މަލިންކުންޑަންގ ގެ ވާހަކަ އަކީ އިންޑޮނޭޝިއާ އާއި މެލޭޝިއާ އަދި ބުރުނައި ގައި އެތައް ގަރުނެއް ކުރިންފެށިގެން ވާރުތަވަމުން އައިސްފައިވާ މަޝްހޫރު ބޯދާ ވާހަކައެކެވެ. 3 ގައުމުގައި އެވާހަ ވާރުތަވެގެން އައިސްފައިވާ ގޮތުގައި ތަފާތުތަކެއް ހުރިނަމަވެސް ވާހަކައިން ފޯރުކޮށްދޭ މައިގަނޑު މެސެޖުގައި މާބޮޑު ތަފާތެއްނެތެވެ.
މަލިންކުންޑަންގ ވާހަކައިގެ އަސްލު ނިސްބަތްވަނީ ވެސްޓް ސުމަޓްރާގެ ޕަޑަންގްގެ އެއާ މަނިސް ގޮނޑުދޮށް ސަރަޙައްދުގައި އެތައް ޒަމާނެއްކުރިން ދިރިއުޅުނު ފަގީރު މަންމައަކާއި ފިރިހެން ދަރިއެއް ދެމެދުގައި ހިނގި ކަންތައްތަކެއްގައި ދަރިފުޅު ހިލަގަނޑަކަށް ބަދަލުވި ކަމަށް ބުނާ ވާހަކައިގެ މައްޗަށެވެ.
އެވާހަކަ އަސްލަކަށް ބަލައިގެން 1980 ވަނައަހަރު ދެ އާޓިސްޓުންކަމަށްވާ ދަސްރިލް ބައިރަސް އާއި އިބެންޒާނީ އުސްމާން ވަނީ އެ ގޮނޑުދޮށުގައި މަލިން ކުންޑަންގ ގެ ހިލަ ސިފަކޮށްދިނުމަށް އާޓް ވޯކްއެއް ހަދާފައެވެ. ނަމަވެސް އެ ބީޗުގެ ކޮންމެވެސް ހިސާބެއްގައި އެފަދަ މަންޒަރެއް ސިފަވާކަހަލަ ހިލައެއް އޮތުމަކީ އެކަށީގެންވާކަމެއްކަމަށް ބުނެއެވެ.
ވާހަކައިގައި ގެނެސްދީފައިވާގޮތުން މަލިން ކުންޑަންގ އަކީ އިންޑޮނޭޝިއާގެ ވެސްޓް ސްމަޓްރާގެ ޕަޑަންގްގެ އެއާ މަނިސް ގޮނޑުދޮށް ސަރަޙައްދުގައި މަންމައާއެކު ދިރިއުޅެމުންއައި ކިޔަމަންތެރި ތޫނުފިލި ކުއްޖެއްކެވެ. އެދެމައިންގެ ފަގީރުކަމުން ގޮނޑުދޮށުން ބާނާ މަހެއްމެނުވީ ކާންވެސް ނުލިބޭކަމަށްވެއެވެ. އެހެންކަމުން މަލިން ކުންޑަންގ ފުރާވަރަށް އަރައިގަތުމުން އެހާލަތުން އަރައިގަތުމަށްޓަކައި ސިޓީ ސަރަޙައްދަށްގޮސް މުސާރަލިބޭ މަސައްކަތެއްކުރުމަށް ނިންމައި މަންމައާ މަޝްވަރާކޮށް ބޯޓެއްގައި ސީޓީއަށް ދަތުރުފެށިކަމަށްވެއެވެ.
މަލިންކުންޑަންގ ސިޓީއަށް ދިޔަފަހުން މަންމައަށް މަލިން ކުންޑަންގެ އެއްވެސް ހަބަރެއް ނުވާކަމަށްވެއެވެ. އަދި ސިޓީއަށް ދަތުރުކުރާ ނައު ފަހަރު އެނބުރިއައުމުން މަލިން ކުންޑަންގ ގެ ހަބަރެއްވިތޯ މާލިމީން ގާތުން ދިޔައީ އަހަމުންނެވެ. ނަމަވެސް މަލިން ކުންޑަންގ ގެ އެއްވެސް ހަބަރެއް ނުވާކަމަށްވެއެވެ. މަންމަ އޭރުވެސް ދިޔައީ މަލިން ކުންޑަންގ ހެޔޮހާލުގައި ދުޅަހެޔޮ ސިއްހަތެއްގައި އުފާވެރިކަމުގައި ލެހެއްޓެވުމަށްއެދި ދުޢާ ކުރަމުންކަމަށްވެއެވެ.
