ގދ. ތިނަދޫ އަށް ކުރިމަތިވެފައިވާ ފެންބޮޑުވުމުގެ މައްސަލަ ހައްލު ކުރުމުގެ ގޮތުން ސަރުކާރުގެ ފަރާތުން ތިނަދޫގައި ގާއިމުކުރި ފެން ހިންދާ ނިޒާމް ތިނަދޫ ސިޓީ ކައުންސިލާ ހަވާލުކުރުމަށް އެއްބަސްވުމެއްގައި މިއަދު ސޮއި ކޮށްފިއެވެ.
ސަރުކާރުގެ ފަރާތުން ސޮއި ކުރެއްވީ މިނިސްޓަރ އޮފް ކްލައިމެޓް ޗޭންޖް އެންވަޔަރަންމަންޓް އެންޑް އެނަރޖީ، ގެ މިނިސްޓާ ތާރިގު އިބްރާހީމެވެ. އަދި ތިނަދޫ ކައުންސިލްގެ ފަރާތުން މި އެއްބަސް ވުމުގައި ސޮއި ކުރެއްވީ ތިނަދޫ ސިޓީ ކައުންސިލްގެ މޭޔަރ ސައުދު އަލީއެވެ.
މި ރަސްމިއްޔާތިގައި ވާހަކަދައްކަވަމުން މިނިސްޓާ ތާރިގް ވިދާޅުވީ، ފެން ހިންދާ ނިޒާމެއް ތިނަދޫގައި ގާއިމުކުރުމުގެ މައިގަނޑު މަގްސަދަކީ ބޯކޮށް ވާރޭ ވެހުމުގެ ސަބަބުން ރަށުގައި ފެންބޮޑުވެ ރަށުގެ ރައްޔިތުން އުފުލަމުންދިޔަ ތަކުލީފުތަކަށް ހައްލެއް ހޯދައިދިނުމަށާއި، އެފަދަ ކާރިސާތަކުންރަށަށް ލިބޭ ގެއްލުންތައް މަދުކުރުމަށް ކަމަށެވެ.
މިނިސްޓަރ ތާރިގް ވިދާޅުވީ، ތިނަދޫ އަކީ ޒަމާނުންސުރެ ރަށުގައި ފެންބޮޑުވުމުގެ މައްސަލަ ދިމާވާ ރަށެއްކަމާއި، މެދުނުކެނޑި ބޯކޮށް ވާރޭވެހުމުންމަގުތަކުގައި ފެންބޮޑުވުމުގެ ސަބަބުން އެސަރަހައްދުތަކުގެ ގެތަކުގައި ދިރިއުޅޭ ރައްޔިތުންނަށާއި ހިނގާބިނގާވެ އުޅޭ އާންމުންނާއި،ސްކޫލަށްދާ ދަރިވަރުންނަށާއި ބެލެނިވެރިންނަށް ގިނަ ދަތިތަކާއި ކުރިމަތިލާން ޖެހޭކަމަށެވެ. އަދި އާންމުންގެ މުދަލަށާއި، ގޯތިގެދޮރަށަށް ތަފާތު އެކި ގެއްލުންތައް ލިބި، ރަށުގެ މަގުތަށް ޗަކަވެ މީހުންނާއި ދުއްވާ އުޅަދުތަކަށް އެތަށް އުނދަގުލެއް ދިމާވާކަން ފާހަގަކުރައްވާ މިނިސްޓަރ ވަނީ މި މަޝްރޫއުން އާއްމުންނަށް ލިބިގެންދާނެ ފަސޭހަތަކަށް އަލިއަޅުވާލައްވާފައެވެ.
ތިނަދޫގެ ފެން ހިންދާ ނިޒާމުގެ މަސައްކަތް ކުރިއަށް ގެންދެވިފައިވަނީ މިނިސްޓްރީ އޮފް ފިނޭންސް މެދުވެރިކޮށް އާންމުކޮށްބީލަމަށް ހުށަހަޅާ އުސޫލުންނެވެ. އަދި މި ޕްރޮޖެކްޓްގެ ސުޕަވިޒަންކޮންސަލްޓެންޓެއްގެ ގޮތުގައި މަސައްކަތްކޮށްފައިވަނީ ރިއަން ޕވޓލޓޑ ކުންފުނިން ނެވެ.
މި ނިޒާމު ގާއިމުކުރުމުގެ އަމަލީ މަސައްކަތް ކުރިއަށް ގެންގޮސްފައިވަނީ ސެނޮކް ޓްރޭޑް ކޮމްބައިން ޕވޓ ލޓޑ އާ ހަވާލުކޮށްގެންނެވެ. މި މަޝްރޫއުގެ ޖުމްލަ އަގަކީ 48.3 މިލިއަން ރުފިޔާއެވެ.
