ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ރައްޔިތުންނަށް ވިއްކެވި އެންމެ ވަރުގަދަ ސްލޯގަން އަކީ އިންޑިއާ އައުޓްއެވެ. ރާއްޖޭގެ އިންޑިއާ ސިފައިން ގިނަ އަދަދަކަށް ގާއިމްވެ އެބަތިބި ކަމަށް ވިދާޅުވެ، އިންޑިއާ އައުޓްގެ ނަމުގައި ފުޅާ ކެމްޕޭން ރާވާ ހިންގިއެވެ. އެކަމާ ބެހޭ ގޮތުން ރައްޔިތުންގެ ހިތްތަކުގައި ބިރުވެރިކަން އުފެދޭ ފަދަ އެތައް ވާހަކައެއް ކެމްޕޭންތެރޭގައި ދައްކައި، ރައްޔިތުންގެ ތާއީދު އިތުރުކުރުވިއެވެ.
އެދުވަސް މިހާރު ވަނީ މާޒީވެ ގޮސްފައެވެ. ވެރިކަމަށް ވަޑައިގަތުމަށް ފަހުގައިވެސް އިންޑިއާއަށް ވަރުގަދަ ބަހުގެ ހަމަލާތައް ދެއްވުމުގެ އިތުރުން އިންޑިއާއާ ބެހޭ ގޮތުން ވަރަށް ދަށު ދަރަޖައިގެ ވާހަކަތައް ސަރުކާރުގެ އެންމެ އިސްވެރިންގެ ލެވަލްގައި ދެކެވިފައި އެބަހުއްޓެވެ. އެކަމުގެ ނަތީޖާއެއްގެ ގޮތުން ބައެއް ޑެޕިއުޓީ މިނިސްޓަރުން އަދިވެސް ތިއްބެވީ ސަސްޕެންޝަނުގައެވެ.
ރާއްޖޭގައި ތިބި އިންޑިއާގެ ސިފައިން ބޭލުމުގެ މަޝްވަރާތައް ދެގައުމުން ފެށުމަށް ފަހު ނިންމީ އޭރު ރާއްޖޭގައި ތިބި ކޮންމެ ސިފައިންގެ މީހަކަށް "މަދަނީ" މީހަކު ގެނެސް، އިންޑިއާގެ އުޅަނދުތައް އޮޕަރޭޓް ކުރަމުން ގެންދާށެވެ. އެއީ ކެމްޕޭނު ތެރޭގައި ބޭރުކުރަން ވައުދުވި އިންޑިއާގެ އުޅަނދުތަކެވެ. ވެރިކަން ލިބި ބަޖެޓް ތާށިކަން ބޮޑުވާން ފެށުމުން، އިންޑިއާއިން ދީފައިވާ ލޯނުތަކަށް ލުއި ހޯދަން ސަރުކާރުން އެދުމުނު ހިސާބުން އެހުރިހާ ކަމެއް އެފުށްމިފުށަށް ޖެހުނެވެ. އިންޑިއާއިން ބޭނުންވި ގޮތަށް އެމީހުންގެ އުޅަނދުތައްވެސް ރާއްޖޭގައި އެބަ ދުއްވައެވެ. އެމީހުން ބޭނުންވި އަދަދަށް އިންޑިއާގެ ޓެކްނިކަލް މީހުން މިގައުމުގައި ގާއިމްވެ އެބަތިއްބެވެ. މަދަނީންގެ ނަމުގައެވެ.
ޗައިނާއާ ގުޅުން ބަދަހިކޮށް ސަރުކާރުގެ ވެރިން އިންޑިއާއަށް މަލާމާތް ރައްދުކުރަން ފެށުމުން އިންޑިއާއިން ފެށީ ރާއްޖޭގެ ޓޫރިޒަމް ބޮއިކޮޓް ކުރުމުގެ ކެމްޕޭނެކެވެ. އޭރު އިންޑިއާގެ ޓޫރިސްޓުންގެ އަދަދު އޮތީ ރާއްޖޭ އަންނަ ޓޫރިސްޓުންގެ ނިސްބަތުން ވަރަށް ކުރީގައެވެ. އެންމެ ފަހުން އެއަދަދު ލިސްޓް ވަރަށް ފުލަށް ވެއްޓިގެން ދިޔައެވެ. އިންޑިއާގެ ޓޫރިސްޓުން ރާއްޖެއަށް ޒިޔާރަތްކުރާ ނިސްބަތް ބޮޑުތަނުން ދަށް ވެގެން ދިޔައެވެ. އެކަމުގެ ނުރަނގަޅު އަސަރު ރާއްޖޭގެ އިގްތިސާދަށް ވަރަށް ބޮޑަށް ކޮށްފިއެވެ.
