އެމެރިކާގެ ކުރީގެ ރައީސް އަދި ރިޕަބްލިކަން ޕާޓީގެ ރިޔާސީ ކެނޑިޑޭޓް ޑޮނާޑް ޓްރަމްޕް ދަތުރުކުރެއްވި ޖެޓަށް ޓެކްނިކަލް މައްސަލައެއް ދިމާވެ ކުއްލިހާލަތުގައި ޖައްސައިފިއެވެ.
މިއަހަރު ނޮވެމްބަރ މަހުގެ 5 ވަނަ ދުވަހު އެމެރިކާގައި ބާއްވާ ރިޔާސީ އިންތިހާބުގައި ރިޕަބްލިކަން ޕާޓީގެ ފަރާތުން ވާދަކުރައްވާ ކުރީގެ ރައީސް ޑޮނާޑް ޓްރަމްޕް ކެންޕެއިން ރެލީއަކަށް މޮންޓާނާގެ ބޮޒެމަން އެއާޕޯޓަށް ދަތުރުކުރެއްވި ޖެޓަށް ޓެކްނިކަލް މައްސަލައެއް ދިމާވުމާއެކު އެވަގުތު އެއްމެ ކައިރީގައިއޮތް މޮންޓާނާގެ ބިލިން އެއާޕޯޓަށް ރައްކާތެރިކަމާއެކު ޖައްސާފައިވާކަމަށް ޓްރަމްޕްގެ ކެމްޕެއިން ތަރުޖަމާނުބުނެފިއެވެ. ޓްރަމްޕް ބޭނުންފުޅުކުރައްވާ ބޮއިންގ 200-757 މަރުކާގެ ޖެޓަކީ އެމަނިކުފާނު ގެ އަމިއްލަ އެއާކުރާފްޓެކެވެ.
ޓްރަމްފް ދަތުރުކުރެއްވި ޖެޓަށް ދިމާވި މައްސަލާގެ އިތުރު ތަފްސީލެއް ޓްރަމްޕްގެ ފަރާތުން ހާމަ ނުކުރި ނަމަވެސް އެ ޖެޓަށް ދިމާވި މައްސަލައަކީ ސެކިއުރީ އާއި ގުޅުންހުރި މައްސަލައެއްނޫންކަމަށް އެމެރިކާގެ ސީކުރެޓް ސާވިސް އިން ވަނީ ހާމަކޮށްފައެވެ.
ޖުލައިމަހުގެ 13 ވަނަ ދުވަހު އެމެރިކާކެ ޕެންސިލްވޭނިއާގައި ޓްރަމްޕް ކެމްޕެއިން ރެލީއެއްގައި ވަހަކަދައްކަވަން ހުންނަވަނިކޮށް ދިން ބަޑީގެ ހަމަލާއަށްފަހު ޓްރަމްޕުގެ ސަލާމަތީ ކަންކަން ވަރަށްބޮޑަށް ވަނީ ވަރުގަދަކޮށްފައެވެ.
