މާލޭގެ ކެފޭއެއްގެ ތެރެއަށް މިދިޔަ ހަފުތާގެ ބުރާސްފަތި ދުވަހު ބަޔަކު ވަދެ އެ ތަނުގައި ހުރި ތަކެއްޗަށް ގެއްލުންދީ، އިންޒާރު ދިން މައްސަލައާ ގުޅިގެން ދެ މީހަކު ހައްޔަރުކޮށް، ތަހުގީގުގެ ބޭނުމަށް ބަންދަށް ފަސް ދުވަސް ޖަހައިފި އެވެ.
ބަޔަކު ވަދެގަނެ ގެއްލުން ދީފައިވަނީ ހަވީރީ ހިނގުމުގައި ހުންނަ "ލެޓްސް ކޮފީ" ކެފޭއަށެވެ. ސޯޝަލް މީޑިއާގައި އާންމު ކޮށްފައިވާ ވީޑިއޯއިން ފެންނަ ގޮތުގައި އެ ތަނަށް ވަދެގަނެފައިވަނީ ތިން މީހެކެވެ.
ފުލުހުން މިއަދު ބުނީ އެ ކެފޭ އަށް ވަދެ، ތޫނު ހަތިޔާރު ބޭނުން ކޮށްގެން މުވައްޒަފުންނަށް ބިރު ދެއްކި މައްސަލާގައި ކޯޓު އަމުރެއްގެ ދަށުން މިދިޔަ ހޯމަ ދުވަހު ދެ މީހަކު ހައްޔަރު ކޮށްފައިވާ ކަމަށެވެ.
އެއީ ގއ. ދެއްވަދޫ، ވައިލެޓްމާގޭ، އަހުމަދު ތައުފީގް، 31 އާއި ބ. ތުޅާދޫ، މީޒާން، އަސަދުﷲ ހާތިމް، 44 އެވެ.
އެ ދެ މީހުންގެ ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން ދެ މީހުންގެ ބަންދަށް ފަސް ދުވަސް ވަނީ ޖަހައިފަ އެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން އެ ދެ މީހުންގެ ބަންދަށް ފަސް ދުވަސް ދިނީ ވަކީލަކާ އެކު ކުރިއަށް ދާން ބޭނުންވާ ކަމަށް ދެ މީހުން ވެސް ބުނުމުންނެވެ.
އާންމުވެފައިވާ ވީޑިއޯއިން ފެންނަ ގޮތުގައި އެ ކެފޭގައި ޑެކަރޭޓްކުރަން ހަރުކޮށްފައި ހުރި ބައެއް ތަކެއްޗަށް އެ މީހުން ވަނީ ގެއްލުންދީފަ އެވެ. އެލުވާފައި ހުރި އެ ތަކެތި ނައްޓަމުން އެ މީހުން ބުނަމުންދިޔައީ "މިއީ ދިވެހިރާއްޖެ ކަމަށާއި މިތަނުގައި އެކަން ނުކުރެވޭނެ" ކަމަށެވެ.
އެވަގުތު ކެފޭގައި ތިބި ބިދޭސީ މުވައްޒަފުން އެ މަންޒަރު ވީޑިއޯ ކުރުމުން ވީޑިއޯ ޑިލީޓް ކުރަން ވެސް އިންޒާރު ދޭ ތަން ފެނެ އެވެ.
