މީގެ ކުރިން ސަރުކާރުތަކުން ހިންގަމުން އައި ކުންފުނިތައް ބަނގުރޫޓްވުމުން ދޫކޮށްލިހެން އާސަންދަ ކުންފުނިވެސް ދޫކޮށްލައި އާ ގޮތްތަކެއް ހޯދަން މަޖުބޫރުވެފައިވާ ކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
"އަސްލު ކެންސަރު ޖެހިފައިވަނީ އާސަންދައަށް، އެހެންވީމާ އަޅުގަނޑުމެން އެބަޖެހޭ ވިސްނުމެއް ގެންގުޅެން އަޅުގަނޑުމެން އެއާ މޯލްޑިވްސްއާ އެކުންފުނިތައް ދޫކޮށްލި ފަދައިން އާސަންދަ ދޫކޮށްލާފައި އަލުން ބަލަން ފަށަންވީ. ކަމާ މެދު ވަރަށް ފުންކޮށް ވިސްނަން ޖެހޭ،" ވިދާޅުވި އެވެ.
އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅާފައިވާ ދައުލަތުގެ ބަޖެޓުގެ ބަހުސްގައި ދިއްގަރު ދާއިރާގެ މެންބަރުކަންވެސް ކުރައްވާ ނާޒިމް ވިދާޅުވީ ސިއްހީ ދާއިރާއަށް ދިމާވެފައިވާ އެންމެ ބޮޑު ގޮންޖެހުމަކީ އެންސްޕާ އާއި އާސަންދައިން ކުރަން ޖެހިފައިވާ ބޭކާރު ހަރަދުތައް ގިނަވުން ކަމަށެވެ.
"އެހެންވެ ކޮންމެވެސް ބަޔަކަށް ބައި އެޅިފައި ހުރި އެގްރީމެންޓެއް މަތީގައި މި ސަރުކާރަކުން، އަޅުގަނޑުމެން ދެމިތިބޭކަށް ނުޖެހޭ،" އާ ކުންފުންޏެއް އުފައްދައިގެން ނަމަވެސް އާސަންދަ ހަމަ މަގަށް އަޅުވަން ޖެހޭ ކަމަށް ވިދާޅުވި އެވެ.
ދާދި ފަހުން، ލޮލަށް ޖަހާ އަގު ބޮޑު އިންޖެކްޝަނެއް ކަމަށްވާ ލުސެންޓިސް އިންޖެކްޝަން ބޮޑު އަގުގައި ވިއްކާ މައްސަލައެއް ވަނީ ފެންމަތިވެފަ އެވެ.
ނާޒިމް ވިދާޅުވި ގޮތުގައި އާސަންދައިން ރާއްޖެއިން ބޭރުގެ ހޮސްޕިޓަލްތަކާ އެކު ހެދިފައިވާ ކޮންޓްރެކްޓްތަކުގައި މެދުވެރިއަކު ނެތްނަމަ ބޭރުގެ ހޮސްޕިޓަލްތަކުން އާދަޔާ ހިލާފު ބޮޑު އަދަދެއް ބިލުނުކުރާނެ ކަމަށެވެ.
