ރިސޯޓްތަކަށް ލިބޭ ޑޮލަރު ބޭންކުތަކުން މާރުކުރަން ޖެހޭ ގޮތަށް ހެދި ގަވާއިދުގައި ހުރި ބައެއް ކަންކަން ބަދަލުކޮށް ގާނޫނަކަށް ހެދުމަށް އެކަމާ ގުޅޭ ބިލެއް ޑްރާފްޓްކޮށް މަރުކަޒީ ބޭންކުން އާންމުންގެ ހިޔާލަށް ހުޅުވާލައިފި އެވެ.
އެމްއެމްއޭ އިން އާންމުންގެ ހިޔާލަށް ހުށަހެޅި "ބޭރު ފައިސާއާބެހޭ ބިލް" ގައިވާ ގޮތުން ވެސް ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.
ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޑޮލަރު މާރުކުރަން ލާޒިމްވާނެ އެވެ. އަދި ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.
ބިލުގައިވާ ގޮތުން، ގާނޫނާ އެއްގޮތްވާ ގޮތުގެ މަތިން ބޭރު ފައިސާއިން މުއާމަލާތްކުރުމަށް ކަނޑައަޅާފައިވާ ކަންކަމަށް ފިޔަވައި، ދިވެހިރާއްޖެއިން ދިވެއްސަކު ހޯދާ މުދަލާއި ހިދުމަތްތަކަށް ބޭރު ފައިސާއިން އަގު އަދާކުރަން ލާޒިމެއް ނުކުރެވޭނެ އެވެ.
މިހާރު އޮތް ގަވައިދާ ގުޅޭ ގޮތުން ޓޫރިޒަމް ދާއިރާއިން ފާޅުކުރާ ކަންބޮޑުވުންތަކާ ގުޅުން ހުރި ބައެއް ބަދަލުތައް ބިލުގައިވެ އެވެ. އޭގެ ތެރެއިން އެއް ކަމަކީ އަހަރެއްގެ ތެރޭގައި 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ވިޔަފާރިތަކުން އެ ފަރާތްތަކަށް ލިބޭ ބޭރު ފައިސާގެ އާމްދަނީ ރާއްޖޭގެ ބޭންކު އެކައުންޓަކަށް ޖަމާކުރުމެވެ. އެއީ ބޭރު ފައިސާގެ އާމްދަނީގެ 25 ޕަސެންޓަށް ވުރެ ބޮޑުނުވާ ގޮތަށް، ހަދާ ގަަވައިދެއްގެ ތެރެއިން މާރުކުރަން ޖެހޭ ގޮތަށެވެ.
މި ހާލަތުގެ ދަށުން އިސްތިސްނާވާ ފަރާތްތައް ވެސް ބިލުގައި ވަނީ ކަނޑައަޅާއިފަ އެވެ. އެއީ:
– 24 ގަޑިއިރު ހޭދަނުކުރާ ޓޫރިސްޓުން
– ދެ އަހަރުން ދަށުގެ ކުޑަކުދިން
– ހިލޭ ނުވަތަ ކޮމްޕިލެމްޓަރީކޮށް ތިބޭ ފަރާތްތައް
ބިލުގައި ދެން މައިގަނޑު ގޮތެއްގައިވާ އެންމެ ބޮޑު ބަދަލަކީ 50 އެނދަށް ވުރެ ގިނަ ވިޔަސް މަދުވިޔަސް މީހުން ދިރިއުޅޭ ރަށެއްގައި ހުންނަ ޓޫރިސްޓު ހޮޓާތައް ބީ ކެޓަގަރީއަށް ބަދަލުވުމެވެ. އޭރުން އެ ތަންތަނުން މާރުކުރަން ޖެހޭނީ ބޮލަކަށް 25 ޑޮލަރުގެ ރޭޓުންނެވެ.
