ރާއްޖޭގެ ޑިޕްލޮމެޓިކް ޕާސްޕޯޓާއި އޮފިޝަލް ޕާސްޕޯޓް އޮންނަ ފަރާތްތަކަށް ވިސާއާ ނުލައި އަޒަރުބައިޖާނަށް ދަތުރުކުރެވޭގޮތަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން ދައުލަތުގެ ވެރިންނަށް ވިސާއާއިނުލާ އާޒަރުބައިޖާން އަށް ދަތުރުކުރުމާއި ވިސާއާއި ނުލައި 90 ދުވަހަށް އެ ގައުމުގައި ހޭދަކުރުމުގެ ފުރުސަތު ލިބިގެނދާނެއެވެ. އަޒަރުބައިޖާނުގެ ވެރިރަށް ބާކޫގައި ކުރިއަށްދިޔަ ކޮންފަރެންސް އޮފް ދަ ޕާޓީސް އޮފް ދަ ޔޫއެންއެފްސީސީސީގެ ހަވާސާގެ ތެރެއިން ރާއްޖޭގެ ފޮރިން މިނިސްޓަރު އަބްދުﷲ ޚަލީލާއި އަޒަރުބައިޖާންގެ ފޮރިން މިނިސްޓަރު ޖޭހުން ބައިރަމޯވް އާ ބައްދަލު ކުރެއްވުމަށް ފަހު ދެ އެއްބަސްވުމެއްގައި ދެ ގައުމުން ސޮއިކޮށްފައިވާ ކަމަށް ރާއްޖޭގެ ފޮރިން މިނިސްޓްރީން ބުނެފައިވެއެވެ.
އެ ދެ އެއްބްސްވުމަކީވިސާއަށް ލުއި ފަސޭހަ ގޮތެއް ހޯދައިދިނުމުގެ އެއްބަސްވުމަކާއި ދެ ގައުމަށް ފައިދާވާނެ ގޮތަށް ޓޫރިޒަމް ކުރިއެރުވުމުގެ އެއްބަސްވުމެއް ކަމަށް ޕޮރިން މިނިސްޓްރީން ހާމަކޮށްފައިވެއެވެ. އެގޮތުން
ވިސާ އަށް ލުއިގޮތްތަކެއް ހޯދައިދިނުމުގެ އެއްބަސްވުމުގެ ދަށުން ރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް އޮންނަ މީހުންނަށް ވިސާއާ ނުލައި އަޒަރުބައިޖާނަށް އެތެރެވުމާއި ޓްރާންސިޓުވުމުގެ އިތުރުން 90 ދުވަހަށް އެ ގައުމުގައި ތިބުމުގެ ހުއްދަ ލިިބިގެން ދާނެ ކަމަށް ފޮރިން މިނިސްޓްރީން ބުންޏެވެ. އަދި މި އެއްބަސްވުމުގެ ދަށުން ހުރިހާ ދިވެހިންނަށް ވެސް ވިސާއާ ނުލައި އެ ގައުމަށް ދަތުރު ކުރެވޭނެ އިންތިޒާމްތައް ހަމަޖައްސަން މަޝްވަރާތައް ކުރިއަށް ގެންދަން ނިންމާފައިވާ ކަމަށްވެސް ފޮރިން މިނިސްޓްރީން ބުންޏެވެ.
ޓޫރިޒަމް އެއްބަސްވުމުގެ ދަށުން އިގްތިސާދީ ގޮތުންނާއި ސަގާފީ އަދި އިޖްތިމާއީ ގޮތުން ދެ ގައުމަށް ވެސް ފައިދާވާނޭ ގޮތަށް ފަތުރުވެރިކަން ކުރިއެރުވުމަށް އެއްބަސްވެފައިވާ ކަމަށް ފޮރިން މިނިސްޓްރީން ބުންޏެވެ.
