ބަންގްލަދޭޝަށް ހެދިހެން މި ގައުމަށް ހަދަން ދިމާނުކުރުމަށާއި އެކަން ނުވާނެ ކަމަށް ރައްޔިތުން މަޖިލީހުގެ ރައީސް އަދި ޕީއެންސީގެ ޗެއާޕާސަން, އަބްދުއްރަހީމް
ބަންގްލަދޭޝްގެ ސަރުކާރުގެ ސިޔާސަތުތަކާ ދެކޮޅަށް އެ ގައުމުގައި ކުރި މުޒާހަރާތައް ހޫނުވެ، އެގައުމުގެ ބޮޑު ވަޒީރު ޝެއިޚް ހަސީނާ ވަނީ އިސްތިއުފާ ދެއްވާ، ގައުމުން ފިއްލަވާފައެވެ.
ކުރީގެ ރައީސް ޔާމީން އަބްދުލް ގައްޔޫމަށް އިޝާރާތް ކުރައްވާ އަބްދުއްރަހީމް ވިދާޅުވީ ބަންގްލަދޭޝްގެ ބޮޑުވަޒީރު އިސްތިއުފާ ދިނުމުން ލީޑަރުން ނިކުމެ އެހެން ހަދަން ވިސްނެވި ކަމަށެވެ.
އަބްދުއްރަހީމް ވިދާޅުވީ މުޒާހަރާއަކަށް ނިކުންނަން އުޅެފިނަމަ ރައީސް ޔާމީން އެންމެ އަރިހުގައި އުޅުއްވާ ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލާއި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ސީޕީ ހުސައިން ވަހީދު ނުފެންނާނެ ކަމަށެވެ.
އަބްދުއްރަހީމް އިތުރަށް ވިދާޅުވީ ދިވެހި ލޭ ހިނގާ ދިވެހި ދަރިން ތިއްބާ ބަންގްލަދޭޝްއަށް ހެދިހެން މި ގައުމަށް ނުހެދޭނެ ކަމަށެވެ.
އަބްދުއްރަހީމް ވިދާޅުވީ މި ގައުމުގެ މިނިވަންކަމާއި އަމާންކަމާއި ރައްކާތެރިކަމާއި އިސްތިގުލާލު އަދި ރައްޔިތުންގެ ފުދުންތެރިކަމާ ހިސާބަށް ދިއުމުން މަޑުން ނުތިއްބަވާނެ ކަމަށެވެ. އަދި ކުރިމަތިލައްވަން ކެރިވަޑައިގަންނަވާނެ ކަމަށާއި ބުނަން ޖެހުނު ކޮންމެ ބަހެއް ވިދާޅުވާނެ ކަމަށް އަބްދުއްރަހީމް ވިދާޅުވި އެވެ.
