ރާއްޖެއެތެރެކުރަން އުޅުނު 3.48 ކިލޯގެ މަސްތުވާތަކެތި ކަސްޓަމްސްއިން ހިފަހައްޓައިފިއެވެ.
މޯލްޑިވްސް ކަސްޓަމްސް ސާވިސަސް އިން ހާމަކޮށްފައިވާ ގޮތުގައި މަސްތުވާތަކެތި ހިފަހައްޓާފައިވަނީ ވައިގެ މަގުން ރާއްޖެއައި ފަސިންޖަރެއްގެ ފޮށިން ނާއި ޕޯސްޓް މެދުވެރިކޮށް ރާއްޖެ ގެނެސްފައިވާ ޕާރސަލް އެއް އިތުރަށް ބަލައި ފާސްކުރުމުގެ ތެރޭގައި ކަމަށެވެ.
ވައިގެ މަގުން އެތެރެކުރަން މަސައްކަތްކޮށްފައިވާ މަސްތުވާތަކެތި ފެނިފައިވަނީ މި މަހުގެ 5 ވަނަ ދުވަހު ވައިގެމަގުން ރާއްޖެއަށް ދަތުރުކުރި ބްރެޒިލް ގެ 33 އަހަރުގެ އަންހެނެއްގެ ފޮށީގައި މަސްތުވާތަކެތި ރައްކާކޮށްފައި ހުރިކަމަށް ޝައްކުކުރެވިގެން، އެފަސިންޖަރުގެ ފޮށިތައް އިތުރަށް ބަލައި ފާސްކުރުމުގެ ތެރޭގައެވެ. އެގޮތުން އެ ފޮށިން މަސްތުވާތަކެތި ކަމަށް ޝައްކު ކުރެވޭ 2.44 ކިލޯގެ މަސްތުވާތަކެތި ފެނިފައިވާއިރު، ފުރަތަމަ މަރުހަލާގައި ކަސްޓަމްސް އިން އެތަކެތި ތަހުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ޕްޒިޓިވް ވެފައިވާ ކަމަަށާއި އެތަކެތީގެ މަގުމަތީ އަގު 6 މިލިއަން ރިފިޔާއަށް އަރާނެކަމަށް ކަސްޓަމްސް އިން ވަނީ ބުނެފައެވެ.
ޕޯސްޓްގެ މަގުން އެތެރެކުރަން އުޅުނު މަސްތުވާތަކެތި ފެނިފައިވަނީ މި މަހުގެ 7 ވަނަ ދުވަހު ޕޯސްޓް މެދުވެރިކޮށް ރާއްޖެ ގެނެސްފައިވާ ޕާރްސަލް އެއް ބަލާ ފާސްކުރުމުގެ ތެރެއިން ކަމަށާއި، އެ ޕާރސަލްގެ ތެރެއިން މަސްތުވާތަކެތި ކަމަށް ޝައްކުކުރެވޭ 1.04 ކިލޯގެ ތަކެތި ފެނިފައިވާއިވާކަމަށާއި، ފުރަތަމަ މަރުހަލާގައި ކަސްޓަމްސް އިން އެތަކެތި ތަހުލީލު ކުރިއިރު، މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ޕޮޒިޓިވް ވެފައިވާ ކަމަށާއި އަދި އެ ތަކެތީގެ މަގުމަތީ އަގު މިލިއަނަކަށްވުރެ މަތިވާނެކަމަށް ކަސްޓަމް އިން ވަނީ ބުނެފައެވެ.
ކަސްޓަމްސް އިން އިތުރަށް ބުނެފައިވަނީ ވައިގެ މަގުން މަސްތުވާތަކެތި އެތެރެކުރަން މަސައްކަތްކުރި ބްރެޒިލް ގެ މީހާ އާއި ޕޯސްޓް ޕާރސަލް ބަލާ ކަސްޓަމްސް އަށް އައި 40 އަހަރުގެ ދިވެހި މީހާ ފުލުހުން މިހާރު ހައްޔަރުކޮށްފައިވާކަމަށެވެ.
