ބޭންކް އޮފް މޯލްޑިވްސް ގެ ޑެޕިއުޓީ ސީއީއޯ އާއިޝަތު ނޫރައްދީން އެ ބޭންކުގެ ބޯޑު މެންބަރުކަމުން އިސްތިއުފާ ދީފިއެވެ.
ބޭންކް އޮފް މޯލްޑިވްސް ގެ ވެބްސައިޓްގައި ޢާއްމުކޮސްފައިވާ ބަޔާނެއްގައި ބުނެފައިވަނީ 25 އޯގަސްޓް 2024 ވަނަ ދުވަހު އެ ބޭންކުގެ ބޯޑް މެންބަރ އާއިޝަތު ނޫރައްދީން އެ ބޭންކުގެ ބޯޑު މެންބަރުކަމުން އިސްތިއުފާ ދީފައިވާކަމަށާއި 31 އޯގަސްޓް 2020 ގައި އެ ބޭންކުގެ ބޯޑު މެންބަރުކަމަށް އައްޔަނުކުރެވުނު އާއިޝަތު ނޫރައްދީން އެބޭންކަށް ކޮށްދެއްވި އަގުހުރި ޙިދުމަތައް ޝުކުރު އަދާކުރައްވާކަމަށެވެ.
އާއިޝަތު ނޫރައްދީން އިސްތިއުފާ ދެއްވިއިރު ހުންނެވީ އެ ބޭންކުގެ ޑެޕިއުޓީ ސީއީއޯ ކަމުގެ މަގާމުގައެވެ. އަދި އާއިޝަތު ނޫރައްދީން ވަނީ ވަރަށް ގިނަ ފަހަރުމަތިން ވަރަށް ދިގު މުއްދަތެއްގައި އެ ބޭންކުގެ ބޯޑު މެންބަރުކަންވެސް ކުރައްވާފައެވެ.
މީގެ ކުރިން ޕީސީބީން ވެސް ވަނީ އޭނާ ބޭންކު އޮފް މޯލްޑިވްސް ގެ ބޯޑު މެންބަރުކަމުން ވަކި ކުރިކަން އަންގާފައެވެ. ނަމަވެސް ބޭންކް އޮފް މޯލްޑިވްސް އަކީ އާންމުންގެ ހިއްސާ އޮންނަ ކުންފުންޏަކަށް ވާތީ އެ ބޭންކުގެ ބޯޑަށް މީހުން އައްޔަންކޮށް ވަކިކުރެވޭނީ ހިއްސާދާރުންގެ އާންމު ޖަލްސާއަކުންނެވެ. އެގޮތުން މިދިޔަ ޖެނުއަރީ މަހު ޕީސީބީން އެބޭންކުގެ ބައެއް ބޯދުމެންބަރުން ވަކިކުރުމަށްފަހު އެކަމަކީ ގާނޫނީ ގޮތުން ޕީސީބީ އަށް ކުރެވޭނެ ކަމަކަށް ނުވާތީ އަލުން އެ ބޭފުޅުން އައްޔަންކުރިއެވެ. އެއަށްފަހު އޭގެ ތެރެއިން ބައެއް މެންބަރުން ވަކިކުރީ އެ ބޭންކުގެ އެކްސްޓްރާ އޯޑިނަރީ ބައްދަލުވުމަކުންނެވެ.
