ރާއްޖޭގައި ގަވައިދާ ހިލާފަށް އުޅެމުންދާ ބިދޭސީން ހޯދުމުގެ މަސައްކަތް ޕްރޮގްރާމެއްގެ ދަށުން ފަށާފައި ވާތީ ގިނަ ބިދޭސީންތައް ހިދުމަތް ދޭ ތަންތަން ވަކިގަޑިތަކެއްގައި ހުޅުވައި ނުވަތަ ވަކި ގޮތަކަށް އެކަނި ތަނުގެ ތެރެއަށް ވަދެވޭ ގޮތަށް ބަދަލު ގެނެސް ހިދުމަތް ދެމުން ގެންދާކަން ފާހަގަކުރެވިވާކަމަށް ކޮންޓްރޯލާއޮފް އިމިގްރޭޝަން މުހައްމަދު ޝައްމާން ވަހީދު ވިދާޅުވެއްޖެއެވެ.
ޝައްމާނު ވިދާޅުވީ ފުޅާދާއިރާއެއްގައި މި އޮޕަރޭޝަން ކުރިޔަށް ގެންދާކަން އެނގި ބިދޭސީން ވެސް ބިރުން ފިޔަވަޅުތައް އަޅާފައިވާކަން ފާހަގަކުރެވޭ ކަމަށެވެ.
ކާބޯތަކެތީގެ ވިޔަފާރިކޮށް، އެފަދަ ހިދުމަތްތައް ދެމުން ގެންދާ ޓޭކްއަވޭތަކާއި ޑައިންއިންތަކުގައި ބިދޭސީންގެ ޝާމިލުވުން ވަރަށް ގިނަ އެވެ. އަދި ބިދޭސީންހިފެހެއްޓުމަށް ފެށި ޕްރޮގްރާމާއި އެކު ބައެއް ބިދޭސީން އެ މީހުން ކުރަމުން ގެންދާ ވިޔަފާރިތައް ވަގުތީ ގޮތުން މެދުކަނޑާލިކަން ފާހަގަކުރެވުނުކަމަށް ޝައްމާންވިދާޅުވި އެވެ.
އެއަށް ފަހު ދުވާލުގެ ބައެއް ވަގުތުތަކުގައި ހިދުމަތް ދިނުމަށް، ތަން ހުޅުވުމާއި ނުވަތަ މައި ދޮރު އެއްކޮށް ބަންދުކޮށް އެހެން ގޮތަކަށް އެތެރެއަށް ވަދެވޭހެންވެސް ހިދުމަތް ދެމުން ގެންދާކަމަށް ޝައްމާން ވިދާޅުވި އެވެ.
ހުޅުމާލޭގައި ކާބޯތަކެތި ތައްޔާރު ކުރުމުގެ މަސައްކަތް ކުރަމުން ދިޔަ ގަރާޖު ވެސް، ސޯޝަލް މީޑިއާގައި އާންމުވުމާއި އެކު އެ މީހުން ތަން ހުސްކުރުމުގެމަސައްކަތް ފެށިކަމަށް ޝައްމާން ވިދާޅުވި އެވެ. އަދި ވިދާޅުވީ އެކަން އެނގި، ދުވަހުގެ އެހެން ގަޑިއެއްގައި ކުރިޔަށް ގެންދަން އޮތް އޮޕަރޭޝަން އަވަސްކޮށް ތަންބަލައި ފާސް ކުރެވުނުކަމަށެވެ.
އިމިގްރޭޝަންގެ ރެއިޑަށް ފަހު، މާރުކޭޓުން ބިދޭސީން މަދުވެ ގޮޅިތައް ބަންދުކޮށްފައި ހުރި ނަމަވެސް އަނެއްކާވެސް ބިދޭސީން އެތަނުގައި ވިޔަފާރި ފަށާފައިވާތީއެކަން ބަލާފައި ވޭތޯ ސުވާލު ކުރުމުން ޝައްމާން ވިދާޅުވީ އެ ދުވަހު ބިދޭސީން އެއްކޮށް ތަނުން ހުސްވިކަމަށެވެ. އެހެން ނަމަވެސް ޖެހިގެން އައި ދުވަހުއަނެއްކާވެސް ގޮޅިތައް ހުޅުވިކަމަށާއި، ތަނުގެ ހާލަތު މޮނީޓަރ ކުރަމުން ގެންދާނެކަމަށް ޝައްމާން ވިދާޅުވި އެވެ.
ޝައްމާން ވިދާޅުވީ ފުލުހުންނާއި، އިމިގްރޭޝަނަށް ލިބޭ މައުލޫމާތުތަކުގެ މައްޗަށް އިންޓެލިޖެން ރިޕޯޓެއް ތައްޔާރު ކުރާކަމަށާއި ބިދޭސީން އުޅޭތަނެއް ބަލައިފާސް ކުރަނީ ދުރާލައި އެކަމަށް ތައްޔާރުވެގެން ކަމަށެވެ.
މާރުކޭޓު ގޮޅިތަކަކީ ބިދޭސީންނަށް ވިޔަފާރި ކުރަން ތިބުން މަނާތަނެއް ނަމަވެސް، އެ މީހުން ބަލަހައްޓަމުން ގެންދާ ގޮޅިތައް ގިނަކަން ޝައްމާންފާހަގަކުރެއްވި އެވެ. އަދި އެ މީހުންނާއި އެކު ކޮންމެވެސް ދިވެއްސަކު ޝާމިލުވާއިރު، މާރުކޭޓުން ގެންދިޔަ ބިދޭސީންނަށް ފަހު ބައެއް ދިވެހިންގެ ފަރާތުންއެކަމުގެ ސިޓީތަކެއް ލިބިފައިވާކަމަށް ޝައްމާން ވިދާޅުވި އެވެ.
ޝައްމާން ވިދާޅުވީ މީގެ ކުރިން ބިދޭސީން ރެގިއުލަރައިޒް ކުރުމުގެ ނަމުގައި ޕްރޮގްރާމްތަކެއް ކުރިޔަށް ގެންގޮސްފައި އެބަހުރިކަމަށެވެ. އަދި ގިނަ ބަޔަކު ޑީޕޯޓުކުރުމަށް ނިންމި ނަމަވެސް، އެ މަސައްކަތް ކުރެވިފައި ނެތްކަމަށް ކޮމިޝަނަރ ވިދާޅުވި އެވެ.
ބިދޭސީންގެ މައްސަލަތައް ހައްލު ކުރާނެކަމަށް އެކި ސަރުކާރުތަކުން ވައުދުވެފައި ވާތީ، މި މަސައްކަތަށް ގިނަ ސުވާލު އުފެއްދުނު ނަމަވެސް މި ޕްރޮޖެކްޓުކާމިޔާބުވާނެކަމުގެ ފުރިހަމަ ޔަގީންކަން އެބައޮތްކަމަށް ޝައްމާން ވިދާޅުވި އެވެ.
