ވެރިކަމުގެ ވަރަށް ކުރީކޮޅު ރައީސުލްޖުމްހޫރިއްޔާއާ އާންމުން ވީޑިއޯ މެސެޖް މެދުވެރިކޮށް ކުރައްވާ ސުވާލުތަކަށް ސީދާ ރައީސުލްޖުމްހޫރިއްޔާ ޖަވާބު ދެއްވަމުން ގެންދެވިއެވެ. ގައުމީ މުހިއްމު މައުލޫތަކުގައި އަމާޒުވި ހުރިހާ ސުވާލަކަށް ވަރަށް ސާދާކޮށް އެމަނިކުފާނު ވަނީ ޖަވާބު ދެއްވާފައެވެ.
ހަމައެއާއެކު ވަޒީރުންނާއި ރައީސުލްޖުމްހޫރިއްޔާވެސް ބައިވެރިވެވަޑައިގެންނެވި އާންމު ދަރުބާރަކީވެސް ރައްޔިތުންނަށް ބޭނުންވާ މުހިއްމު އެތައް މައުލޫމާތެއް ބަންޑުންކޮށްލެއްވި ބައްދަލުވުންތަކެކެވެ. އޭރު ނޫސްވެރިން ބުނާތީ އެހީމެވެ؛ ސަރުކާރުން މިހާ އަވަސް އަވަހަށް މިހާ ބައިވެރު މައުލޫމާތު ދިނުމަކީ އާންމުން ފޫހިވެދާނެ ކަމެކެވެ. އަހަރެންނަށް އެވާހަކަ ނެގުނީ ވަރަށް ޕޮޒިޓިވްކޮށެވެ. މި ސަރުކާރުން ރައްޔިތުންނަށް މައުލޫމާތު ނުދޭ ކަމަށް ބައެއް މީޑިއާތަކުން އަޑު ފަތުރާއިރު، މައުލޫމާތު ގިނަކަމުން ކަންބޮޑުވި ނޫސްވެރިންވެސް އެބަތިއްބެވެ.
އަހަރެންނަށް ފާހަގަ ކުރެވެނީ ސަރުކާރުގެ އެކިއެކި މުވައްސަސާތަކުންނާއި ރައީސުލްޖުމްހޫރިއްޔާގެ އޮފީހުން މައުލޫމާތު ފެތުރުގައިވެސް ގެންގުޅުއްވާ އުކުތަކަށް ޒަމާނީ ބަދަލުތައް ގެންނަވަމުންދާކަމެވެ. މިސާލަކަށް ދާދި ފަހުން ރައީސުލްޖުމްހޫރިއްޔާ ރައްޔިތުންނަށް ދޫކޮށްލެއްވި އެއްވީޑިއޯއަކީ އެމަނިކުފާނު ކެބިނެޓަށް ވަޑައިގެންނެވުމުގެ ކުރިން އެދުވަހުގެ ކެބިނެޓުގައި މަޝްވަރާކުރައްވަން ހަމަޖެހިފައިވާ މުހިއްމު ކަންކަމާ ބެހޭ މައުލޫމާތު ހިއްސާކުރެއްވުމަށް އާންމުކުރެއްވި ވީޑިއޯއެކެވެ.
"ކެބިނެޓަށް ވަޑައިގެންނެވުމުގެ ކުރިން ރައީސް މުޢިއްޒު ބޭރުކޮށްލެއްވި ވީޑިއޯކޮޅަކީ ވަރަށް ޒަމާނީ އަދި ކުރިއަރާފައިވާ ގައުމުތަކުން ފެންނަ ކަހަލަ މަންޒަރެއް. އެއީ ވަރަށް ޓަޗިން މޫވެއް. އެކަމަކު އަހަރުމެން ފާޅުގަ އެވާހަކައެއް މިގޮތަކަށް ނުދެއްކޭނެތާ ސިޔާސީ ގޮތުން،" އެމްޑީޕީގެ ލީޑަޝިޕްގެ އިސްބޭފުޅަކު ކޮފީ މޭޒެއްގައި ވިދާޅުވިއެވެ.
