ކޮޗިންގައި ދިވެހި ރަހަތައް

ހުރިހާ ވައްތަރެއްގެ ހެދިކާއެވެ. ގިނަ ވައްތަރުތަކުގެ ރިހައެވެ. ތެލުލި މަހާއި ފިހުނު ކުކުޅެވެ. ފަރާތާ އާއި ރޮއްޓެވެ. ބަތުގެ ވައްތަރުތަކެވެ.
ކޮޗިންގައި ހުންނަ އެންމެ މަޝްހޫރު އެއް ހޮސްޕިޓަލް، އަމްރިތާ އިންސްޓިޓިއުޓް އޮފް މެޑިކަލް ސައިންސް (އަމްރިތާ) ހޮސްޕިތަލު ހިމެނޭ ސަރަހައްދުގައި ދިވެހި ބަހުން ލިޔެފައިބާ ބޯޑުތައް ފެންނާނެއެވެ. ބޭހާއި އައިނު ލިބޭ ވާހަކައެވެ. ދުފުމާއި ފިނިބުއިން ލިބޭ ވާހަކައެވެ. ދިވެހި ކެއުންތައް ތާޒާކަމާއެކު ލިބޭ ވާހަކައެވެ.

ލޮޗިންގައި މިވަގުތު އެންމެ ފުޅާކޮށް ދިވެހި ކެއުން ވިއްކަނީ ޓްރިވެންޑްރަމުގައިވެސް އެޚިދުމަތް ދެމުން އަންނަ ބާބޫއެވެ. އެއީ ބާބޫ ކަޑައެވެ. މުޅި ރެސްޓޯރަންޓް ހާއްސަކޮށްފައިވަނީ ދިވެހިންނަށެވެ. ވޭޓަރުންގެ ގޮތުގައި މަސައްކަތްކުރާ އިންޑިއާ މީހުން ފަރިތަކަމާއެކު ދިވެހި ބަހުން ވާހަކަދައްކައެވެ.

"މިތަނުގެ ހޮޓަލެއް ހުންނާނެ ޓްރިވެންޑްރަމްގައިވެސް. އެހެންވެ ދިވެހިން ބޭނުންވާ ހުރިހާ އެއްޗެއް އެނގޭ. ގަރުދިޔަ ބަތް، ތެލުލިމަސް، މަސްރިހަ، ދޮންރިހަ، ކުކުޅު ރިހަ، ބިސްކަޓްލަޓްސް، ކަވާބު، ބަޖިޔާ، ގުޅަ، މަސްރޮށި ބިސްކީމިއާ މިއީ އެންމެ ގަދައަށް ވިކޭ އެއްޗެހި. ދެން ކޮފީ އާއި ދުފުމާ ސިނގިރެޓް. ދިވެހިން ކާން ވެއްޖެއްޔާ އަގަކަށް ނުބަލާނެ. އެމީހުން ބަނޑުފުރެންދެން ކާނެ. ތަފާތު އެއްޗެހި ކާލާނެ،" އަމްރިތާ ހޮސްޕިޓަލާ އެންމެ ކައިރީގައި ހިންގާ ދިވެހި ހޮޓަލުގެ ސްޕަވައިޒަރަކު ކިޔައިދިނެވެ.

މިހާރު މިއުޅެނީ ޑެލިވަރީ ވެސް ޖައްސަން. ހޮސްޕިޓަލަށްވެސް ހޮޓާތަކަށްވެސް ގެންގޮސްދޭން ފަށަން. އޭރުން މިހާރަށްވުރެ ވިޔަފާރި މާރަނގަޅުވާނެ. މިހާރުވެސް ބިޒްނަސް އޯކޭ،" ހޮޓަލުގެ ކޭޝިއަރު ބުންޏެވެ.

އެހިސާބުގައި ދިވެހިންނަށް ޚާއްސަކޮށް ދެހޮޓާ މިހާރުވެސް ހިންގައެވެ. ކޮންމެ ހޮޓަލަކުންވެސް ބުނީ ދިވެހިންނަށް ޚިދުމަތްދޭން ފެށުމަކީ ނަސީބު ކަމަށާއި ވިޔަފާރި ދަށް އެއްވެސް ދުވަހެއް ނާންނަ ކަމަށެވެ.

ހެދިކާ އާއި ކެއުންތަކުގެ އަގުތަކަށް ބަލާއިރު ހުރީ ރާއްޖޭގެ އަގުތަކަށްވުރެ މަތީގައެވެ. އެހެންނަމަވެސް ބޭސް ވެރިކަމަށް ގޮސްއުޅޭ ދިވެހިންނަށް ގަރުދިޔުއާއި ބަތެއް، މަސްހުންޏާއި ޑިސްކު، މަސްރޮއްޓާއި ބަޖިޔާއެއް ކައިނުލައި ކަމަކު ނުދެއެވެ.