އެމެރިކާގެ ކުރީގެ ރައީސް ޑޮނަލް ޓްރަމްޕް ރަސްމީ ހައިސިއްޔަތުން ކުރެއްވި އެއްވެސް ކަމަކާ ގުޅިގެން އޭނާގެ މައްޗަށް ޖިނާއީ ދައުވާ ނުކުރެވޭނެ ކަމަށް އެ ގައުމުގެ ސުޕްރީމް ކޯޓުން މިއަދު ހުކުމްކުރުުމުން އެމެރިކާގެ މިހާރުގެ ސަރުކާރުން އެކަން ސިފަކުރަނީ "ވަކިި މީހަކަށް ވަކި މަގުސަދެއް ހާސިލްކޮށްދިިނުމަށް ކޯޓުން ކޮށައިދިން މަގެއް"ގެ ގޮޮތުގައެވެ. އެއީ މި ހުކުމާ އެކު، ރިޔާސީ އިންތިހާބުގެ ކުރިން ޓްރަމްޕުގެ މައްސަލަތައް އަލުން ފެށޭނެ ކަމަކަށް ނުބެލެވޭތީއެވެ.
އުމުރުން 78 އަހަރުގެ ޓްރަމްޕް ވިދާޅުވީ މި ހުކުމަކީ އެމެރިކާގެ ގާނޫނުއަސާސީ އާއި ޑިމޮކްރަސީއަށް ލިބުނު ބޮޑު ކާމިޔާބީއެއް ކަމަށެވެ. އަނެއްކޮޅުން ރައީސް ޖޯ ބައިޑެންގެ ކެމްޕެއިނުން ވަނީ ޓްރަމްޕަކީ ގާނޫނުތަކަށް ވުރެ މަތީގައި ހުންނަވާ ބޭފުޅެއް ކަމަށް އޭނާއަށް އަދިވެސް ހީވާ ކަމަށެވެ.
ސުޕްރީމް ކޯޓުގެ 6 ފަނޑިޔާރަކު ތާއީދުކުރެއްވި އަދި ތިން ފަނޑިޔާރަކު ރައުޔު ތަފާތުވި ހުކުމުގައި އުއްތަމަ ފަނޑިޔާރު ޖޯން ރޮބަޓްސް ވިދާޅުވެފައިވަނީ ރައީސް ހުންނަވާނީ "ގާނޫނަށް ވުރެ މަތީގައި ނޫން" ކަމަށާއި އެކަމަކު މަގާމުގައި ހުންނަވައިގެން ކުރައްވާ ރަސްމީ އަމަލުތަކާ ގުޅިގެން ޖިނާއީ އެއްވެސް ދައުވާއެއް ނުކުރެވޭނެ ކަމަށެވެ. ނަމަވެސް ވިދާޅުވީ ރަސްމީ ހައިސިއްޔަތުގެ ބޭރުން ކުރައްވާ ކަންކަމަށް މި ހިމާޔަތް ނުލިބޭނެ ކަމަށެވެ.
ރައީސަކު ރަސްމީ ބާރުތަކުގެ ބޭރުން ކުރައްވާ ކަމަކަށް ހިމާޔަތެއް ނޯންނާނެ ކަމަށް ހުކުމުގައިވެ އެވެ. އެހެންވެ، ޓްރަމްޕާ ދެކޮޅު ދައުވާތަކުގެ ތެރެއިން ރަސްމީ ބާރުތައް ބޭނުންކުރުމާ ގުޅޭ ދައުވާތަކާއި އެ ނޫން ދައުވާތައް ދަށު ކޯޓުން ކަނޑައަޅަން ޖެހޭނެ އެވެ.
ކޯޓުގެ މި ދައުރުގެ އެންމެ ފަހު މައްސަލައިގެ ގޮތުގައި ކުރި މި ހުކުމުން މި އެގްޒެކެޓިވް ބާރުތަކާއި ރިޔާސީ އިންތިހާބުގެ ރޭހަށް ދުރުރާސްތާގެ އަސަރުތަކެއް ކުރިއަށް އޮތް ތަނުގައި ކުރާނެ ކަމަށް ބެލެވެ އެވެ.
