ހައްފާތާ ނިމިގެން ދިޔައީ ޓޫރިޒަމް ދާއިރާއިން ލިބޭ ޑޮލަރުގެ އަދަދެއް ބޭންކުތަކުން މާރުކުރަންޖެހޭ ގޮތަށް ދައުލަތުން އެކުލަވާލި ގަވާއިދުތަކަށް ބޯނުލަނބާނެކަމަށް އަންގައި ވިޔަފާރިވެރިންތަކެއް މަރުކަޒީ ބޭންކަށް ފޮނުވި ސިޓީތަކަކާއި ގުޅޭ ހޫނު ބަހުސްތަކަކާ އެކުގައެވެ.
ސިޔާސީ ވެރިންގެ ހިޔާލުތައް އެ މައްސަލާގައި ދެކަފިވެފައިވާ މި ދަނޑިވަޅުގައި މި ދައްކާ ވާހަކައަކީ ކޮބައިކަން ބަލާލަން އެބަޖެހެއެވެ.
ވިޔަފާރިވެރިންތަކެއް މަރުކަޒީ ބޭންކަށް ފޮނުވިކަމަށް ބުނެ ސޯޝަލް މީޑިއާގައި ދައުރުވާ ސިޓީތަކަށް ބަލާއިރު އެވެރިންގެ ހަރުކަށި އިބާރާތުން ބުނެފައިވަނީ ދައުލަތުން މިހާރު އެކުލަވާލާފައިވާ ގޮތަށް ޑޮލަރު މާރުކުރުމުގެ ގަވާއިދަށް އަމަލުކުރުމަކީ މުސްތަޙީލު ކަމެއް ކަމަށެވެ. އަދި މި ގަވާއިދު އެކުލަވާލާފައިވަނީ "ސްޓޭކްހޯލްޑަރުންނާ" މަޝްވާރާކުރުމެއްނެތި ކަމަށެވެ.
ޓޫރިޒަމްގެ ދާއިރާގެ އަސްލު ބިނާވެފައިވަނީ ދިވެހި ހުރިހާ ރައްޔިތުންގެ "ސްޓޭކް" އެތަންތަނުގައި އޮތް ދިވެހި ރަށްތަކުގައެވެ. އެ ރަށްތަކުގެ ވަށައިގެންވާ ހުދު ދޮންވެލި ތުނޑިތަކާއި ސާފު ވިލު ނޫ މޫދުތަކާއި އެ މޫދު އަޑީގައި ހުރި ކުލައިކުލައިގެ ރީތި ފަރުތަކުގައެވެ. އެހެންކަމަށް ވާނަމަ ޓޫރިޒަމް ސިނާއަތުގެ ސްޓޭކް ހޯލްޑަރުންނަކީ އެދާއިރާގެ ވިޔަފާރިވެރިން ކަމުގައި ބުނެވެން އެބައޮތްހެއްޔެވެ.
އަހަރުމެން ހުރިހާ ރައްޔިތުންގެ ހައްޤު ހިމެނޭ ރީތި ނަލަ ރަށްތަކުގެ ފައިދާއިން ބަޔަކު މީހުން މަހުޖަނުންގެ ގޮތުގައި އުޅޭތާ ލައްކަ ދުވަސް ވެއްޖެއެވެ. އެތަންތަނަށް ވަންނަ ޑޮލަރުތައް މިލިއަނުން ބިލިއަނަށް އަރައެވެ. އެހެންނަމަވެސް އަހަރުމެން އާދައިގެ ރައްޔިތު މީހާ އަށް މިއޮންނަނީ ޑޮލަރަށް އަބަދުމެ ސަލާންޖަހަންޖެހިފައެވެ.
ކިޔަވަން ރާއްޖެއިން ބޭރުގައި ހުންނަ ދިވެހި ޒުވާނާއާއި، ބޭސްފަރުވާއަކަށް ރާއްޖެއިން ބޭރަށް ދާ ރައްޔިތު މީހާ އާއި ކުޑަ ވިޔަފާރިއެއް ކުރާ ރައްޔިތުމީހާ އާއި އަދި ދައުލަތުން ނުވަތަ ދައުލަތުގެ ކުފުންޏަކަށް ބޭނުންވެގެންވެސް ޑޮލަރު ގަންނަންޖެހިފައިވަނީ ދައުލަތުން ކަނޑައަޅާފައިވާ އަގަށްވުރެ އެތަށް ގުނައެއް ބޮޑުކޮށެވެ. 15:42 ގައި ރޭޓް ކަނޑައަޅާފައިވާއިރު މިދެންނެވި ފަރާތްތަކަށް މިއަދު ޑޮލަރު ގަންނަންލިބެނީ ގާތްގަނޑަކަށް 19 ރުފިޔާގެ ރޭޓުން ނުވަތަ އެއަށްވުރެވެސް ބޮޑުކޮށެވެ. މިވަނީ ކިހެއްނެތް ހެއްޔެވެ.
