ހުޅުމާލޭ ދެވަނަ ފިޔަވަހީގައި ކާރެއް ކޮންޓްރޯލުން ނައްޓައިގެން ގޮސް މަޑުކޮށްގެން އިން ސައިކަލެއްގައި ޖެހިގެން ހިނގި އެކްސިޑެންޓްގައި އަނިޔާވި މީހާގެ ހާލު ރަނގަޅު ކަމަށާއި އޭނާއަށް މިހާރު ފަރުވާ ދެމުން ދަނީ ވޯޑުގައި ބާއްވައިގެން ކަމަށް އައިޖީއެމްއެޗްއިން ބުނެފިއެވެ.
މި ހާދިސާގައި އަނިޔާވި މީހާއަށް ފުރަތަމަ ފަރުވާ ދިނީ ހުޅުމާލެ ހޮސްޕިޓަލްގައެވެ. ނަމަވެސް ފަހުން އޭނާ ވަނީ އައިޖީއެމްއެޗަށް ބަދަލުކޮށްފައެވެ.
ހުޅުމާލޭ ފޭސް 2 ވިނަރެސް ފްލެޓް ކައިރީގައި އިއްޔެ މެންދުރު އެކްސިޑެންޓް ހިނގާފައިވަނީ ބާރު ސްޕީޑެއްގައި ދުއްވާފައި އައި ރޭސް ކާރެއް ކޮންޓްރޯލްނުވެ ގެން ގޮސް މަގުގެ އެއްފަރާތެއްގައި މަޑުކޮށްގެން އިން ސައިކަލެއްގައި ޖެހިގެންނެވެ. އެކްސިޑެންޓުވުމާއެކު ސައިކަލުގައި އިން މީހާ ވިއްސައިގެން ގޮސް ވެއްޓެނީ މާދުރަށެވެ.
މި މައްސަލައާއި ގުޅިގެން ފުލުހުން ވަނީ ތިން މީހަކު ހައްޔަރުކޮށް އެ މީހުން ވަނަވަރު އާންމުކޮށްފައެވެ.
