ފުލުހެއްގެ ގައިގައި ސައިކަލަކުން ޖެއްސި މީހަކު ހައްޔަރުކޮށް 10 ދުވަހުގެ މުއްދަތު ޖަހައިފިއެވެ.
މި މައްސަލައިގައި ހައްޔަރުކޮށްފައިވަނީ ޅ. ކުރެންދޫ، މަގުމަތީގެ، އުމުރުން 24 އަހަރުގެ އަލީ ސަމާހް މުހައްމަދުއެވެ.
ފުލުހުން ބުނީ، މިދިޔަ އަންގާރަ ދުވަހުގެ ރޭ މާލޭ ހެންވޭރު ދަނޑު ކައިރީގައި ހުރި ޗެކްޕޮއިންޓެއްގައި ފުލުހުން ހަރަކާތްތެރިވަމުން ދަނިކޮށް ބާރު ސްޕީޑުގައި ސައިކަލު ދުއްވުމުން ފުލުހުން އޭނާގެ ގާތު މަޑުކުރުމަށް ބުނެފައިވާ ކަމަށާއި، ނަމަވެސް އޭނާ ފުލުހެއްގެ ގައިގައި ސައިކަލުން ޖެއްސުމަށްފަހު މަޑުނުކޮށް ފިލައިގެން ގޮސްފައިވާ ކަމަށެވެ.
އެ މައްސަލައިގައި ކޯޓު އަމުރެއްގެ ދަށުން އިއްޔެގެ ވަގުތެއްގައި އޭނާ ހައްޔަރުކޮށްފައިވާ ކަމަށާއި، ސަމާހުގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 10 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.
އެ މައްސަލަ ފުލުހުން ދަނީ އިތުރަށް ބަލާ ތަހުގީގު ކުރަމުންނެވެ.
