500 ޑޮލަރު މާރު ކުރަންޖެހޭ ގޮތަށް ބޭރު ފައިސާއާއި ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށާއި އެކަމުން ރައްޔިތުންނަށާއި ދިވެހި ގައުމަށް ލިބޭނެ ފައިދާ ރައީސް ޑރ.މުޙައްމަދު މުއިއްޒު ވިދާޅުދެއްވައިފިއެވެ.
ރައީސް ޑރ.މުއިއްޒު އެމަނިކުފާނުގެ ފޭސްބްުކް އެކައުންޓްގައި ކުރައްވާފައިވާ ޕޯސްޓެއްގައި ވިދާޅުވެލައްވާފައިވަނީ 500 ޑޮލަރު މާރު ކުރަންޖެހޭ ގޮތަށް ބޭރު ފައިސާއާއި ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށާއި އެކަމަށްޓަކައި އެމްއެމްއޭއަށް ޝުކުރުދަންނަވާ ކަމަށެވެ. އަދި 17 ނޮވެމްބަރ 2024 ގައި އެމަނިކުފާނު ދެންނެވި ފަދައިން ގަވައިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭ އިން އިސްނަގައިގެން ބޭރު ފައިސާ އާއިބެހޭ ޤާނޫނެއް ހެއްދެވުމަކީ މުހިއްމު ކަމެއްކަމަށާއި، އެ ޤާނޫނުގެ ސަބަބުން ރިސޯޓު ތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެކަމަށެވެ.
އިތުރަށް އެމަނިކުފާނު ވިދާޅުވެފައިވަނީ ޓޫރިޒަމް ނޫން ދާއިރާ ތަކުންވެސް ވަކި ވަރަކަށްވުރެ ގިނައިން ޑޮލަރު ޢާމްދަނީ ލިބޭނަމަ، ޑޮލަރު މާރުކުރަންޖެހޭ ގޮތަށް ހިމަނާފައިވައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެވެސް އިތުރުވެގެންދާނެކަމަށެވެ. އެގޮތުން ޑޮލަރުގެ އާއްމުދަނީ އިތުރުވުމުން ރައްޔިތުންނަށާއި ގައުމަށް ލިބޭނެ ފައިދާތަކުގެ ތެރޭގައި އާއްމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދާނެ ކަމަށެެެ.
އެގޮތުން ގެނެވޭނެ ބަދަލުތަކުގެ ތެރޭގައި 2025 ވަނަ އަހަރުގެ ޖުލައި މަހުން ފެށިގެން ސަރުކާރުން ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓްގައި ޑޮލަރު ލިބޭނެ އިންތިޒާމެއް ހަމަޖެހިގެންދާނެ ކަމަށާއި، 2026 ވަނަ އަހަރުގެ ފުރަތަމަ ކުއާޓާގައި ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ލިބޭ 500 ޑޮލަރު ދެގުނަކޮށް އެއަދަދު 1000 ޑޮލަރަށް ހެދުމަށް ހަމަޖެހިފައިވާ ކަމަށާއި، އަދި 2026 ވަނަ އަހަރުގެ ފުރަތަމަ ކުއާޓާގައި ކްރެޑިޓް ކާޑު ލިމިޓްތައް ބޮޑުކޮށްދޭން ހަމަޖެހިފައިވާ ކަމަށާއި، ދިވެހި ވިޔަފާރިވެރިންނަށް ތަކެތި އިމްޕޯޓްކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް ވެސް 2025 ވަނަ އަހަރުގެ ޖުލައިމަހުން ފެށިގެން ބޮޑުކޮށްދޭން ހަމަޖެހިފައިވާކަމަށެެެ.
އެމަނިކުފާނުގެ ޕޯސްޓްގައިވަނީ އާއްމު ރައްޔިތުންނާ ގުޅުންހުރި އެފަދަ ކަންކަމުގައި ރައްޔިތުންގެ ފަރާތުން ސަރުކާރަށް ލިބެމުންދާ ތާއިދަށް ޝުކުރުދަންނަވާފައެެެ.
