ދުނިޔޭގެ 4 ވަނައަށް އެއްމެ ބޮޑު ތެލުގެ ރިޒާވް ފާކިސްތާނުގެ ކަނޑުން ހޯދިއްޖެ ކަމަށް ޕާކިސްތާނުގެ ކަމާބެހޭ ފަރާތްތަކުން ހާމަކޮށްްފިއެވެ.
ގުދުރަތީ ތެލުގެ ބޮޑު ރިޒާވެއް ޕާކިސްތާނުގެ ކަނޑުން ފެނިފައިމިވަނީ ޕާކިސްތާނާ އެކުވެރި ބައެއް ގައުމުތައް ބައިވެރިވެގެން ކުރިއަށް ގެންގޮސްފައިވާ 3 އަހަރުގެ ދިގު ދިރާސާތަކަކަށް ފަހުއެވެ. ޕާކިސްތާނުގެ ކަމާބެހޭ އިދާރާތަކުން ހާމަކޮށްްފައިވާގޮތުން އެ ދިރާސާތައް ހުއްޓައިނުލާ 3 އަހަރުވަންދެން ކުރިއަށް ގެންގޮސްފައިވަނީ ޕާކިސްތާނުގެ ކަނޑުގެ ޖިއޯގްރަފިކް ސާވޭ ހެދުމުގެ ތެރެއިން ފެނިފައިވާ ބައެއްކަހަލަ ހެކިތަކާ ގުޅިގެންކަމަށެވެ.
ޕާކިސްތާނުން ސިފަކުރާ ގޮތުގައި އެގައުމުގެ ކަނޑުން ފެނުނު ތެލުގެ ރިޒާވަކީ "ބްލޫ ވޯޓާ އިކޮނޮމީ" އެއްގެ ފެށުން ކަމަށާއި ތެޔޮނެގުމަށް އިންވެސްޓް ކުރުމަށް ޝައުގުވެރިފަރާތްތައް ހޯދުމުގެ މަސައްކަތް މިހާރު ފަށާފައިވާ ކަމަށެވެ.
