ބަންޑާރަ ނައިބު އިބްރާހިމް ރިއްފަތު ގެ އިތުބާރު ނެތް ކަމުގެ މައްސަލައަށް ޖަވާބުދާރީވެވަޑައިގަތުމަށް އޭޖީ ރިއްފަތުގެ އަރިހުގައި މިއަދުގެ މަޖިލިސް ޖަލްސާއަށް ވަޑައިގެންނެވި ދެ އަންހެން ވަކީލުންނަށް އޭދަފުށީ ދާއިރާ މެންބަރު އަހްމަދު ސަލީމް (ރެޑްވޭވް ސަލީމް) މަލާމާތް ރައްދުވާފަދަ ބަސް ވިދާޅުވެއްޖެއެވެ.
އޭޖީގެ އިތުބާރު ނެތްކަމުގެ މައްސަލަ ހުށަހެޅުއްވި، މަޑުއްވަރީ ދާއިރާގެ މެމްބަރި އާދަމް ޝަރީފް މައްސަލަ ހުށަހަޅުއްވަމުން ގެންދަވަނިކޮށް އިދިކޮޅު ޕީޕީއެމް ތަމްސީލުކުރައްވާ ރެޑްވޭން ސަލީމް ނިޒާމީ ނުކުތާއެއް ނަންގަވާ، މަލާމާތުގެ މޭރުމަކުން ވިދާޅުވީ އެއީ "ކުޑަ ދެ ކުދިން" ކަމަށް ޝައްކުވާ ކަމަށެވެ.
"އަޅުގަނޑު ނިޒާމީ ނުކުތާއެއް ނެގީ ބަންޑާރަ ނައިބުގެ އަރިހުގައި ތިއްބެވީ 18 އަހަރު ނުފުރޭ ކުޑަ ދެ ކުދިން ކަމަށް އަޅުގަނޑަށް ޝައްކުވާތީ، އެކަން ސާފުކޮށްލަން ވެގެން،" އޭނާ ވިދާޅުވި އެވެ.
ސަލީމު އެހެން ވިދާޅުވުމުން ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ވަގުތުން ނިޒާމީ މައްސަލައެއް ނަންގަވައި، މަޖިލީހަށް ވަޑައިގަންނަވާ އަންހެން ބޭފުޅުންނާ ކުޑައިމީސްކޮށް ވާހަކަނުދެއްކެވޭނެ ކަމަށް ވިދާޅުވި އެވެ.
ރައީސް ނަޝީދު އެކަން ބައްލަވައިގަނެ ކަނބަލުންނަށް ކުޑައިމީސް ބަސް ނުބުނުމަށް އެދިވަޑައި ގެންނެވިއެވެ.
"އެއްވެސް އިއްޒަތްތެރި މެމްބަރަކު މި ތަނަށް ހާއްސަކޮށް ޖިންސުއްލަތީފުންނާ ގުޅޭ ގޮތުން، މި ތަނަށް ވަޑައިގަންނަވާ ބޭފުޅުންނާ ގުޅޭ ގޮތުން ކުޑައިމީސްކޮށް ވާހަކަނުދެއްކުމަށް ވަރަށް ބޮޑަށް އެދެން،" ނަޝީދު ވިދާޅުވިއެވެ.
މަޖިލީހުގެ ގަވައިދާ އެއްގޮތަށް ވަޒީރުން ޖަވާބުދާރީ ވާ އިރު އެހީތެރިވާން މުވައްޒަފުން ވަޑައިގަންނަވައެވެ. އެގޮތުން މިއަދު އޭޖީ ރިއްފަތު ވަޑައިގެންނެވީ އޭޖީ އޮފީހުގެ ދެ ވަކީލުން ގޮވައިގެންނެވެ.
އެނގިފައިވާ ގޮތުގައި އެ ދެ ވަކީލުންނަނީ އޭޖީ އޮފީހުގެ ޑެޕިއުޓީ އޭޖީ ހަދީޖާ ޝަބީން އާއި އެ އޮފީހުގެ ކައުންސެލް ޖެނެރަލް ފާތިމަތު ހަލީމް އެވެ. އެ ދެބޭފުޅުންނަކީ ވެސް ދިގު މުއްދަތަަކަށް އެ އޮފީހުގައި މަސައްކަތް ކުރައްފާފައިވާ ދެބޭފުޅުންނެވެ.
ކިޔުންތެރިންގެ ޚިޔާލުތައް
ސަލީމަކީއުމުރުންދުވަސްވެފައިވާމީހަކަށްވާތީފެނުމުގައިމައްސަލަހުރެދާނެނުވަތަފިރިހެނަކަށްވާތީޅަދޮޅުއަންހެންކުއްޖަކުފެނުނީމައިހިއްކިޔައިފާނެ
އަހާބަލާ ތިޔަބުނާ ސަލީމުއަށް ފަސް އަހަރު ވީތޯ