޭގައި ހިމެނެނީ ބީޗް ވިލާގެ ގޮތުގައި 37 ޔުނިޓް، އާބަން ވިލާގެ ގޮތުގައި 22 ޔުނިޓް އަދި ގާޑަން ވިލާގެ ގޮތުގައި 14 ޔުނިޓެވެ.
މި މަޝްރޫޢުގެ މަސައްކަތް ނިންމުމަށް ހަމަޖެހިފައިވަނީ 3 އަހަރުދުވަހުގެ ތެރޭގައެވެ.
