ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެސްޓޯނިއާގެ ރައީސް ޑރ. އަލަރ ކާރިސްގެ ދަޢުވަތަކަށް އިޖާބަދެއްވައި، އެ ގައުމަށް ވަޑައިގަންނަވަން ނިންމަވައިފި އެވެ.
ރައީސް މުއިއްޒު އެސްޓޯނިއާއަށް ވަޑައިގަންނަވާނީ މިމަހުގެ 13 އިން ފެށިގެން 16 އަށެވެ. މިއީ ދިވެހިރާއްޖޭގެ އިންތިޚާބުވެފައިވާ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.
މި ދަތުރުފުޅުގެ މައިގަނޑު މަޤްޞަދަކީ ދެ ޤައުމުގެ ދެމެދުގައި އޮންނަ ގުޅުން އިތުރަށް ބަދަހިކުރުމާއި، އެކުވެރިކަމުގެ އައު ފުރުޞަތުތައް ހޯދުމެވެ. ދެ ޤައުމުގެ މެދުގައި ކުރިއަށްގެންދެވޭ މަޝްވަރާތަކުގައި ޚާއްޞަ އަހައްމިއްޔަތުކަމެއް ދެވޭނީ ޑިޖިޓަލް، ސައިބަރ އަދި އީ-ގަވަރނަންސްގެ ދާއިރާތަކާއި، މޫސުމާއި ތިމާވެށީގެ މައްސަލަތަކާއި، އަދި ސައިންސާއި ތަޢުލީމުގެ ދާއިރާތަކުގައި އެއްބާރުލުން އިތުރުކުރެވިދާނެ މަގުތައް ހޯދުމަށެވެ.
ދަތުރުފުޅުގައި ރައީސް ޑރ. މުޢިއްޒު، އެސްޓޯނިއާގެ ރައީސް ޑރ. ކާރިސްއާއި، އެސްޓޯނިއާގެ ޕާލަމެންޓް ’ރީގިކޯގު‘ ގެ ރައީސް ލޯރީ ހުސާރއާއި، އަދި އެކި ވުޒާރާތަކުގެ ވަޒީރުންނާ ބައްދަލުކުރައްވާނެއެވެ. އަދި އެސްޓޯނިއާގެ ދެވަނައަށް އެންމެ ބޮޑު ސިޓީ ކަމުގައިވާ ޓާޓޫއަށް ޒިޔާރަތްކުރައްވައި، ޓާޓޫ ޔުނިވަރސިޓީއަށާއި، އޭގެ ދިރާސާ އަދި ތަރައްޤީގެ މަސައްކަތްތަކަށާއި، އެސްޓޯނިއާގެ ޖީނޯމް ޑޭޓާބޭސް ސެންޓަރަށާއި، އަދި ގްރީނަރޖީ ޑޭޓާ ސެންޓަރަށް ޒިޔާރަތްކުރައްވާނެއެވެ.
ރައީސް ޑރ. މުޢިއްޒުގެ ވިސްނުންފުޅުގައި ވަނީ 2030 ވަނަ އަހަރާ ހަމައަށް ދިވެހިރާއްޖޭގެ ޖީޑީޕީގެ 15 އިންސައްތައަށް ހިއްސާކުރާ ޑިޖިޓަލް އިޤްތިޞާދެއް ޤާއިމުކުރުމެވެ. މިއީ 2040 ވަނަ އަހަރާ ހަމައަށް ދިވެހިރާއްޖެ ތަރައްޤީވެފައިވާ ޤައުމަކަށް ހެދުމުގެ ރައީސްގެ ދުރު ވިސްނުމުގެ މުހިންމު ބައެކެވެ.
