ރައްޔިތުންގެ މަޖިލީހުގެ މެންބަރުންގެ އަދަދަށް ގެންނަ ބަދަލާ ގުޅޭގޮތުން މަޖިލީހުން ޕާޓީތަކާއެކު ކުރަމުންގެންދާ މަޝްވަރާތަކުގައި ކެންޑިޑޭޓަކު ނުނެރެވެސް ގޮނޑި ލިބޭ ގޮތަކަށް ބަދަލުގެނައުމަށް ޑިމޮކްރެޓްސް އިން ހުށަހަޅައިފިއެވެ.
މަޖިލީހުގައި މެންބަރުންގެ އަދަދަށް ގެންނާނެ ބަދަލަކާގުޅޭގޮތުން މިނިވަން މުއައްސަސާތަކާބެހޭ ކޮމިޓީން މިއަދު ބޭއްވި ބައްދަލުވުމުގައި ޑިމޮކްރެޓުންގެ ފަރާތުން އާޝިޔަތު އަލައިކާ ވިދާޅުވީ އެޕާޓީންވެސް މަޖިލީހުގެ މެންބަރުންގެ އަދަދު މަދުކޮށް އެއްވަރެއްގައި ހިފެހެއްޓުމަށް ތާއީދުކުރާ ކަމަށާއި، އެކަމަކީ އެޕާޓީގެ މެނިފެސްޓޯގައިވެސް ހިމަނާފައިވާ ކަމެއްކަމަށެވެ. އެހެންކަމުން އެ ޕާޓީން ހުށަހަޅަނީ ޕާޓީތަކުން ބޭނުންވާ ބަޔަކު އައްޔަން ކުރުމަށް ވަކި ހާއްސަ ގޮނޑިތަކެއް ހާއްސަކޮށް މެންބަރަކު ނެތްނަމަވެސް ޕާޓީތަކަށް ވޯޓުލެވޭ ގޮތަށް ވޯޓް ކަރުދާހަށް ޕާޓީ އިތުރުކުރުމަށެވެ.
އެގޮތަށް ހެދުމަކީ ޕާޓީ ބަދަލުކުރުންވެސް މަދުކުރެވޭނެ ކަމެއްކަމަށް އެ ޕާޓީން ދެކޭކަމަށާއި، އޭރުން އެ ސްލޮޓް ތަކަށް ލާނީ ޕާޓީ ތަމްސީލު ކުރާނެ މެންބަރުންކަމށެވެ. މި ސިފައަކީ ބަރުލަމާނީ ސިފައެކެވެ. އެގޮތުން ބައެއް ގައުމުތަކުގައި މެޖޯރިޓީ ނަގާ ޕާޓީއަށް ވަކި އަދަދަކަށް މެންބަރުން އައްޔަނުކުރަން ފުރުސަތުލިބޭ ގޮތަށް އޮވެއެވެ.
