ޕްރޮސިކިއުޓާ ޖެނެރަލް ހުސެއިން ޝަމީމަށް މަގުމަތިން ހަމަލާ ދިން މައްސަލާގައި 7 މީހަކަށް ދައުވާކުރަން ފޮނުވައިފި އެވެ.
މީޑީއާތަކަށް މިއަދު ފޮނުވި މެސެޖެއްގައި ފުލުހުން ބުނީ އެ މައްސަލާގެ ތަހުގީގު ނިންމައި ދައުވާކުރުމަށް އެދި މިދިޔަ އާދިއްތަ ދުވަހު ޕީޖީ އޮފީހަށް ފޮނުވާފައިވާ ކަމަށެވެ.
މިދިޔަ ޖެނުއަރީ މަހުގެ 31 ވަނަ ދުވަހު ޝަމީމަށް ހަމަލާ ދީފައިވަނީ ދަރިފުޅު ސްކޫލަށް ގެންގޮސް އެނބުރި ގެއަށް ވަޑައިގެންނެވި މަގުމަތީގައި، ގޭގެ ދޮރުމަތިންނެވެ. މަރުތޭލަކުން ދިން ހަމަލާގައި ޝަމީމްގެ ވައަތު މުލައްދަނޑީގެ ކަށިގަނޑެއްގައި ރެނދެއްލާފައި ވާތީ އޭޑީކޭ ހޮސްޕިޓަލުން ޕްލާސްޓަރުވެސް އެޅި އެވެ.
މި މައްސަލާގައި ހިމެނޭ 7 މީހުންވެސް ހައްޔަރުކޮށް, ބަންދުކޮށްފައިވެފައިވެ އެވެ.
ޝަމީމަށް ހަމަލާ ދިން ހާދިސާއަށްފަހު އޭނާގެ ސެކިއުރިޓީ ކަންކަން އެމްއެންޑީއެފުން ވަނީ އިތުރަށް ވަރުގަދަކޮށްފަ އެވެ.