މި ދަތުރުފުޅުގައި ރައީސްއާއެކު ޚާރިޖީ ވަޒީރު ޑރ. ޢަބްދުﷲ ޚަލީލާއި، އެތެރޭގެ ސަލާމަތާއި ޓެކްނޮލޮޖީގެ ވަޒީރު ޢަލީ އިޙްސާނާއި، އަދި ސަރުކާރުގެ އިސް ބޭފުޅުންގެ ވަފުދެއް ބައިވެރިވެވަޑައިގަންނަވާނެއެވެ. މީގެ އިތުރުން، ރާއްޖޭގެ ޓެކްނޮލޮޖީ ދާއިރާގެ އިސް ފަރާތްތަކުގެ މައްޗަށް އެކުލެވޭ އަމިއްލަ ވަފުދެއްވެސް ރައީސްއާއެކު ދަތުރުކުރައްވާނެ އެވެ. މި ވަފުދުން އެސްޓޯނިއާގެ ޑިޖިޓަލް ދާއިރާގައި މަސައްކަތްކުރާ ކުންފުނިތަކާއި މުއައްސަސާތަކާ ބައްދަލުކޮށް، އެ ޤައުމުގެ ތަޖުރިބާއިން މަންފާ ހޯދުމަށް މަސައްކަތްކުރާނެއެވެ.
އެސްޓޯނިއާ
އެސްޓޯނިއާއަކީ ޑިޖިޓަލް ގަވަރނަންސްއާއި އީ-ޚިދުމަތްތަކުގެ ދާއިރާގައި ދުނިޔޭގެ ކުރީ ސަފުގައި ހިމެނޭ ޤައުމެކެވެ. އޭގެ އީ-ރެސިޑެންސީ ޕްރޮގްރާމާއި، ކުރިއަރާފައިވާ އީ-ގަވަރނަންސް ޕްލެޓްފޯމްތަކާއި، އަދި ސަރުކާރުގެ ޚިދުމަތްތަކުގައި ޑިޖިޓަލް ޙައްލުތައް ފަސޭހަކަމާއެކު ބޭނުންކުރުމުގެ ގޮތުން މަޝްހޫރުވެފައިވާ ޤައުމެކެވެ. މި ދަތުރުފުޅުގައި ކުރިއަށްގެންދެވޭ ބައްދަލުވުންތަކާއި މަޝްވަރާތަކުގައި އެސްޓޯނިއާގެ ޓެކްނޮލޮޖީގެ ކުރިއެރުންތަކާއި އީޖާދުތަކަށް ޚާއްޞަ ސަމާލުކަމެއް ދެވޭނެއެވެ.
ރައީސް ޑރ. މުޢިއްޒު، އެސްޓޯނިއާގެ ރައީސްގެ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ބައްދަލުވުމެއްގައި ބައިވެރިވެވަޑައިގަންނަވާނެއެވެ. މި ބައްދަލުވުމަކީ ދެ ޤައުމުގެ ދެމެދުގައި އިތުރު އެއްބާރުލުން ހޯދުމުގެ ފުރުޞަތު ފަހިވެގެންދާނެ މުހިންމު ބައްދަލުވުމެކެވެ.
ޑިޖިޓަލް ބަދަލުވުމަކީ ރައީސް ޑރ. މުޢިއްޒުގެ އިސްކަންދެއްވާ އެންމެ މުހިންމު ކަންތައްތަކުގެ ތެރެއިން އެއް ކަމެކެވެ. މި މަޤްޞަދު ޙާޞިލުކުރުމަށްޓަކައި ސަރުކާރުން މިހާރު ވަނީ ޑިޖިޓަލް ބަދަލުވުމުގެ ކުރިމަގުގެ ޗާޓެއް އަދި ސްޓްރެޓެޖީއެއް އެކުލަވާލުމުގެ މަސައްކަތް ފަށާފައެވެ. އަދި ޔުނެސްކޯއާ ގުޅިގެން އޭއައި ރެޑީނެސް އެސެސްމަންޓެއް ހެދުމާއި ޤައުމީ އޭއައި މާސްޓަރ ޕްލޭނެއް އެކުލަވާލުމުގެ މަސައްކަތްވެސް ފެށިފައިވެއެވެ.
