ޕާކިސްތާނުގެ ކުރީގެ ބޮޑުވަޒީރު އިމްރާން ހާންގެ މައްޗަށް ގައްދާރުވުމުގެ ތުހުމަތުކުރި ވަކީލަކު މަރާލުމުގައި އޭނާ ބައިވެރިވި ކަމުގެ ތުހުމަތު ކޮށްފިއެވެ.
އެއީ "މޮޔަ" ތުހުމަތުތަކެއް ކަމަށް ބުނެ އިމްރާން ވަނީ އެކަން ދޮގުކުރައްވާފައެވެ.
ގާނޫނީ ވަކީލް އަބްދުއްރައްޒާގު ޝާރު މަރާލާފައިވަނީ އަންގާރަ ދުވަހު، ކުއެޓާގައި ހުންނަ ބަލޫޗިސްތާން ހައި ކޯޓު ކޮމްޕްލެކްސްއަށް ދަތުރު ކުރަމުން ދަނިކޮށް ކާކުކަން ނޭގޭ ބަޔަކު ދިން ބަޑީގެ ހަމަލާއެއްގައެވެ. ފުލުހުންގެ އޮފިޝަލުން ވިދާޅުވީ ޝާރުގެ ކާރަށް 10 ފަހަރެއްގެ މަތިން ބަޑި ޖަހާފައިވާ ކަމަށެވެ.
ޝާރުގެ ދަރިފުޅު ސިރާޖު އަހްމަދު ވަނީ ޕާކިސްތާން ތަހްރީކޭ އިންސާފް (ޕީޓީއައި) ޕާޓީގެވެސް ލީޑަރު އިމްރާންއާ ދެކޮޅަށް، އޭނާގެ ބައްޕަ މަރާލުމުގައި އެހީތެރިވެދެއްވި ކަމަށް ތުހުމަތު ކޮށްފައެވެ.
"އިމްރާން ދެކޮޅަށް އަޅުގަނޑުގެ ބައްޕަ މައްސަލަ ހުށަހެޅީ 6 ވަނަ މާއްދާގެ ދަށުން، އަޅުގަނޑަށް ޔަގީން، އެއީ (އިމްރާން) އާއި އޭނާގެ ޕީޓީއައި މީހުން އަޅުގަނޑުގެ ބައްޕަ މަރާލައި، ބިރުވެރިކަން ފަތުރަނީ އެހެންވެކަން." ސިރާޖްގެ ބަޔާނުގައި ބުނެފައިވަނީ އިމްރާނާ ދެކޮޅަށް ޕެޓިޝަން ހުށަހެޅުމުން އޭނާގެ ބައްޕައަށް މަރުގެ އިންޒާރު ދީފައިވާ ކަމަށެވެ.
ޕާކިސްތާނުގެ ގާނޫނު އަސާސީގެ ހަ ވަނަ މާއްދާގެ ދަށުން ކުރީގެ ބޮޑުވަޒީރުގެ މައްޗަށް އުފުލާފައިވާ ގައްދާރުވުމުގެ ދައުވާގެ ދަށުން ޝަރީއަތް ހިންގުމަށް އެދި ޝާރު ވަނީ މިދިޔަ މަހު ބަލޫޗިސްތާން ހައި ކޯޓަށް މައްސަލަ ހުށަހަޅައިފައެވެ.
ޝާރު ހުށަހެޅުއްވި ޕެޓިޝަނުގައި ވަނީ އިމްރާން ބޮޑުވަޒީރުކަމުން ދުރުކުރުމަށް ހުށަހަޅާފައިވާ އިތުބާރު ނެތްކަމުގެ މައްސަލައިން ސަލާމަތްވުމަށް މިދިޔަ އަހަރުގެ އޭޕްރީލް މަހު ނެޝަނަލް އެސެމްބްލީ އުވާލަން ނިންމާފައިވާތީ އިމްރާންގެ މައްޗަށް ގައްދާރުވުމުގެ ދައުވާ އުފުލަން ޖެހޭ ކަމަށެވެ.
ޕީޓީއައިގެ ސޯޝަލް މީޑިއާ އެކައުންޓްތަކުގައި ހިއްސާކޮށްފައިވާ ވީޑިއޯއެއްގައި އިމްރާން ވަނީ އޭނާގެ މައްޗަށް އުފުލާފައިވާ ދައުވާތަކަށް ރައްދު ދެއްވައި، އެ ދައުވާތަކަކީ ހަގީގަތާ ހިލާފު ވާހަކަތަކެއް ކަމަށް ވިދާޅުވެފައެވެ. އޭނާ ވިދާޅުވީ މި "މޮޔަ މައްސަލަ" ގައި ދައުވާ ކުރާކަން އެނގިވަޑައިނުގަންނަވާ ކަމަށާއި އޭނާގެ މައްޗަށް ގިނަ މައްސަލަތަކެއް ހުށަހަޅާފައިވާ ކަމަށެވެ.
މިދިޔަ އަހަރުގެ އޭޕްރީލް މަހުގެ އިމްރާން ޕާލަމެންޓް އުވާލުމަކީ ގާނޫނު އަސާސީއާ ހިލާފު ކަމެއް ކަމަށް ސުޕްރީމް ކޯޓުން ވަނީ ކަނޑައަޅައިފައެވެ. އޭގެ ހަފުތާއެއް ފަހުން މަޖިލީހުގެ އިތުބާރު ނެތްކަމުގެ ވޯޓަކުން އޭނާ ވަނީ ވެރިކަމުން ދުރުކޮށްފައެވެ.
ބޮޑުވަޒީރު ޝަހްބާޒް ޝަރީފްގެ އަރިސް ބޭފުޅެއް ކަމަށްވާ އައްތައުﷲ ތަރާރު ވަނީ ނޫސްވެރިންގެ ބައްދަލުވުމެއްގައި ޝާރު މާރާލުމުގައި އިމްރާންގެ ބައިވެރިވުން އޮތް ކަމަށް ތުހުމަތުކޮށްފައެވެ.
ޕީޓީއައިއިން ވަނީ އެ ތުހުމަތުތައް ދޮގުކޮށް ދެފުށް ފެންނަ ތަހުގީގެއް ހިންގުމަށް ގޮވާލާފައެވެ. ޕީޓީއައިގެ ސެންޓްރަލް އިންފޮމޭޝަން ސެކްރެޓަރީ ރައޫފް ހަސަން ވަނީ ޝަރީފާއި އިންޓީރިއާ މިނިސްޓަރު ރަނާ ސަނާއުﷲ ގެ ނަން ރަސްމީކޮށް މަރުގެ މައްސަލާގައި ހިމެނުމަށް ގޮވާލައި، އެ މައްސަލަ ސުޕްރީމް ކޯޓުގައި ބަލައިދިނުމަށް އެދިފަ އެވެ.
އިމްރާން މަގާމުން ދުރުކުރި ފަހުން އޭނާގެ މައްޗަށް 100 އަށް ވުރެ ގިނަ މައްސަލަ ހުށަހަޅާފައިވާއިރު، ގާނޫނީ ގޮތުން ގިނަ ގޮންޖެހުންތަކެއް އިމްރާނަށް ވަނީ ކުރިމަތިވެފަ އެވެ.
