މަޖިލީހަށް ހުށަހަޅާފައިވާ އަންނަ އަހަރަށް ލަފާކުރާ ބަޖެޓުގައި ބަޖެޓް ތަފްސީލު ހިމަނަންޖެހޭނެ ކަމަށާއި ބަޖެޓް އަނބުރާ ގެންގޮސް ތަފްސީލާއެކު އަލުން ހުށަހެޅުމަށް ރައްޔިތުންގެ މަޖިލީހުގެ މީދޫ ދާއިރާގެ މެމްބަރ އަޙްމަދު ސިޔާމް މުޙައްމަދު ވިދާޅުވެއެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އަންނައަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓާ ގުޅޭ ބަހުސްގެ ތެރެއިން މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދު ވިދާޅުވީ އެމަނިކުފާނު ރައްޔިތުންގެ މަޖިލީހުގައި ހޭދަކުރެއްވި 21 އަހަރުގެ ދިގު މާޒީގައި ތަފްސީލު ނުހިމަނައި ހުށަހަޅާފައިއޮތް ބަޖެޓެއް ފެނުނު މީ ފުރަތަމަ ފަހަރު ކަމަށާއި، ދުނިޔޭގެ އެއްވެސް ގައުމަކުން ތަފްސީލު ނުހިމަނައި ބަޖެޓެއް ހުށަނާޅާނެ ކަމަށެވެ.
ބަހުސްގެ ވަގުތުގައި މެމްބަރު ސިޔާމް ދެއްކެވި ވާހަކަ ފުޅުގައި ވިދާޅުވީ މިހާރު ހުށަހެޅިފައި އޮތް ބަޖެޓުގައި އޮތީ ޖުމްލަ އަދަދު ތަކެއް ހިމަނާފައި ކަމަށާއި، ދާއިރާތަކުން އެ ދާއިރާއަށް ކަނޑައަޅާފައިވާ ޖުމްލަ އަދަދުން ކުރާނެ ކަންކަމުގެ އެއްވެސް ތަފްސީލެއް ހިމަނާފައި ނުވާކަމަށެވެ. އަދި އެމަނިކްފާނު ވިދާޅުވީ އެކަމަކީ ޑިމޮކްރަސީއާއި ޓްރާންސްޕޭރަންސީއާއި ރައްޔިތު މީހާގެ ހައްގަށް ވެސް އިޙްތިރާމް ނުކުރާ ކަމެއް ކަމަށާއި ޓެކްސް ދައްކާ ފަރާތްތަކަށް އެ ޓެކްސް އިން ސަރުކާރުން ކުރާނެ ކަންކަންވެސް އެގެން ޖެހޭނެ ކަމަށެވެ.
އިތުރަށް މެމްބަރު ސިޔާމް ބިދާޅުވީ އަންނަ އަހަރަށް ލަފާކޮށްފައިވާ 56 ބިލިއަން ރުފިޔާގެ ބަޖެޓްގެ ތެރެއިން ކުރީ އަހަރަށްވުރެ 40 އިންސައްތަ އިތުރަށް ބޭރުގެ އެމްބަސީތަކަށް ޚަރަދުކުރުމަށް ހިމަނާފައިވާ ކަމަށާއި، އެކަމަކީވެސް އިސްރާފް ކަމަށެވެ.
މިދިޔަ އަހަރުގެ ބަޖެޓަށްވުރެ %40 އިތުރަށް މިއޮތީ ކޮންމެ ތަނެއްގައި ފޮރިންގ އެމްބަސީތައް ހިންގުމަށް ޚަރަދުކުރުމަށް، ހެޔޮވާނީ ކިހިނެއްތޯ ސިންގަޕޫރުގެ ހުންނަ އެމްބަސީއަށް އެތައް ސަތޭކަ މިލިއަން ރުފިޔާއެއް، ތައިލެންޑްގައި ހުންނަ އެމްބަސީއަށް ޚަރަދުކުރުމަށް އެތައް ސަތޭކަ މިލިެއަން ރުފިޔާއެއް ހެޔޮވާނީ ކިހިނެއްތޯ
މެމްބަރު ސިޔާމް ގެ ވާހަފަޅުގައި އިތުރަށް ވިދާޅުވީ މިހާރު ހުށަހަޅާފައިވާ ބަޖެޓަށް އެމަނިކުފާނަށް ވޯޓު ދެވެން ނެތް ކަމަށާއި ބަޖެޓް އަނބުރާ ގެންގޮސް ބަޖެޓްގެ ތަފްސީލު ހިމަނައިގެން އަލުން މަޖިޅިހަށް ހުށަހެޅުމުން އެ ބަޖެޓަށް ވޯޓު ދެއްވާނެ ކަމަށާއި މިހާރު ހުށަހަޅާފައިވާ ބަޖެޓަށް ވޯޓު ދިނުމުގެ ބާރު އެމަނިކުފާނަށް ނެތްކަމަށާއި އެބާރު އޮތީ ދާއިރާގެ ރައްޔިތުންގެ އަތުގައި ކަމަށާއި އެރައްޔިތުން އެ ދާއިރާގެ ވަކިވަކި ރަށްރަށަށް ބަޖެޓުން ވާން އިތް ކަމެއްގެ ތަފްސީލު އެނގެން ބޭނުންވާކަމަށެވެ.
އާދޭހާއެކު ދަންނަވަން އިއްޒަތްތެރި ރައީސް މި ބަޖެޓް ގެންދަވާށޭ، ގެންގޮސް އަޅުގަނޑުމެންނަށް ތަންދޮރު އެނގޭނެ ގޮތަކަށް މި ބަޖެޓް ހުށަހަޅުއްވާށޭ، އަޅުގަނޑުގެ ދާއިރާގެ ރައްޔިތުން ބޭނުމެއް ނުވޭ މި ބަޖެޓަށް ވޯޓުދޭކަށް، އަޅުގަނޑުގެ އެ ބާރެއް ނެތް އެ ބާރު އޮތީ ދާއިރާގެ ރައްޔިތުންގެ އަތުގައި، ސިޔާމް ވިދާޅުވިއެވެ.
މިހާރު ހުށަހަޅާފައިވާ ބަޖެޓަށް ވޯޓު ދެއްވައިފިނަމަ އަޒާބުވެސް ލިބޭނެކަމަށް މެމްބަރު ސިޔާމް މިއަދުގެ މަޖިލިސް ބަހުސްގައި ވަނީ ވިދާޅުވެފައެވެ.
