ރައްޔިތުންގެ މަޖިލީހުގެ ދައުރުން ބޭރުން ބާއްވާ ޖަލްސާ ބްރާސްފަތި ދުވަހު ބޭއްވުމަށް ނިންމައިފި އެވެ.
ރައްޔިތުންގެ މަޖިލީހުގެ ދައުރުން ބޭރުން ބާއްވާ ޖަލްސާ އެޖެންޑާ ކޮށްފައިވަނީ ބްރާސްފަތި ދުވަހުގެ ހެނދުނު 09:00 ގަ އެވެ.
ބްރާސްފަތި ދުވަހުގެ ޖަލްސާއަށް އެޖެންޑާކޮށްފައިވާ ކަންކަމުގެ ތެރޭގައި، އެޗްއާރްސީއެމްއަށް ނައިބުރައީސެއް އައްޔަނު ކުރުމަށް ރައީސް ފޮނުއްވާފައިވާ މައްސަލަ، ވަޒީރުންގެ ގޮތުގައި ޑިސެމްބަރު 26 ގައި ހުވާކުރެއްވި 4 ބޭފުޅުންނަށް ރުހުން ހޯދުމުގެ މައްސަލަ އަދި އޭސީސީއަށް 2 މެންބަރުން އައްޔަނު ކުރުމަށް ރައީސް ފޮނުއްވާފައިވާ މައްސަލަ ދިރާސާ ކުރުމަށް ކޮމިޓީއަށް ފޮނުވުން ހިމެނެ އެވެ.
ވަޒީރުންގެ މަޖިލީހަށް ގެންނެވި ބަދަލުތަކަކީ ފިނޭންސް އެންޑް ޕްލޭނިން މިނިސްޓަރު ކަމަށް މޫސާ ޒަމީރު، ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް މިނިސްޓަރު ކަމަށް ޑރ. އަލީ ހައިދަރު އަހްމަދު، އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ކަމަށް ޑރ. މަރްޔަމް މާރިޔާ އަދި ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ކަމަށް ޑރ. އަބްދުﷲ މުއްތަލިބް އެވެ.
މީގެއިތުރުން މަޖިލީހުގެ އެޖެންޑާގައި ކޮމިޓީތަކުން ހުށަހަޅާ ކަންކަމުގެ ގޮތުގައި، ބްރޮޑްކާސްޓިން ކޮމިޝަނަށް 2 މެންބަރުން އައްޔަނު ކުރުން އަދި އިލެކްޝަންސް ކޮމިޝަނަށް 2 މެންބަރުން އައްުޔަނު ކުރުމުގެ މައްސަލަ މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓް ހުށަހަޅައި ބަހުސް ކުރުމަށް އެޖެންޑާ ކޮށްފައިވެ އެވެ.
ރައްޔިތުންގެ މަޖިލިސް ޗުއްޓީއަށް ގޮސްފައިވަނީ ޑިސެމްބަރު މަހުގެ 12 ވަނަ ދުވަހުއެވެ. މަޖިލީހުގެ އާ ދައުރުގެ ޖަލްސާތައް ފަށާނީ ފެބްރުއަރީ 6 ވަނަ ދުވަހު އެވެ.
ރައްޔިތުންގެ މަޖިލީހުގެ ގަވައިދުގައި ބުނެފައިވަނީ، ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ނުވަތަ ޖަލްސާތަކެއް ބާއްވަން މަޖިލީހުގެ ތިންބައިކުޅަ އެއްބައި މެންބަރުން ސަބަބު ބަޔާންކޮށް ސޮއިކޮށް ރައްޔިތުންގެ މަޖިލީހުގެ ރައީސަށް ހުށަހަޅައިފިނަމަ، އެ ހުށަހެޅުން ހުށަހަޅާތާ 14 ދުވަހުގެ ތެރޭގައި އެ ޖަލްސާއެއް ނުވަތަ ޖަލްސާތައް ބާއްވަންވާނެ ކަމަށެވެ.
