ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ދައުވާކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލި މައްސަލަ ސުޕްރީމް ކޯޓަށް މިއަދު ހުށަހަޅާނެ ކަމަށް ޕްރޮސެކިއުޓަ ޖެނެރަލް (ޕީޖީ) އޮފީހުން ބުނެފި އެވެ.
ޝަރީއަތް ނިމެންދެން ބަންދުކޮށްފައި ހުރި ލަމްހާ ދޫކޮށްލީ ނޮވެމްބަރު މަހު 12ގަ އެވެ. އޭނާ އަލުން ބަންދުކޮށްދިނުމަށް ޕީޖީ އޮފީހުން އެ މަހުގެ 14 ވަނަ ދުވަހު ހައިކޯޓުގައި އެދުނު ނަމަވެސް އެ މައްސަލަ ބަލައިނުގަންނަން ރަޖިސްޓްރާ ނިންމި އިރު ފަނޑިޔާރުންގެ މަޖިލީހުން ވެސް ވަނީ ރަޖިސްޓްރާގެ ނިންމުމަށް ތާއީދުކޮށްފަ އެވެ.
މިއަދުގެ ވަގުތެއްގައި ހައިކޯޓުގެ ރަޖިސްޓްރާގެ ނިންމުމާއި ފަނޑިޔާރުންގެ މަޖިލީހުގެ ނިންމުން ސުޕްރީމް ކޯޓުގައި އިސްތިއުނާފު ކުރާނެ ކަމަށް ޕީޖީ އޮފީހުން ބުނެ އެވެ.
އޮކްޓޫބަރު 2021 ގައި އައިޖީއެމްއެޗްގައި މަސައްކަތްކުރި ނަރުހެއް ކަމަށްވާ މޭރީ މަރާލި މައްސަލާގައި ދައުލަތުން ދައުވާކުރަނީ މޭރީގެ ފިރިމީހާ މާވިން އެސްވައިގެ މައްޗަށެވެ. އަދި ލަމްހާގެ މައްޗަށް ކުރަނީ އޭނާ މަރާލުމުގައި ބައިވެރިވުމުގެ ދައުވާ އެވެ.
