ރޭ، ދަންވަރުން ފެށިގެން ވެރިރަށް މާލެއަށް މެދުނުކެނޑި ވެހުނު ވާރޭގެ ސަބަބުން ފެންވަދެ ގެއްލުވި ގެތަކުގެ 44 މީހަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން "އެކްސް" ގައި ކުރި ޕޯސްޓެއްގައި ބުނީ 7 ގޭބިސީއެއްގެ 44 މީހަކަށް 1 ދުވަހަށް ވަގުތީ ބޯހިޔާވަހިކަމާއި ކެއިން ބުއިންމުގެ އިންތިޒާމު ހަމަޖައްސާފައިވާ ކަމަށެވެ.
ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭ ވެހިފައިވަނީ މާލެއަށެވެ. އެއީ 130.7 މިލިލީޓަރުގެ ވާރޭ އެވެ. ދެން އެންމެ ގިނައިން ވާރޭ ވެހިފައިވަނީ ހުޅުލެއަށެވެ. އެއީ 79.5 މިލިމީޓަރުގެ ވާރޭ އެވެ.
ރޭ ވެހުނު ވާރޭގައި ބޮޑުވި ފެންގަނޑު ހިންދުމުގެ މަސައްކަތުގެ ތެރެއިން، މާލޭގެ މަގުތަކުން މިހާތަނަށް 19812 ޓަނުގެ ފެން ހިންދާފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފައިވެ އެވެ.
އެގޮތުން މާލޭގެ 8 ސަރަހައްދެއްގައި 23 ޕަމްޕު ބަހައްޓައިގެން ފެން ހިންދުމުގެ މަސައްކަތް ކުރިއަށް ގެންދިޔަ ކަމަށާއި، 104 ގެއަކަށް އެހީތެރިކަން ފޯރުކޮށްދީ 528 ވެލިބަސްތާ ޖަހައިދީފައިވާ ކަމަށް ސިފައިން ބުންޏެވެ.
މޫސުމާ ބެހޭ ގައުމީ އިދާރާ (މެޓް) އިން މިއަދު ހއ އަތޮޅުން ފެށިގެން ލ އަތޮޅަށް ބޯކޮށް ވާރޭވެހުމާއެކު ގުގުރާނެ ކަމަށް ލަފާކޮށް އެ ސަރަހައްދަށް ހެނދުނު 8:45 އިން ފެށިގެން މެންދުރުފަހު 2 ޖަހުމުގެ ނިޔަލަށް ވަނީ ވައިޓް އެލާޓް ނެރެފަ އެވެ.
އޭގެ އިތުރުން ބޯކޮށް ވާރޭ ވެހުމާއެކު ގުގުރާނެ ކަމަށް ލަފާކޮށް މިއަދު ހެނދުނު 9 އިން ފެށިގެން މެންދުރުފަހު 1 ޖެހުމުގެ ނިޔަލަށް ށ އަތޮޅުން ފެށިގެން ތ އަތޮޅަށް ވަނީ ޔެލޯ އެލާޓް ނެރެފަ އެވެ.