އިންޑިއާ އައުޓް ސްލޯގަންގައި ވެރިކަމަށް އައި މީހުން މިހާރު މަސައްކަތްކުރަނީ ވެލްކަމް އިންޑިއާގެ ނަމުގައި އިންޑިއާގައި ޓޫެރިޒަމް ޕްރޮމޯޓް ކުރުމަށް ފުޅާ ހަރަކާތްތަކެއް ހިންގުމަށެވެ. އިންޑިއާ މީހުންނަށް މަރުހަބާ ކިއުން ނޫން ގޮތެއް މިހާރު ނެތެވެ. އެމަސައްކަތުގައި އެންމެ އިސްކޮށް ހުންނެވީ ރާއްޖޭގެ ޓޫރިޒަމް މިނިސްޓަރު އިބްރާހީމް ފައިސަލްއެވެ. މިނިސްޓަރު ވަނީ ދާދި ފަހުން އިންޑިއާއަށް ވަޑައިގެން ރާއްޖޭގެ ޓޫރިޒަމް އިންޑިއާގައި އިސްތިހާރުކޮށް ޕްރޮމޯޓްކުރުމާ ގުޅޭ ގޮތުން އިންޑިއާގެ ކަމާ ގުޅޭ ދާއިރާތަކުގެ އިސްވެރިންނާ މަޝްވަރާކުރައްވާފައެެވެ. މިހާރު ދައްކަވަނީ ވެލްކަން އިންޑިއާގެ ނަމުގައި އިންޑިއާގައި ރޯޑްޝޯތައް ވެސް ބާއްވާ ވާހަކައެވެ.
ވެރިކަމަށް ވަޑައިގަތުމުގެ ކުރިން މިހާރުގެ ވެރިކަމުގެ ފަރާތުން ފާހަގަކުރަމުން ގެންދިޔައީ އިންޑިއާއަކީ ރާއްޖޭގެ ކުރިއެރުމަށް އޮތް ހުރަހެއްގެ ގޮތުގައެވެ. ރާއްޖޭގެ ސަލާމަތާއި ރައްކާތެރިކަމަށް އޮތް ބިރެއްގެ ގޮތުގައެވެ. ރާއްޖޭގެ އިގްތިސާދަށް އޮތް ބުރައެއްގެ ގޮތުގައެވެ. އެހެންނަމަވެސް އޭރު ކީހާޅެން ފަރިއްސައްވެ ނިމިއްޖެއެވެ. މިހާރު އިންޑިއާއާ ގުޅުން ބަދަހިކޮށް އިންޑިއާގެ އެހީތެރިކަން ލިބިގެން ނޫނީ ރާއްޖޭގެ އިގްތިސާދު ވަރުގަދަ ކުރެވެން ނެތްކަމަށް ސަރުކާރުގެ ވެރިން ގަބޫލުކުރަން ފަށައިފިއެވެ. ބަޖެޓް ސަޕޯޓަށް އިންޑިއާއިން ފައިސާގެ އެހީތެރިކަމަށް އެދުނީ އިންޑިއާއަކީ ރާއްޖެއަށް މުހިއްމު ބައިވެރިއެއް ކަމަށް ބުނަމުންނެވެ. އިންޑިއާގެ ޓޫރިސްޓުން ރާއްޖެ ޒިޔާރަތްކުރާ ނިސްބަތް އިތުރުކުރުމުގެ މަސައްކަތް ފަށައިގަތީ، އިންޑިއާ އައުޓް ކެމްޕޭނުގެ ސަބަބުން ދެގައުމުގެ ދެމެދުގައި އުފެދުނު ނުތަނަވަސްކަމަށް މައާފަށް އެދެމުންނެވެ.
އިންޑިއާ އައުޓް ސްލޯގަންގެ ވެރިންނަށް މިހާރު އިންޑިއާއަކީ އެންމެ މުހިއްމު އެކުވެރިޔާއެވެ. އެންމެ ބޭނުންތެރި ބައިވެރިޔާއެވެ. އެންމެ އެދޭ އެހީތެރިޔާއެވެ. މުޅި ސަރުކާރުގެ ސިޔާސަތުގައި މިހާރު އޮތީ ވެލްކަމް އިންޑިއާއެވެ. އިންޑިއާ އައުޓްގެ މަތިން ހަނދާން ނައްތާލައި އެއީ ޔާމީން އުފެއްދި ފިތުނައެއް ކަމަށް ދެއްކުމަށް މިހާރުގެ ވެރިކަމުގެ ފަރާތުން ދަނީ މަސައްކަތް ކުރަމުންނެވެ.