ދައުލަތުގެ ހުރިހާ މުވައްސަސާއެއްވެސް މިހާރު ސޯޝަލް މީޑިއާގައި ވަރަށް ހަރަކާތްތެރިއެވެ. ވަކިތަނެއް ކިޔާނެ ކަމެއް ނެތެވެ. ހުރިހާ މުވައްސަސާތަކަކުންވެސް ދުވަހުން ދުވަހަށް، ވަގުތުން ވަގުތަށް އެތަނަކުން ހިންގާ އެކިއެކި ކަންކަމާ ގުޅޭ މައުލޫމާތު ގެންދަވަނީ އާންމުކުރައްވަމުންނެވެ.
ސަރުކާރުގެ ނަމުގައި ވަކި ނޫހެއް ހަދާތީވެސް ސަރުކާރަށް ފާޑުކިއުން އަމާޒުވިއެވެ. ފާޑުކީ ނޫސްވެރިން ބުނަމުންދިޔައީ ސަރުކާރުން އުޅެނީ މީޑިއާ ކޮންޓްރޯލްކުރާށެވެ. އެހެންނަމަވެސް ކަންތައްވީ މުޅިން ތަފާތު ގޮތަކަށެވެ. ސަރުކާރުގެ އެކި މުވައްސަސާތަކާ ގުޅޭ ޚަބަރާއި މައުލޫމާތު ދުވަހުން ދުވަހަށް އެއް ޕްލެޓް ފޯމަކުން ލިބެނީ އެއްކަލަ "ސަރުކާރު" ވެބްސައިޓުންނެވެ. އަހަރެންނަށް ފެނުނީ އެކަމުގައިވެސް ވަރަށް ބިނާކުރަނިވި ބަދަލެކެވެ. ކުރިއެރުމެކެވެ.
ދައުލަތުގެ ތަރުޖަމާނު ދެއްވާ ނޫސްކޮންފަރެންސްތަކުގެ ދޭތެރެ ދުރުކޮށްލައްވައި، މަހަކު އެއްފަހަރު ސަރުކާރުގެ އިދާރާތަކުން އާންމު ނޫސްކޮންފަރެންސްތަކުގައި މައުލޫމާތު ހާމަކުރެއްވުމުގެ އިތުރުން މުހިއްމު ކޮންމެ ކަމަކާ ގުޅޭ މައުލޫމާތު ވަޒީރުން ގެންދަވަނީ ސޯޝަލް މީޑިއާ މެދުވެރިކުރައްވައިގެންނާއި ނޫސްވެރިންގެ ބައްދަލުވުންތަކުގައިވެސް މައުލޫމާތު ހާމަކުރައްވަމުންނެވެ.
މިހުރިހާ ކަމެއްވެސް ގޮސް ގުޅެނީ ސަރުކާރުގެ މައުލޫމާތު ފެތުރުމުގެ ސިޔާސަތުތައް ރާއްވަވާ ބޭފުޅުންނާއެވެ. ޚާއްސަކޮށް ރައީސުލްޖުމްހޫރިއްޔާ އޮފީހުގެ ކޮމިއުނިކޭޝަން މިނިސްޓަރު އިބްރާހީމް ހަލީލާއި އޭނާގެ ޓީމް، ރައީސް ޑރ. މުހައްމަދު މުޢިއްޒުގެ އިރުޝާދުގެ ދަށުން ރާއްވަވާ ރަމާނީ ރޭއްވެންތައް ފާހަގަކޮށްލަން ޖެހެއެވެ. މައުލޫމާތު ފެތުރުމުގައި އާންމު ފޫހިނުވާނެ ޓެކްނިކްތައް ބޭނުންކުރެއްވުމަކީ ވަރަށް މަގުބޫލު، ބަލައިގަނެވޭ ކަންކަމެވެ. މިއީ ދެކޮޅު މީހުންވެސް ގަބޫލުކުރާނެ ހަގީގަތެކެވެ.
