ރާއްޖެއަށް 1.4 ކިލޯގެ މަސްތުވާތަކެތި އެތެރެކުރި މީހަކު 12 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މިދިޔަ ޖޫން މަހުގެ 22 ވަނަ ދުވަހުގެ ހެނދުނު 7:52 އެހާކަންހާ އިރު ގަތަރު އެއާލައިންގެ ބޯޓަކުން ރާއްޖެއައި ގާނާގެ ރައްޔިތެއްގެ ހަށިގަނޑު ކަސްޓަމްސްއިން ސްކޭންކޮށް ބަލައި ފާސްކުރިއިރު އޭނާގެ ހަށިގަނޑުގައި ކެވިޓީސްތަކެއް ހުރިކަމަށް ފާހަގަވެގެން އިތުރަށް ޔަގީންކުރަން އައިޖީއެމްއެޗަށް ގެންގޮސް، ހެދި ސްކޭން ރިޕޯޓުން އޭނާގެ ހަށިގަނޑުގައި ފޮރިން ބޮޑީސް ހުރި ކަމަށް ދައްކާތީ އެ ތަކެއްޗަކީ މަސްތުވާތަކެތި ކަމަށް ތުހުމަތުކުރެވިގެން އޭނާ ވަނީ ހައްޔަރުކޮށްފައެވެ.
އެ މައްސަލާގައި މި މަހުގެ 22 ވަނަ ދުވަހު ކޯޓުން ހުކުމްކޮށްފައިވަނީ ގާނާގެ ރައްޔިތެއް ކަމަށްވާ އައްޕިއަހް ޖޭމްސް އަށެވެ.
މި މައްސަލައިގެ ހުކުމުގައި ބުނެފައިވަނީ، ފުލުހުންގެ ބެލުމުގެ ދަށުގައި އޭނާ ހުރިއިރު އެކި ފަހަރު މަތިން ބޮޑުކަމުދިޔަ ތަކެތިން 108 ބްލެޓް ފެނިފައިވާއިރު އޭގައި ޖުމްލަ 1.4 ކިލޯ ހުރި ކަމަށާއި އެއީ ކޮކެއިންކަން ތަހުލީލު ރިޕޯޓުން އެނގޭ ކަމަށެވެ.
އެހެންކަމުން އައްޕިއަހްގެ މައްޗަށް މަސްތުވާ އެއްޗެއް ރާއްޖެ އެތެރެކުރުމުގެ ކުށުގެ ދައުވާ އުފުލާފައިވާ އިރު، އޭނާ ވަނީ އެދައުވާއަށް އިއުތިރާފުވެފަ އެވެ.
މީގެ އިތުރުން އޭނާ ޕީޖީއާއެކު ހެދި އިއުތިރާފުގެ އެއްބަސްވުމުގައިވާ ގޮތުން އޭނާގެ މައްޗަށް ކަނޑައެޅޭނެ އަދަބަކީ 12 އަހަރާއި 6 މަހަށް ޖަލަށްލުމުގެ އިތުރުން އެއްލައްކަ ރުފިޔާ އިން ޖޫރިމަނާކުރުމެވެ.
މިގޮތަށް މައްސަލަ ނިންމާ, ހުކުމުގައި ބުނެފައިވަނީ، ޖޫރިމަނާގެ ފައިސާ މި ހިނގާ މަހުގެ 22 ވަނަ ދުވަހުން ފެށިގެން 1 އަހަރު ތެރޭގައި މީރާއަށް ދައްކާ ހަލާސްކުރަން އޭނާގެ މައްޗަށް އަމުރުކޮށްފައިވާ ކަމަށެވެ.
އެ މައްސަލާގެ ތަހުގީގުގައި އޭނާ ހޭދަކުރި 4 މަހާއި 10 ދުވަސް އުނިކޮށް އޭނާ ތަންފީޒުކުރަން ޖެހޭ އަދަބަކީ 12 އަހަރާއި 1 މަހާއި 20 ދުވަސް ކަމުގައި ވެސް ހުކުމުގައި ބުޔާންކޮށްފައިވެއެވެ.
