ފުލުހުން ގޮސް ހެޕީމާކެޓުގެ ވެހިކަލެއް ޓޯކުރާ މަންޒަރު ފެންނަ ފޮޓޯއަކާއެކީ، ހޯމް މިނިސްޓަރުގެ ރަސްމީ އެކްސް އެކައުންޓުން ކުރި ޕޯސްޓުގައި މިނިސްޓަރު އިހުސާން ވިދާޅުވީ އެންމެންގެ މައްޗަށް ގާނޫނު ހިންގުމަކީ ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ގޮތް ކަމަށެވެ.
އިހުސާން ވިދާޅުވީ ރައީސުލްޖުމްހޫރިއްޔާ ޑރ. މުއިއްޒު އަންގަވާފައިވަނީ ގާނޫނު ތަންފީޒު ކުރުމުގައި ވަކި މީހެއް އިސްތިސްނާ ނުވަތަ ހާއްސަ ނުކުރުމަށް ކަމަށާއި އެންމެނަށް ވެސް ހަމަހަމަކޮށް ގާނޫނު ތަންފީޒު ކުރުމަށް ކަމަށެވެ. ފުލުހުން އަދި އެހެން ތަންފީޒީ އިދާރާތަކުން ވެސް އެ ގޮތުގައި ރާއްޖޭގެ ގާނޫނުތައް ތަންފީޒު ކުރާނެ ކަމަށް އިހުސާން ވިދާޅުވިއެވެ.
ހެޕީމާކެޓަކީ އިހުސާންގެ އާއިލީ ކުންފުންޏެކެވެ. އެ ވިޔަފާރި ހިންގެވުމުގައި އިސްކޮށް އިހުސާންވެސް އުޅުއްވާފައިވެއެވެ. ވަޒީރު ކަމާ ހަވާލުވެވަޑައިގަތުމާ ހަމައަށް އޭނާ ހުންނެވީ އެ ކުންފުނީގެ އިސްމަގާމެއްގައެވެ. ކުންފުނިތަކުގެ މަގާމު ފުރުމާއި ވިޔަފާރި ކުރުމަކީ ވަޒީރުންނަށް މަނާ ކަމެކެވެ.
