ރ. މީދޫ އާއި އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ކުރިއަށްގެންދާ އޮޕަރޭޝަންގައި 12 ގެއެއް ބަލައި ފާސްކޮށްފި އެވެ.
އިއްޔެ ހެނދުނު ފުލުހުން ފެށި އެ އޮޕަރޭޝަންގެ މައުލޫމާތުގެ ފަހުގެ ތަފްސީލު ހިއްސާކުރަމުން ފުލުހުން ބުނީ، ބަލައިފާސްކޮށްފައި ވަނީ މީދޫގެ 7 ގެއަކާއި އަލިފުށީގެ 5 ގެއެއް ކަމަށެވެ.
އެ ގެތަކުން ފުލުހުންގެ ބެލުމުގެ ދަށަށް އެއްވެސް އެއްޗެއް ގެންދިޔަކަމެއް ފުލުހުން ބުނެފައެއް ނުވެ އެވެ. އަދި މި ކަމާއި ގުޅިގެއް އެއްވެސް މީހަކު ހައްޔަރުކޮށްފައެއްވެސް ނުވެ އެވެ.
މައުލޫމާތު ލިބިފައިވާ ގޮތުގައި، މީގެ ދުވަސްކޮޅެއް ކުރިން ސިހުރުގެ މައްސަލަތަކެއް ރަށުގައި ފެންމަތިވި ކަމަށެވެ. އެއީ އެ ރަށުގެ ދެމަފިރިއަކު ދުރުކުރަން ސިހުރު ހެދި ކަމަށް ތުހުމަތު ކުރެވޭ މައްސަލައެކެވެ.
މީދޫ އާއި އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ގެތަކެއް ބަލައިފާސްކޮށްފައިވާއިރު، މިދިޔަ އަހަރު ފަހުކޮޅު ކެލާގައި ފުލުހުންގެ އޮޕަރޭޝަނެއް ކުރިއަށްގެންގޮސްފައިވެ އެވެ.
އެ މައްސަލައާ ގުޅިގެން ބަޔަކު ހައްޔަރުވެސް ވަނީ ކޮށްފަ އެވެ.
