މިހާރު އޮލިމްޕަހުގެ ރިހި ސްކްރީނުގައި ދައްކަމުން އަންނަ ދިވެހި ފިލްމް "ލޯބިވެވިއްޖެ" ބަލާލުމަށް އިންޑިޔާގެ މަޝްހޫރި ފިލްމީތަރި އަފްތާބް ޝިވްދަސަނީ ދިވެހިރާއްޖެ އަށް އައިސްފިއެވެ.
އަފްތާބްގެ މި ދަތުރަކީ "ލޯބިވެވިއްޖެ" ގެ ޓީމްގެ ފަރާތުން އޭނާ އަށް ދިން ދައުވަތަކަށް އެ ފިލްމް ބަލާލުމަށްޓަކައި އައި ދަތުރެކެވެ. މިހާރުވެސް އޮލިމްޕަހުގައި ކާމިޔާބް ޝޯތަކެއް ދައްކަމުން އަންނަ "ލޯބިވެވިއްޖެ" ބަލާލުމަށް އަފްތާބް ރާއްޖެ އައިސްފައި ވަނީ މިއަދުގެ މެންދުރުގެ ވަގުތެއްގައެވެ.
ވެލާނާ އިންޓަރނޭޝަނަލް އެއަރޕޯރޓުން އަފްތާބް އަށް މަރުޙަބާ ކީ ފިލްމްގެ ޕްރޮޑިއުސަރުން ކަމަށްވާ ޝާނީޒް ޢަލީ އާއި އާމިނަތު ޝަނާޒްގެ އިތުރުން ފިލްމްގެ ޑައިރެކްޓަރ ޢަލީ ސީޒަންއެވެ.
"ލޯބިވެވިއްޖެ" ޓީމްގެ ފަރާތުން މައުލޫމާތު ދިން ގޮތުގައި އޮލިމްޕަސް ސިނެމާއިން އަފްތާބް ދިވެހި އޯޑިއެންސާއި ބައްދަލުކުރާނެއެވެ.
ދިވެހި ފިލްމް ލޯބިވެވިއްޖެ އަކީ 2020 ވަނަ އަހަރު ޑިސެމްބަރު 24 ވަނަ ދުވަހު ގދ. ތިނަދޫގައި ޝޫޓީންގ ފެށި ފިލްމެކެވެ. ފިލްމްގެ މަންޒަރުތައް ނަގާފައިވަނީ ގދ.ތިނަދޫ، މާލެ ސިޓީ ގެ އިތުން ސްރީލަންކާގެ ކޮލަމްބޯ އާއި ނުއަރަލިޔާ ގައެވެ.
ބޮޑު ބަޖެޓަކުން އުފައްދާފައިވާ މި ފިލްމުގެ މައިގަނޑު ކާސްޓުންގެ ގޮތުގައި ފިލްމްގެ ޑައިރެކްޓަރ އަލީ ސީޒަންގެ އިތުރުން މަރިޔަމް އައްޒަ، އާމިނަތު ރިޝްފާ، އަހްމަދު އީސަ (އާނަންދު)، އަލީ އާޒިމް (ދޮން އައްޔަ)، އަހްމަދު ނިމާލް، އަބްދުﷲ ޝާފިއު (ފުބޫ)، އާމިނަތު ނިޝާ (ނިޝްކޮ)، އިރުފާނާ އިބްރާހީމް (އެރޫ) ހަރަކާތްތެރިވެފައިވެއެވެ.
އޭގެ އިތުރުން މި ފިލްމުގެ ސްކްރީންޕްލޭ ލިޔުނީ ސްކްރީން ރައިޓަރ އަޙްމަދު ޒަރީރު ކަމަށްވާއިރު، ފިލްމު ކެމެރާ ކޮށްފައިވަނީ އިބްރާހީމް މޫސާ (ދަބަ) އެވެ. އަދި މި ފިލްމުގެ ޑައިރެކްޓަރަކީ ހުނަރުވެރި އެކްޓަރ އަދި ޑައިރެކްޓަރ އަލީ ސީޒަންއެވެ. ލޯބިވެވިއްޖެ ފިލްމަށް ބެކް މިއުޒިކް ތައްޔާރުކޮށްފައިވަނީ ޒުވާން މިއުޒިޝަން ފަތުހުﷲ ޝަކީލް ހުސައިން އެވެ.
މި ފިލްމްގެ ޖުމްލަ 8 ލަވަ ހިމެނޭ އިރު، އެ ހުރިހާ ލަވަތަކެއްވެސް މިހާރު ވަނީ އެސް ޕްރޮޑަކްޝަންސްގެ ސައުންޑްކްލައުޑް އަށް އަޕްލޯޑް ކޮށްފައެވެ. ފިލްމްގެ ލަވަތައް ކިޔާދީފައިވަނީ ރާއްޖޭގެ މަޝްހޫރު ލަވަކިޔުންތެރިން ކަމުގައިވާ މުހައްމަދު އަބްދުލް ޣަނީ (ތޭރަވާ)، އިބްރާހިމް ޒައިދު އަލީ (ކުޑަ އިއްބެ)، މަރްޔަމް އަޝްފާ، ރާފިޔަތު ރަމީޒާ، ހަސަން ޖަލާލް، މުމްތާޒު މޫސާ، މޯލްޑިވިއަން އައިޑަލްގެ ޖަޖުކަން ކޮށްފައިވާ އައްމަޑޭ އަދި އައިޑަލް އިން ވިދާލި މުއައްޒިންގެ އިތުރުން އަލީފް އަލީ އާއި ނަފްހާއެވެ.
މި ފިލްމްގެ ކާމިޔާބް ޝޯތަކެއް މިދިޔަ ހަފްތާ ތެރޭގައި ގދ.ތިނަދޫ، ކުޅުދުއްފުށި ސިޓީގެ އިތުރުން އައްޑޫސިޓީގައި ދީފައިވެއެވެ.
