ނޮވެމްބަރ 3 ގެ ހަމަލާގެ މަންޒަރުތަކާއި ބޭނުންކުރި ހަތިޔާރު ދައްކާލުމަށްޓަކައި މައުރަޒެއް ބާއްވައިފިއެވެ.
ނަސްރުގެ ދުވަހާ ގުޅުވައިގެން ނޭޝަނަލް އާޓް ގެލަރީގައި ސިފައިން ބާއްވާ މައުރަޒު ހުޅުވައިދެއްވީ ދިވެހި ރާއްޖޭގެ ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު އެވެ.
1988 ވަނަ އަހަރުގެ ނޮވެމްބަރ 3 ވަނަ ދުވަހުގެ ފަތިހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެ ދުވަހު ނަޞްރު ހޯދުމަށް ސިފައިން ކުރައްވާފައިވާ މަސައްކަތްތައް ދައްކުވައިދޭ ފޮޓީޯތަކާއި ނަސްރުގެ ދުވަހު ބޭނުންކުރި ހަތިޔާރާއި ބައެއް ސާމާނު ހިމެނޭ ގޮތަށް 200 އަށްވުރެ ގިނަ ޑިސްޕްލޭ އެ މައުރަޒުގައި ފެންނަން ހުންނާނެއެވެ.
އެ މައުރަޒު ބޭއްވުމުގެ އެއްމެ ބޮޑު އެއް މަގްސަދަކީ ނަސްރުގެ ދުވަހާ ގުޅޭ މައުލޫމާތު ފޯރުކޮށްދިނުންކަމަށާއި، އެ މައުރަޒް ހުޅުވިފައި ހުންނާނީ މިއަދުން ފެށިގެން ނޮވެމްބަރ 9 ވަނަ ދުވަހާ ހަމައަށް ކޮންމެ ދުވަހެއްގެ ހެނދުނު 09:00 އިން މެންދުރު 12:00 އަށް، މެންދުރު ފަހު 14:00 އިން ހަވީރު 18:00 އަށް އަދި ރޭގަނޑު 20:00 އިން 22:00 އަށެވެ،
