އެމްއެމްޕީއާރްސީ ފަދަ މައްސަލަތަކުގެ ތެރެއިން ގެއްލިފައިވާ ރައްޔިތުންގެ ފައިސާ އަނބުރާ ހޯދުމަށްޓަކައި އެކަމުގައި ޝާމިލުވާ މީހުންނަށް ހައްގު އަދަބުދީ ކުރަން ޖެހުނު ކޮންމެ ކަމެއްވެސް ކުރައްވާނެ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ ޖަލްސާގައި ވާހަކަ ދައްކަވަމުން ރައީސް ޑރ މުއިއްޒުވަނީ ދިވެހިރާއްޖޭގެ މާލީ ކަންކަން ހަރުދަނާ މަގަކަށް އެޅުއްވުމުގެ ގޮތުން ގިނަ މަސައްކަތްތަކެއް އިންތިޒާމު ކުރައްވާފައި ވާކަން ހާމަކުރައްވާފައެވެ. އެމަނިކުފާނު ވިދާޅުވީ، ޕީއެންސީއިން ގެނައުމަށް ވައުދުވެފައިވާ ގޮތުގެ މަތިން ހުރިހާ އިސްލާހުތަކެއްވެސް ގެންނާނެކަމަށެވެ. އަދި އެ އިސްލާހުތައް ގެނައުމުން ބަޖެޓުން ވަރަށް ބޮޑު ތަނެއް ސަލާމަތް ކުރެވި އުފާ ފާގަތިކަން ރައްޔިތުންނަށް ލިބިގެންދާނެކަމަށް ވިދާޅުވިއެވެ.
އެމަނިކުފާނު ވިދާޅުވީ، އެކަންކަމާއި އެކު ރައްޔިތުންގެ ފައިސާއިން ގެއްލިފައިވާ ފައިސާވެސް ހޯދައިދޭންޖެހޭކަމަށެވެ. ރައީސް މުއިއްޒު ވިދާޅުވީ، ކޮރަޕްޝަންގެ އަމަލުތައް ހިންގައިގެން ރައްޔިތުންގެ ފައިސާއިން ކޮށްފައިވާ ވައްކަންތައް ބަލާ ހަގީގީ އިހުލާސްތެރި ގޮތެއްގައި އެ މައްސަލަތައް ކުރިއަށް ގެންދަންޖެހޭކަމަށެވެ.
ރައީސް ވިދާޅުވީ، ވައްކަން ކުރި މީހުންނަށް ދޭންޖެހޭ އަދަބު ދީ އެސެޓުތައް އަނބުރާ ހޯދެން ޖެހޭކަމަށާއި އަބަދާއި އަބަދު ދައްކާ ވާހަކައެއް ނުވަތަ ދަޅައަކަށް ވެގެން ނުވާނެކަމަށެވެ. އެމަނިކުފާނު ވިދާޅުވީ ކޮންމެ ފަހަރަކުވެސް ރިޔާސީ ކޮމިޝަނެއް ހަދައިގެން ބަޔަކަށް މުސާރަ ދޭކަމަށާއި ތަނެއް ހިފައި ކުލީގެ ގޮތުގައިވެސް އެތައް ސަތޭކަ މިލިއަނެއް ހަރަދުވެގެންދާކަމަށް ހިއްސާކުރެއްވިއެވެ.
އެހެންނަމަވެސް ފައިސާ އަނބުރާ ނުހޯދޭކަމަށާއި ގެއްލުނު ފައިސާ ދައުލަތުގެ ހަޒާނާއަށް އަނބުރާ ނުގެނެސްދެވޭކަމަށްވެސް ވިދާޅުވިއެވެ. ރައީސް ވިދާޅުވީ، ވައްކަން ކުރި ފައިސާ އަނބުރާ ނުލިބޭކަމަށާއި މި ދައުރުގައި އެކަން ނިމުމަކަށް ގެނެސްދެއްވާނެކަމަށްވެސް ފާހަގަކުރެއްވިއެވެ.
