މިއަހަރުގެ މިހާތަނަށް މާލޭގެ މަގުމައްޗާއި ގޯޅިތަކާއި ހުސްބިންތަކަށް ކުނި އަޅައިގެން 6،560 މައްސަލަ މާލޭ ސިޓީ ކައުންސިލަށް ރިޕޯޓުކޮށްފިއެވެ.
މާލޭ ސިޓީ ކައުންސިލުން ރޭ އާންމުކުރި ރިޕޯޓުގައިވާ ގޮތުން މި އަހަރުގެ ތެރޭގައި މާލޭ ސިޓީ ކައުންސިލުން ވަނީ 2،359.2 ޓަނުގެ ކުނި ނަގާ، 6،475.1 ޓަނުގެ ކުނި އުކާލާފައެވެ.
މާލޭގެ މަގުމައްޗަށް ކުޅި އަޅާ މައްސަލަ މި ފަހުން ބޮޑުވެގެން ސިޓީ ކައުންސިލުން ވަނީ ފުލުހުންނާ ގުޅިގެން އެ މީހުން ހޯދައި ޖޫރިމަނާ ވެސް ކޮށްފައެވެ. މިދިޔަ ރޯދަމަހަށް ގޭތެރެ ސާފުކޮށް، ފަރުނީޗަރާއި ގޭގޭގައި ހިފައި ގެންގުޅޭ އެހެން ސާމާނު ބައެއް މީހުން ނެރުނީ މަގުތަކަށެވެ.
އެގޮތުން، މާލޭގެ އެކި ސަރަހައްދުތައް ވަރަށް ބޮޑަށް ގޮނޑުވެ، ކަންކަން ބޮއްސުންލައިގެން ދިއުމުން ސިޓީ ކައުންސިލާއި ވެމްކޯއިން ވަނީ މަގުތައް ސާފު ވެސް ކޮށްފައެވެ.
ރިޕޯޓުގައި ފާހަގަކޮށްފައިވާ އިތުރު މައްސަލަތައް:
- ބޯޑުނެތި މަގުމަތީގައި ގަވާއިދާއި ހިލާފަށް މަސައްކަތްކުރުން – 366
- ކާނު، ޖަންކްޝަން ހަލާކުވެ ނުވަތަ ބެދިފައިވުން – 567
- ފިހާރައިން ބޭރުގައި މުދަލާއި ތަކެތި ބެހެއްޓުން – 223
- ޕާކިން މައްސަލަތައް – 33
- މަގުމަތީގައި ނިޝާންތައް ފަނޑުވުން، ނިޝާން ބޯޑުތަކާއި ލައިޓްތައް ހަލާކުވުން – 102
- ހުއްދަނެތި ވިޔަފާރި ހިނގާ މައްސަލަތައް – 17
- މަގުމަތީގައި ގަވާއިދާ ހިލާފަށް ވިޔަފާރިކުރުން – 322
- ޕާކުތަކާއި މިސްކިތްތަކުގައި މީހުން ނިދުން – 1212
- އިމާރާތް ކުރުމަށް ގެންނަ ތަކެތި މަގުމަތީގައި ބެހެއްޓުން – 141
- އޭސީ، ދިޔަދޮވި އަދި އެހެން ގޮތްގޮތުން މަގުމައްޗަށް ފެން ފޭބުން – 262
- އެކި ކަންކަމުގައި ޖޫރިމަނާ ކުރުން – 437