ކަމުގެ މާހިރުން ބުނާ ގޮތުން ދިވެހިރާއްޖެއަށް ޑޮލަރު ލިބެއެވެ. ދިވެހިރާއްޖޭގެ ހުރިހާ ކަމެއް ހަމަޖައްސައި އިތުރުވާ ވަރަށްވެސް ޑޮލަރު ލިބެއެވެ. މިއީ ރަނގަޅު ވާހަކައެއްކަން އެނގެނީ އެއްކަލަ ބޮޑު އަގުގައި ގަންނަން ކިތަންމެ ގިނައިންވެސް ކަޅުބާޒާރުން ޑޮލަރު ލިބޭތީއެވެ. ނުލިބެނީ ދައުލަތުން ކަނޑައަޅާފައިވާ ރޭޓްގައެވެ.
އެހެންނަމަވެސް މިއަދު މި ދިވެހި ދައުލަތަށާއި ދިވެހި ރައްޔިތުންނަށް ދިމާވެފައިވާ އެންމެ ދަތި އެއްކަމަކީ ބޭރުފައިސާ ނުވަތަ ޑޮލަރު ލިބުން ދަތިވުމެވެ. ދައުލަތުގެ އެތަކެއް ބިލިއަން ދަރަނި އަދާކުރަން ޖެހިފައިމިވާ ދަނޑިވަޅުގައި އެކަމަށް ބޭނުންވާވަރަށް ބޭރު ފައިސާ ނުލިބުމެވެ. ރައްޔިޔުންގެ އަސާސީ ކަންކަމަށް ބޭނުންވާ ބޭރުފައިސާ ނުލިބުމެވެ. މިކަން ހައްލުކުރުމަށް އަވަސް ފިޔަވަޅުތަކެއް ބޭނުންވެފައިވާ މި ދަނޑިވަޅުގައި ޑޮލަރުން އާމްދަނީ ލިބޭ ރިސޯޓުތަކަށް ލިބޭ އާމްދަނީގެ ކުޑަ ކުޑަ އަދަދެއް ބޭންކުތަކުން މާރުކުރަންޖެހޭ ގޮތަށް އެކުލަވާލި އުސޫލަށް ތަބާނުވާނެކަމަށް މަހުޖަނުންތަކެއް ބުނަމުން އަންނަނީ "ސްޓޭކްހޯލްޑަރުންނާ" މަޝްވަރާކުރުމެއްނެތި މިކަން ކޮށްފައިވާ ކަމަށް ބުނެއެވެ.
"ސްޓޭކްހޯލްޑަރުން" ކަމަށް ދަޢުވާކުރާ ފަރާތްތަކެވެ. މި ދިވެހި ދައުލަތާއި ދިވެހިރައްޔިތުންނަށްވުރު ސްޓޭކް ބޮޑު އެއްވެސް އިންޑަސްޓްރީއެއް، ނުވަތަ ވަކި ބައެއް މި ދިވެހި ގައުމުގައި ނުތިބޭނެއެވެ. ދިވެހި ދައުލަތާއި ދިވެހިންނަށް މިވަގުތު ސަރުކާރުން އަޅާފައިވާ ފިވަޅުތަކަކީ ކޮންމެހެންވެސް ބޭނުންތެރި ފިޔަވަޅުތަކެވެ. މި ދިވެހި ދައުލަތް ބަނގުރޫޓުވުމަށް ދޫކޮށްލައިގެން ބަލަން މަހުޖަނުންނަށް ތިބެވުނަސް އެކަމަށް ދިވެހި ސަރުކާރާއި ރައްޔިތުން ތާއިދެއް ނުކުރާނެއެވެ.
މިއަދުގެ ރައީސުލްޖުމްހޫރިއްޔާ އަށް ބުނެލަން އޮތީ ނަމަ ނަމަ އިންޗިއެއްވެސް ފަހަތަށް ޖެހިވަޑައިނުގަންނަވާށެވެ. ދިވެހި ދައުލަތުގެ ޤާނޫނުތަކާއި ގަވާއިދުތަކަށްވުރެ މަތީގައި ތިބޭނެ "ސްޓޭކްހޯލްޑަރުންނެއް" ނުތިބޭނެއެވެ. އަދި ދައުލަތާއި ރައްޔިތުންގެ މަސްލަހަތު ނުހިމެނޭ "ސްޓޭކްހޯލްޑަރުން" ނެއްވެސް ނުތިބޭނެކަމަށެވެ.
