ރަޝިޔާއިން ފޮނުވާލި 36 ޑްރޯން ކާމިޔާބުކަމާއެކު ވައްޓާލާފައިވާކަމަށް ޔޫކްރޭންގެ އަސްކަރިއްޔާއިން ބުނެފިއެވެ.
އެ ޑްރޯންތަކަކީ މުހިންމު އުމްރާނީ ވަސީލަތްތަކާއި އަސްކަރީ ވަސީލަތްތަކަށް އަމާޒުކޮށް ދިން ހަމަލާތަކުގެ ތެރޭގައި ހިމެނޭ ޑްރޯންތަކެކެވެ.
ރައީސް ވޮލޮޑިމިރް ޒެލެންސްކީ ވަނީ އެއްވެސް ޑްރޯންއެއް އެ މީހުންގެ އަމާޒަށް ވާސިލްވިޔަ ނުދިނުމަށް ވައިގެ ދިފާއީ ބާރުތަކުން ކުރަމުންދާ މަސައްކަތަށް ތައުރީފް ކުރައްވާފައެވެ. އޮކްޓޫބަރު މަހުން ފެށިގެން ރަޝިޔާއިން އަންނަނީ ޔޫކްރެއިންއަށް ހަމަލާދިނުމަށް ޑްރޯން ފޮނުވަމުންނެވެ.
ޔޫކްރެއިންގެ ވައިގެ އަސްކަރިއްޔާއިން ބުނީ ދުޝްމަނުންގެ ވިސްނުން ހުރީ އެ ގައުމުގެ ހުޅަނގުގެ ސަރަހައްދުތަކުގައި ހުރި މުހިންމު އުމްރާނީ ވަސީލަތްތަކާއި އަސްކަރީ ތަންތަނަށް އަމާޒުކޮށްގެން ކަމަށެވެ. ވެރިރަށް ކީވްއަށް ވެސް މި މަހުގެ ތެރޭގައި އެތައް ފަހަރެއްގެ މަތިން ޑްރޯންގެ ހަމަލާތައް ވަނީ އަމާޒުވެފައެވެ. ޔޫކްރެއިންގެ ދެކުނު އަދި ހުޅަނގުގެ ސަރަޙައްދީ އަދި އަސްކަރީ އިދާރާތަކުން ވަނީ ޑްރޯންތައް ކާމިޔާބުކަމާއެކު ވައްޓާލާފައިވާކަމަށް ރިޕޯޓްކޮށްފައެވެ.
