މޯލްޑިވްސް މީޑިއާ ކައުންސިލް (އެމްއެމްސީ) އިން މިފަހުން ބޭއްވި ޖާނަޒިލަމް އެވޯޑުގެ އޯޑިއޯ/ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު "އަދަދު" އޮންލައިން އަށް ދިނީ އުސޫލުން ބޭރުން ކަމަށް ބުނެ ހުށަހެޅި މައްސަލައަކާ ގުޅިގެން އެ އިދާރާއަށް އެންޓި ކޮރަޕްޝަން ކޮމިޝަން (އޭސީސީ) އިން ވަދެއްޖެ އެވެ.
މިދިޔަ ބުދަ ދުވަހުގެ ރޭ ބޭއްވި އެމްއެމްސީ ޖާނަލިޒަމް އެވޯޑްސް ހަފުލާގައި، އޯޑިއޯ/ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ "އަދަދު" އޮންލައިންގެ "ސްކީލާން" ޑޮކިއުމެންޓްރީ އަށެވެ. އެއީ ރައީސް ޑރ. މުހައްމަދު މުއިއްޒުގެ ދޮންމަންމަ ސްކީލާން، އެމަނިކުފާނަށް ބޮޑެތި ތުހުމަތުތަކެއް ކުރައްވާފައިވާ ޑޮކިއުމެންޓްރީ އެކެވެ.
"ސްކީލާން" ޑޮކިއުމެންޓްރީ ނެރެފައި ވަނީ މިދިޔަ އަހަރު ބޭއްވި ރިޔާސީ އިންތިހާބުގެ ކެމްޕެއިން ކުރަމުންދިޔަ ދުވަސްވަރު އެވެ. އެ ތުހުމަތުތައް ރައީސްގެ ފަރާތުން އޭރު ވަނީ ދޮގުކުރައްވާފަ އެވެ. ވިދާޅުވެފައިވާ ގޮތުގައި އޭގައި ހިމެނެނީ ހަގީގަތާ ހިލާފު ވާހަކަތަކެއް ކަމުގަ އެވެ.
އެވޯޑުތަކަށް އިންސާފުކުރި ފަނޑިޔާރުން ފަހުން ވިދާޅުވެފައި ވަނީ އެވޯޑު ހަވާލުކުރެވިފައި ވަނީ އުސޫލުތަކާއި މަގުސަދުތަކާ ހިލާފަށް ކަމަށެވެ. އެކަން ފާހަގަކޮށް ނެރުނު ބަޔާނުގައި ހަތް ކަމެއް ވަނީ ފާހަގަކޮށްފަ އެވެ.
