ޗާގޯސްގެ ކަނޑުގެ އިން ކަނޑައެޅި މައްސަލާގައި އިދިކޮޅު ޕީޕީއެމް/ޕީއެންސީ ކޯލިޝަންގެ ފަރާތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދާ މިއަދު ބައްދަލުކޮށްފި އެވެ.
އެ ކޯލިޝަނުން ބުނެފައިވަނީ، މިބައްދަލުވުމަކީ، ކުރީގެ ރައީސް އަދި ޕީޕީއެމްގެ ލީޑަރު ޔާމީންގެ ލަފާފުޅުގެ މަތިން ބޭއްވި ބައްދަލުވުމެއްކަމުގައެވެ.
އެ ބައްދަލުވުން އޮތީ މިއަދު ރައްޔިތުންގެ މަޖިލީހުގެ އިދާރާގައެވެ.
އެ ބައްދަލުވުމުގައި ބައިވެރިވެވަޑައިގެންނެވީ، ޕީއެންސީގެެ ރައީސް އަބްދުއްރަހީމް ( އަދުރޭ) އާއި ނައިފަރު ދާއިރާގެ މެންބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމާއި، މަހިބަދޫ ދާއިރާގެ މެމްބަރު އަހުމަދު ތޯރިގް ގެ އިތުރުން އެމްޑީޕީގެ ނަޝީދުގެ ފެކްޝަންގައި އިސްކޮށް ހަރަކާތްތެރިވެވަޑައިގަންނަވާ، އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އެވެ.
އެ ބައްދަލުވުމާ ގުޅޭ ގޮތުން އަދުރޭ ކުރެއްވި ޓްވީޓެއްގައި ވިދާޅުވީ، ރާއްޖޭގެ "ކަނޑުން ބައެއް ގެއްލުވާލި" މައްސަލާގައި އިދިކޮޅުން މަޖިލީސް ރައީސާ ބައްދަލުކޮށްފައިވާ ކަމަށެވެ.
ރާއްޖޭގެ ކަނޑުގެ ސަރަޙައްދުން ބައެއް ގެއްލުވާލި މައްސަލައާއި ގުޅިގެން ރައްޔިތުންގެ މަޖިލީހުގެ ރައީސް އާއި ޕީޕީއެމް/ޕީއެންސީގެ ފަރާތުން ބައްދަލުކޮށް މަޝްވަރާކުރުން 08/05/2023 pic.twitter.com/ekBasF1KgO
— Abdul Raheem Abdulla (@Banafsaa) May 8, 2023
މޮރިޝަސް – ރާއްޖެ އިމުގެ މައްސަލައިގައި އިދިކޮޅު ކޯލިޝަނުގެ އިތުރުން ރައީސް ނަޝީދު ވެސް ގެންދަވަނީ ސަރުކާރަށް ފާޑު ވިދާޅުވަމުންނެވެ.
