މީގެ އަހަރެއްހާ ދުވަސް ކުރިން ރަޝިޔާއިން ޔޫކްރެއިންއަށް އަރައިގަތް ފަހުން މިހާތަނަށް 8،000 އަށް ވުރެ ގިނަ އާންމުން މަރުވެފައިވާ ކަމަށް އދގެ ހިއުމަން ރައިޓްސް އޮފީހުން ބުނެފިއެވެ.
މިދިޔަ އަހަރު ފެބްރުއަރީ މަހުގެ 24 ވަނަ ދުވަހު ހަމަލާ ދޭން ފެށި ފަހުން މަރުވި 7،199 މީހުންގެ އަދަދާ އަޅާބަލާއިރު، އަލަށް މަރުވި މީހުންގެ އަދަދު ވަރަށް ބޮޑުތަން އިތުރުވެފައިވާ ކަމަށް އދގެ ރިޕޯޓުގައި ބުނެފައިވެއެވެ. 90 އިންސައްތަ މީހުން މަރުވެފައިވަނީ ހަތިޔާރު ބޭނުންކޮށްގެން ކަމަށް އދ އިން ބުންޏެވެ.
ޔޫކްރެއިންގައި ހުންނަ އދ.ގެ އިންސާނީ ހައްގުތަކާ ބެހޭ މިޝަނުން ބުނީ، ޔޫކްރެއިން ގައި ގިނަ އަދަދެއްގެ މޮނިޓަރުން ތިބޭ އިރު، އެ ގައުމުން ލަފާކުރި އަދަދަށް ވުރެ މަރުވި މީހުންގެ އަދަދު ވަރަށް ބޮޑަށް އިތުރުވާނެ ކަމަށެވެ.
ރަޝިޔާއިން ދިން ހަމަލާތަކުގައި 8000 އެއްހާ މީހުން މަރުވެފައިވާ ކަމަށް ރިޕޯޓްކޮށްފައިވާއިރު އެމެރިކާ އަދި ޔޫރަޕިއަން ޔޫނިއަން (އީޔޫ) ވަނީ ޔޫކްރެއިނަށް ހަތިޔާރު ފޯރުކޮށްދިނުމަށް ނިންމާފައެވެ. އެމެރިކާއިން ދެ ބިލިއަން ޑޮލަރުގެ އަސްކަރީ އެހީ ދިނުމަށް ނިންމާފައިވާ ކަމަށް ރިޕޯޓްތައް ބުނެއެވެ.
އެކަމާއި ގުޅޭ ގޮތުން މައުލޫމާތު ދިން އެމެރިކާގެ ދެ އޮފިޝަލަކާ ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުން އަސްކަރީގެ އެހީގެ ތެރޭގައި ދުރު ރާސްތާގެ ރޮކެޓާއި އެހެނިހެން ހަތިޔާރު ވެސް ހިމެނޭނެ ކަމަށެވެ.
ޕެޓްރިއޮޓް އެއާ ޑިފެންސް ސިސްޓަމްތަކަށް ބޭނުންވާ ސަޕޯޓް އިކުއިޕްމަންޓާއި ޕްރިސިޝަން ގައިޑެޑް މިއުނިޝަން އަދި ޖެވެލިން އެންޓި ޓޭންކް ހަތިޔާރު ވެސް ހިމެނޭނެ ކަމަށް ބެލެވޭ ކަމަށް އެ ފަރާތްތަކުން ބުންޏެވެ.
އެއް އޮފިޝަލަކު ވިދާޅުވި އެ ހަތިޔާރުތަކަކީ އެމެރިކާގެ ހަތިޔާރުގެ ސްޓޮކުން ފޯރުކޮށްދޭ ހަތިޔާރުތަކެއް ނޫނެވެ. އެއީ ހަތިޔާރު ހޯދުމުގެ ފުރުސަތު ރައީސް ޖޯ ބައިޑަންގެ ސަރުކާރަށް ލިބޭ ޔޫކްރެއިން ސެކިއުރިޓީ އެސިސްޓެންސް އިނީޝިއޭޓިވް (ޔޫއެސްއޭއައި) ނަމަކަށް ކިޔާ ފަންޑެއް މެދުވެރިކޮށް ފޯރުކޮށްދޭ ހަތިޔާރުތަކެކެވެ.
އެ ފަންޑުން ހޯކް އެއާ ޑިފެންސް، ކައުންޓާ ޑްރޯން ސިސްޓަމް، ކައުންޓާ އާޓިލަރީ އަދި އެއާ ސަވައިލަންސް ރާޑަރު، މުވާސަލާތީ އާލާތްތަކާއި ޕޫމާ ޑްރޯން އަދި ޕެޓްރިއޮޓްސް އަދި ބްރެޑްލީ ފަދަ ބޮޑެތި ސިސްޓަމްތަކަށް ބޭނުންވާ ސްޕެއާ ޕާޓްސް އަށް ފައިސާ ދައްކާނެ ކަމަށް އޮފިޝަލަކު ވިދާޅުވިއެވެ.