ޒަމާންތަކަކަށްފަހު އެނބުރިއައި ބޯޓެއްގެ މާލިމީ މަލިން ކުންޑަންގ ގެ މަންމައަށް މަލިންގ ކުންޑަންގ އާއި ބައްދަލުވި ވާހަކަ އާއި މަލިންގ ކުންޑަންގ އުޅެނީ ސިޓީގެ އެންމެ ތަނަވަސް މީހާގެ އަންހެންދަރިއާއި ކައިވެނިކޮށްގެންކަމާއި ދަރިންވެސް ތިބޭކަމަށް ބުންޏެވެ. އެ ހަބަރު ލިބުމުން މަލިން ކުންޑަންގ ގެ މަންމަ އަށް އުފަލުން ރޮވުނުކަމަށާއި މަލިންގ ކުންޑަންގ ގެ އުފާވެރި ދިރިއުޅުމުގެ ވާހަކަ އިވުމުން އެކަމުގެ މައްޗަށް ޝުކުރުކުކޮށް ހެދިކަމަށްވެއެވެ.
އޭގެ އެތައް އަހަރެއްފަހުން މަލިން ކުންޑަންގ ބޯޓެއްގައި އެނބުރި ރަށަށް އައުމުން މަންމަ ބައްދަލުކުރުމުން މަލިން ކުންޑަންގ މަންމަ ދަންނަ ކަމަށް ނުހެދިކަމަށާއި، މަލިންގ ކުންޑަންގ ގެ މުސްކުޅި މަންމަ އެއް ހުންނަވާހަކަ އަނބި މީހާ ގާތު ބުނެފައިނުވާތީ އެކަމުގެ ޝަކުވާކޮށް މަލިން ކުންޑަންގ ގެ މަންމަ ގަޔަށް ކުޅު ޖެހިކަމަށް ވެއެވެ. އެވަގުތު މަލިން ކުންޑްންގ ގެ މަންމަ ދުޢާއެއް ކުރިމަށް ވެއެވެ. އެ ދުޢާގައި މަންމަ ބުނިކަމަށްވަނީ އެއީ އޭނާގެ ދަރިފުޅުނަމަ އެކަމުގެ އަދަބު އޭނާއަށް ދެއްވުމަށްކަމަށްވެއެވެ.
އެވަގުތު ގޮނޑުދޮށުގެ ރާޅުތައްހިއްލި ވައިބާރުވެ ތޫފާނެއް އައިކަމަށާއި ތޫފާނުގެ ބާރުކެނޑި ގޮނޑުދޮށް ސާފުވިއިރު މަލިން ކުންޑަން ފެންނަންނެތްކަމަށާއި ދެކަކޫމައްޗަށް ތިރިވެ މާފަށް އެދޭ ގޮތް ސިފަވާގޮތަށް ހިލަގަނޑެއް އޮތުމުން އެއީ މަލިން ކުންޑަންގ ކަމަށް އެއަވަށު މީހުން ބުނިކަމަށްވެއެވެ، އަދި އެއީ މަންމަގެ ދުއާގެ ސަބަބުން މަލިންގ ކުންޑަންގ ހިލަގަނޑަކަށް ބަދަލުކުރެއްވީކަމަށްވެސް އެ އަވަށު މީހުން ބުނިކަމަށްވެއެވެ.
މިވާހަކައަކީ އިންޑޮނޭޝިއާ ސަރަހައްދުގައި، މައިންބަފައިންގެ މަތިވެރިކަމާއި އެމީހުންނަށް އަޙްމީއްޔަތުކަންދޭންޖެހޭ ވަރު ބަޔާންކޮށްދިނުމަށް ދަރިންނަށް ކިޔައިދީއުޅޭ އެއްމެ އިބްރަތްތެރި އެންމެ މަޝްހޫރު އެއް ވާހަކައެވެ. މިވާހަކަ ތަފާތު ގޮތްގޮތަށް ލިޔެފައިހުރެއެވެ. މި މަޒުމޫނުގައި ގެނެސްދީފައިވާނީ މި ވާހަކައިގެ ހާދިސާ އާއި ގުލޭ ކުރު ހުލާސާއެކެވެ.