ރައީސް ވިދާޅުވީ، އެސެޓް ރިކަވަރީއަށް ހާއްސަ ގާނޫނެއް ހެދުމުގެ މަސައްކަތްތައް ފެށިފައިވާކަމަށާއި އެހެންކަމުން ކުރިއަށް އޮތް ދުވަސްތަކުގެ ތެރޭގައި އެ މަސައްކަތްތައް ކުރުމަށްޓަކައި މަޖިލީހަށް ހުށައަޅުއްވާނެކަމަށްވެސް ވިދާޅުވިއެވެ،.
ރައީސް ވިދާޅުވީ، މިހާރު ހުރި ގާނޫނުތަކުން އެކަން އެކަށީގެންވާ ގޮތެއްގެ މަތިން ނުކުރެވޭކަމަށެވެ. އެެހެންކަމުން ދައުލަތުގެ މުދާ ނަހަމަ ގޮތުގައި ވިއްކައިގެން ކުޑަ ފައިދާއެއް ހޯދުން ފަދަ ކަންކަން ކޮށްފައިވާ މީހުންގެ އަތުން އެ ފައިސާތައް ރިކަވާރކޮށް ރައްޔިތުންނަށް ފައިދާއެއް ލިބިގެންދާނެ މަގު ފަހިވެގެންދާނެކަމަށާއި ރާއްޖެއިން ބޭރުގައި ރައްކައުކޮށްފައި ހުރި ރައްޔިތުންގެ ފައިސާވެސް ހޯދުމުގައި މިހާރަށްވުރެ ކާމިޔާބު މަސައްކަތްތަކެއް ކުރެވޭނެ ބައިނަލްއަގުވާމީ މިންގަނޑުތަކަށް ފެތޭ ގޮތެއްގެ މަތިން ކަންކަން ހުރި ގޮތް ބަލައިގެން ކުރިއަށް އޮތް ދުވަސްތަކުގެ ތެރޭގައި ބިލު ފަރުމާކުރެވިގެންދާނެކަމަށް މައުލޫމާތު ދެއްވިއެވެ.
ރައީސް ވިދާޅުވީ، އޭރުން ރާއްޖޭގައި ވައްކަން ކުރުމަށްފަހު ރައްކައުކޮށްފައި ހުރި ފައިސާގެ އިތުރުން ރާއްޖެއިން ބޭރަށް ގެންގޮސްފައިވާނަމަ އެފައިސާއެްވެސް ހޯދޭނެކަމަށެވެ. ރައީސް ވިދާޅުވީ މި ފިޔަވަޅުތައް އެޅުއްވުމަށް ކަންބޮޑުނުވާކަމަށާއި ބޭނުންވެވަޑައިގަންނަވަނީ ރައްޔިތުންނަށްޓަކައި އެ ފައިސާތައް އަނބުރާ ހޯދަންކަމަށްވެސް ވިދާޅުވިއެވެ.
މިގޮތުން ބަލާއިރު އެންމެ ބޮޑު މައްސަލައަކީ އެމްއެމްޕީއާރްސީގެ މައްސަލަ ކަމަށާއި ކޮންމެ މީހެއްކަމަށްވީނަމަވެސް އެ މީހަކަށް ދޭންޖެހޭ ހައްގު އަދަބު ދީ އެ ފައިސާ ހޯދުމަށްޓަކައި ކުރަންޖެހޭ ކޮންމެ ކަމެއްވެސް ކުރައްވާނެކަމަށް ވިދާޅުވިއެވެ. އެމަނިކުފާނު ވިދާޅުވީ އެކަމުގައި ބައިވެރިވިކަމަށް ސާބިތުކުރެވެން ޖެހޭނީ އިންސާފުވެރި ގޮތަކަށް ކަމަށެވެ. އަދި ވައްކަމުގައި ބައިވެރިވި ކޮންމެ މީހެއް ކަމަށްވާނަމަވެސް އެކަން ކުރެވެންޖެހޭނީ އިންސާފުވެރިކަމާއިއެކު ކަމަށް ވިދާޅުވިއެވެ.
