މޯލްޑިވްސް އިސްލާމިކް ބޭންކަށް 4 މިލިއަން ރުފިޔާ ދައްކަން ކުރީގެ ބަންޑާރަ ނައިބު އާއިޝަތު އާޒިމާ ޝަކޫރުގެ މައްޗަށް ގައިރު ހާޒިރުގައި ކޮށްފައިވާ ހުކުމް ސިވިލް ކޯޓުން ބާތިލުކުރުމަށްފަހު އެ ފައިސާ ދައްކަން އަނެއްކާވެސް އާ ހުކުމެއް ސިވިލްކޯޓުން ކޮށްފި އެވެ.
މޯލްޑިވްސް އިސްލާމިކް ބޭންކުން އާޒިުމާ ނަގާފައިވާ ލޯނަކަށް ފައިސާ ނުދައްކާ ކަމަށް ބުނެ އެ ބޭންކުން ހުށަހަޅާފައިވާ މައްސަލާގައި ފުރަތަމަ ހުކުމް ކޮސްފައިވަނީ ޝަރީއަތައް ޢާޒިމާ ހާޒިރުނުވުމުގެ ސަބަބުން އާޒިމާގެ ގައިރު ހާޒިރުގަ އެވެ. އެއަށްފަހު އާޒިމާގެ ފަރާތުން ހުކުމް މުރާޖައާ ކުރުމަށް ހުށަހެޅުމާ ގުޅިގެން އެ ކޯޓުން އިއްޔެ ކުރި ހުކުމްގައި މަދަނީ އިޖުރާއަތުގެ ގާނޫނުގެ 124 ވަނަ މާއްދާގެ (ހ)ގެ 2 ވަނަ ނަންބަރަށް ރިއާޔަތްކޮށް ޣައިރު ހާޒިރުގައި ކޮށްފައިވާ ހުކުމް ބާތިލް ކަމަށް ވަނީ ކަނޑައަޅައިފަ އެވެ.
އެއަށްފަހު ސިވިލް ކޯޓުން އިއްޔެ ކޮށްފައިވާ ހުކުމުގައި ބުނެފައިވަނީ އިސްލާމިކް ބޭންކުން އާޒިުމާއަށް ޑިމިނިޝިން މުޝާރަކާ ޕްރޮޕަޓީ ފައިނޭންސް ފެސިލިޓީއެއް ދޫކޮށްފައިވާ ކަމަށާއު، އެ ފެސިލިޓީގެ އެއްބަސްވުމާ އެއްގޮތަށް އާޒިމާ ފައިސާ ދައްކާފައި ނުވާ ކަން ސާބިތުވާ ކަމަށެވެ. އެހެންކަމުން މިހާތަނަށް ނުދައްކާ ފައިސާގެ އަދަދު ކަމަށްވާ 4،282،514 ރުފިޔާ އާއިއެކު ޗެރިޓީއަށް އަރާފައިވާ 266،512 ރުފިޔާ އަކީ އާޒިމާ އެ ބޭންކަނށް ދައްކަން ޖެހޭ ފައިސާ ކަމަށްވެސް ސިވިލް ކޯޓުން ވަނީ ކަނޑައަޅާފަ އެވެ. އަދި އިއްޔެއިން ފެށިގެން 3 މަހަށް ބަހާލައިގެން އެމްއައިބީ އަށް އެފައިސާ ދައްކައި ހަލާސް ކުރަންވެސް އާޒިމާ މައްޗަށް ހުކުމް ކޮށްފަ އެވެ. އަދި އެ ފައިސާ ބޭންކަށް ދައްކައި ހަލާސްކުރެވެންދެން ފެސިލިޓީ އެއްބަސްވުންތަކުގެ ދަށުން އިސްލާމިކް ބޭންކަށް ލިބިގެންވާ އެންމެހާ ހައްގުތަކާއި ބާރުތައް ބާތިލް ނުވެ ދެމިގެންދާނެ ކަމަށް ވެސް ހުކުމްގައި ކަނޑައަޅާފައިވެ އެވެ.
