ބޭންކް އޮފް މޯލްޑިވްސް (ބީއެމްއެލް) ގެ އިތުބާރު ގެއްލޭފަދަ އެއްވެސް ކަމެއް ކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރަސްމީ އެކްސް އެކައުންޓުން މިއަދު ކުރެއްވި ޕޯސްޓެއްގައި ސޯލިހު ވިދާޅުވީ، ބީއެމްއެލް އަކީ ވަރަށް ގިނަ އާންމުންނާ ވިޔަފާރިވެރިންގެ ދިރިއުޅުމާ ގުޅިފައިވާ ތަނެއް ކަމަށާއި އަބަދުވެސް އެންމެންގެ ފުރިހަމަ އިތުބާރު އޮންނަން ޖެހޭ ތަނެއް ކަމަށެވެ.
"ސަރުކާރުން ވިޔަސް ބީއެމްއެލްއަށް އޮތް އިތުބާރު ގެެއްލޭ ފަދަ އެއްވެސް ކަމެއް ކޮށްގެން ނުވާނެ. ބީއެމްއެލްއަށް ކުރާ އިތުބާރު ގެއްލިއްޖެނަމަ އެއީ މުޅި މުޖަތަމައަށް ލިބޭނެ ބޮޑު ދެރައެއް. އެއީ ރައްޔިތުންގެ ބޭންކު،" ސޯލިހު ލިޔުއްވާފައިވެ އެވެ.
އެމަނިކުފާނު މިފަދައިން ލިޔުއްވާފައިވާއިރު މިދިޔަ މަހުގެ ފަހުކޮޅު ބީއެމްއެލްގެ ކާޑުތަކުން މުއާމަލާތް ކުރެވޭ މިންވަރަށް ގެނައި ބަދަލުތަކާއެކު އެއީ މާލީ ބަގާވާތެއްކޮށް ވެރިކަން ބަދަލުކުރަން ކުރި މަސައްކަތެއްގެ ގޮތުގައި ރައީސް ޑރ. މުހައްމަދު ވަނީ ސިފަކުރައްވާފަ އެވެ. އެކަމުގެ ތަހުގީގެއްވެސް ފުލުހުން ފެށި އެވެ.
ތަހުގީގު ކުރިއަށް ދަނިކޮށް ބޭންކުގެ ސީއޯއޯ ކާލް ސްޓުމްކާ ވަނީ އިސްތިއުފާ ދެއްވާފަ އެވެ. އެ ތަހުގީގުގައި މިހާތަނަށް އެއްވެސް މީހަކާ ސުވާލު ކޮށްފައި ނުވެ އެވެ.
